Alfred “Alf” Buchanan Cheetham (* 6. Mai 1867 in Liverpool; † 22. August 1918, afsaapen in de Noordsee) weer en engelsch Seemann un Forschungsreisender bi de Erkundung vun de Antarktis.

Alfred Cheetham (links) mit Thomas Crean an Bord vun de Endurance (circa 1914)

Leven ännern

Alfred Cheetham wurr as Söhn vun John un Annie Elizabeth Cheetham in Liverpool boren. As he ruch weg teihn Johr old weer truck he mit sien Öllern vun dor nah Hull. All as Teenager gung he to See un hett bi en Fischereeflotte in de Noordsee arbeit. Later wurr he Bootsmann un hett ok as Reservist in de Royal Navy deent. Mit sien Fru Eliza Sawyer harr he 13 gemeensam Kinner.

Cheetham hett an veer bedüüdend Antarktisexpeditschonen deelnommen. Bi de Discovery-Expeditschoon (1901-1904) ünner de Leitung vun Robert Falcon Scott weer he an Bord vun dat Schipp Morning an de Rettung vun de up de Hut-Point-Halfinsel in’t Ies inslooten Expeditschonsdeelnehmer bedeeligt. Ernest Shackleton hett hüm to’n darten Offizier an Bord vun de Nimrod bi de Nimrod-Expeditschoon (1907-1909) befördert. Bi Scott sien to’n Dood führend Versöök, in‘ Verloop vun de Terra-Nova-Expeditschoon (1910-1913) bit to den Süüdpool to kommen, deen Cheetham as Bootsmann an Bord vun de Terra Nova. Wiel he to dissen Tietpunkt all Familie harr, wurr he bi de Utwahl vun de Mannschap, de sück up de Söök nah Scott un sien Begleiters maken dee, övergahn. As he to de Endurance-Expeditschoon (1913-1916) weer as Bootsmann un dart Offizier vun Shackleton anhüert wurr, weer de dormals 47-johrige Cheetham de Expeditschoonsdeelnehmer mit de gröttste Antarktiserfohren. To’n Tietpunkt vun de Rettung vun de Grupp ünner de Leistung vun Frank Wild up Elephant Island harr he insgesamt meest söss Johr in antarktisch Gewässern verbrocht.

Cheetham gull ünner sien Kollegen as Spassvagel. Frank Worsley hett hüm eenmal as „Prirat bis in die Fingerspitzen“ betekent. Bi den gemeensamen Upenholt up Elephant Island weer nah Worsley sien Dorstellen de Besitt vun Rietsticken derart wertvull, dat Cheetham hüm för een eenzig Rietstick en Buddel Champagner boden hett. De wull Cheetham Worsley övergeven, sobald he en eegen Pub in Hull apen maken dee. Doch dorto sull dat denn doch nich mehr kommen.

Nah sien Rückkehr vun de Endurance-Expeditschoon hett Cheetham erfohren, dat sien 16-johrig Söhn William Alfred wiels den Deenst up den Krüüzfohrer Adriatic üm’t Leven kommen weer. Cheetham hett sück freewillig to’n Kriegsdeenst bi de Hannelsmarine meld un deen as tweet Offizier up dat Dampschipp Prunelle. He is an‘ 22. August 1918 bi de Ünnergang vun dat Schipp storven, nahdem dat vun en düütsch U-Boot torpedeert wurrn weer.

För sien Verdeenste bi de Endurance-Expeditschoon wurr Cheetham mit de sülvern Polarmedaille uttekent.

Weblenken ännern