De Arteria basilaris is een vun de groden Arterien, de den Bregen mit suerstoffriek Blood versorgen doot. Se is unpoorig, d. h. de A. basilaris gifft dat blots eenmol in’n Lief.

De Arteria basilaris billt den middleren Deel vun’n Circulus arteriosus cerebri

Verloop ännern

De Arteria basilaris entsteiht ut de Verenigen vun de beiden Warvelarterien links un rechts an de Grenz twüschen Medulla oblongata un Pons.[1] Dat hele Rebeet, dat vun ehr versorgt warrt, warrt dorüm ok as vertebrobasilär Stroomrebeet nöömt.[2] Se hett in’n Dörsnitt en Läng vun 3 cm un en Dörmeter vun 3 mm un tütt sik dör de Cisterna Pontis na rostral.[1] Dorbi liggt se in’n Sulcus basilaris, de vun de beidsietigen Wulsten vun de Pyramidenbahnen billt warrt un in de Mitt vun’n Pons liggt.[3] An’n vörderen Brüchenrand oder in de Fossa interpeduncularis deelt se sik op in de beiden achteren Bregenslagadern. Normalerwies liggt diese Optwiegen in Hööch vun’t Dorsum sellae.[4].

In ehrn Verloop gifft se to’n Versorgen vun’n Lüttbregen (Cerebellum) toeerst na recht un links elk de Arteria inferior anterior cerebelli (klinisch Utdruck AICA) un kort vör ehr Opdelen na beid Sieten de Arteria superior cerebelli. Butendem versorgt se över de Arteria labyrinthi dat Binnenohr, man de entsteiht faken ok ut de A. inferior anterior cerebelli.[5] Mit tallriek lüttere Twiegen, de Rami ad pontem oder Arteriae pontis nöömt warrt, versorgt se bito den medialen Deel vun de Pons un vun de Medulla oblongata.[6] Na jemehr Dörgangssteden oder Versorgensrebeden kann man jem ünnerdelen in mediale, mediolaterale un laterale Twiegen (Rami paramediani, Rami circumferentes brevi un Rami circumferentes longi).[2], wobi de medialen Twiegen de Versorgen vun de angrenzen Rebeden vun’n Pons övernehmt, un de lateralen Twiegen de lateralen Andelen vun’n Pons un vun’n Pedunculus cerebellaris medius versorgt.[1]

Anatoomsch Aforden ännern

Mit dat Öller kan sik de verlängerte Arterie verbögen un sik de Optwiegen för de A. cerebri posteriores na rostral verschuven. De konkave Siet vun de Böög is dorbi in de meisten Fäll gegen de Arteria vertebralis richt. De Dörmeter kann ok ünnerscheedlich wesen mit Weerten twüschen 2,7 un 4,3 mm.[4]. In enige Fäll kann de Arteria basilaris as anatoomsch Afoort ok dubbelt utbillt wesen („Knooplockdeformität“) as Utdruck vun ehr Tostannenkamen ut de beiden Warvelarterien.

Krankheiten ännern

Na ehr Versorgensrebeden künnt in’t Rebeet vun de A. basilaris Mangeldörblöden vörkamen, de dör Symptomen as Swinnelgeföhl un Ohrluden künnig warrt in’n Fall vun’t Binnenohr un de Karnrebeden vun’n Nervus vestibulocochlearis in de Medulla oblongata. Bi Ischämien in disse Rebeden oder in’n Lüttbregen künnt ok Stören vun’t Gliekgewicht oder bi Stören vun’t Dörblöden vun de groten op- un afstiegen Bahnen Lahmen un Stören in de Sensibilität vörkamen. Disse Stören sind faken blots op en Liefhälft begrenzt, wieldat tomeist blots enkelte Twiegen vun de Arteria basilaris bedrapen sünd. Vörkamen künnt disse Stören nich blots bi Fattverännern in dat beschreven Stroomrebeet, man ok bi’t Subclavian-Steal-Syndrom.[5]

Bi en Thromboos vun de Basilaris kummt dat to utprägte Formen vun’n levensgefährlichen Bregenstamminfarkt mit de Naklapp vun en Tetraparees (’n Lahmen vun all Arms un Benen), swore Stören vun de Sensibilität, as ok Stören bi’t Slucken un bi’t Aten. De dullste Form vun’n Bregenstamminfarkt is dat Locked-in-Syndrom, dat to en afsluut Unvermögen vun Bewegen vun’n Rump, Kopp, Arms un Benen föhrt. Blots piellieke Atenbewegen sünd willkürlich mööglich. In’n Ünnerscheed to’n Waakkoma is de Patient dorbi to’n gröttsten Deel klor bi Verstand.

Borns ännern

  1. a b c Drenckhahn, Detlev: Nervensystem. Blutgefäße des Zentralnervensystems, in: Drenckhahn, Detlev (Rgv.): Benninghoff. Anatomie. Makroskopische Anatomie, Histologie, Embryologie, Zellbiologie, Bd. 2, 16. Opl., München 2004, S. 631. ISBN 3-437-42350-9
  2. a b Schünke, Michael/ Schulte, Erik/ Schumacher, Udo: Kopf und Neuroanatomie. Prometheus - LernAtlas der Anatomie, Stuttgart/ New York 2006, S. 246f. ISBN 3-13-139541-9
  3. Töndury, Gian/ Kubik, Stefan: Gestalt und Gliederung des Gehirns, in: Leonhardt, Helmut et al. (Rgv.): Rauber/ Kopsch. Anatomie des Menschen, Lehrbuch und Atlas, Bd. 3: Nervensystem, Sinnesorgane, Stuttgart/ New York 1987, S. 124. ISBN 3-13-503501-8
  4. a b Töndury, Gian/ Kubik, Stefan/ Krisch, Brigitte: Hirnhäute und Hirngefäße, in: Leonhardt, Helmut et al. (Rgv.): Rauber/ Kopsch. Anatomie des Menschen, Lehrbuch und Atlas, Bd. 3: Nervensystem, Sinnesorgane, Stuttgart/ New York 1987, S. 206. ISBN 3-13-503501-8
  5. a b Trepel, Martin: Neuroanatomie. Struktur und Funktion, 3. Opl., München/ Jena 2004, S. 261f. ISBN 3-437-41297-3
  6. Bechmann, Ingo/ Nitsch, Robert: Zentrales Nervensystem, Systema nervosum centrale, Gehirn, Encephalon, und Rückenmark, Medulla spinalis, in: Fanghänel, Jürgen et al. (Rgv.): Waldeyer. Anatomie des Menschen, 17. Opl., Berlin/ New York 2003, S. 446. ISBN 3-11-016561-9