Arteria centralis retinae

De Arteria centralis retinae (ok as Zentralarterie vun’t Oog betekent), is en Bloodfatt. In Wohrheit is dat gor keen Arterie, man en Arteriool.

Se hett ehrn Born in de Arteria ophthalmica un löpt denn in’n Kieknerv (Nervus opticus) bit na de Papill („blinden Plack“), woneem se sik tomeist in veer Twiegen opdeelt. Se is en Endarterie un tostännig för de Versorgen vun de binneren Schichten vun de Netthuut mit Suerstoff un Nehrstoffen. De buteren Schichten vun de Netthuut un sünners de Fotorezepters warrt över dat Fattsystem vun de Aderhuut (Choroidea) spiest.