Albert vun Buxhoeveden

Albert vun Buxhoeveden (* üm 1165 bi Bremen; † 17. Januar 1229 in Riga) weer Bischop vun Riga.

Albert vun Buxhoeveden

Albert keem ut dat Ridderslecht vun Bexhöv bi Bremen. He weer Doomherr in Bremen, as em 1199 sien Unkel Hartwig II. to′n Bischop vun Livland möök. He müss dat Land aver eerstmal innehmen un de Inwahner to Christen maken, denn de weren noch Heiden. He föhr 1200 mit en noorddütsch Pilgerheer, dat vun Paapst Innozenz III. Sündenaflaat toseggt kregen harr, op 23 Scheep to de Münn vun’e Düna, wo he 1201 de Stadt Riga grünn.

1202 grünn he den Sweertbröderorden. Dörteihn Maal möök he Reisen na Düütschland un ok en poor Maal na Italien un wedder trüch na Livland, dat he bet 1207 innehmen kunn un an′n 1. April 1207 vun Kaiser Philipp as Lehn vun′t Düütsche Riek kreeg. Ok Semgallen nehm he in un richt dor en Bisdom in. Över Estland keem he eerst mit′n Orden vun′e Ridderschop Christi, denn mit König Waldemar vun Däänmark in en langen Striet. Doch 1224 kunn he ok dit Land ünnerkregen un sien Broder Hermann dor to’n Bischop maken. In′t Johr 1225 möök em Kaiser Friedrich II. to′n Fürsten un sien Bisdom to ene Mark vun′t Riek; Paapst Honorius III. harr em denn Unafhangigkeit vun jeden Metropolitanverband toseggt.