De Arteria brachialis (Böverarmarterie) is de Arterie, de den ganzen Arm mit Blood versorgt. Se liggt as Foortsatz vun de Arteria axillaris in’n Sulcus bicipitalis medialis, dat heet an de Binnensiet vun’n Bizeps an’n Böverarm. In’n wieteren Verloop deelt se sik bi’n Minschn ünner dat Ellbagengelenk in de Arteria radialis un de Arteria ulnaris för’n Ünnerarm. Bi de Huusdeerten föhrt dorvun an’n Ünnerarm de Arteria interossea communis af un warrt denn as Arteria mediana betekent.

Anatomie vun’n Böverarm. In root de Arteria brachialis.

De Arteria brachialis warrt medial un lateral vun Nerven flankeert, de to’n medialen oder lateralen Faszikel vun’n Plexus brachialis höört. Medial sünd dat Nervus medianus un Nervus ulnaris, as ok to’n Anfang Nervus cutaneus antebrachii medialis un Nervus cutaneus brachii medialis. Lateral vun de Arterie liggt ünner den Bizeps de Nervus musculocutaneus.

Gliek to Anfang gifft de Arteria brachialis en Kollateraal af, de Arteria profunda brachii, de tosamen mit den Nervus radialis un ganz to Anfang den Nervus axillaris vun’n achteren Faszikel vun’n Plexus brachialis achtern twüschen den medialen un den lateralen Andeel vun’n Musculus triceps brachii in’n Sulcus nervi radialis löpt. Dorbi kamt se baven vun’t Ellbagengelenk wedder na vörn un liggt denn twüschen den Musculus brachialis un den Musculus brachioradialis. In’n Ellbagen löpt dat Blood vun de Arteria profunda brachii över dat Fattnett üm den Ellbagen (Rete articulare cubiti) rüm wedder mit dat vun de Arteria brachialis tosamen. De Kollaterale reckt aver nich, üm den Arm duersom alleen to versorgen, wenn de Arteria brachialis verleggt is.

An de Siet vun de Arteria brachialis löpt de toordent Vena brachialis.