Arteria suprascapularis

De Arteria suprascapularis (vun lat.: supra „över“ un scapula „Schullerblatt“; synonym ok: Arteria transversa scapulae) is en arteriell Bloodfatt, dat ut’n Truncus thyrocervicalis vun de Arteria subclavia aftwiegt.

Slagadern vun’n Hals: De A. suprascapularis twiegt ut de Tr. thyrocervicalis af

Verloop ännern

De A. suprascapularis löpt toeerst över den Musculus scalenus anterior un den Nervus phrenicus un ünner de Lamina praetrachealis vun de Halsfaszie na kaudal un lateral. Se warrt dorbi vun’n Musculus sternocleidomastoideus afdeckt. Dorna krüüzt se de A. subclavia un den Plexus brachialis un tütt achter dat Slötelbeen un den Musculus subclavius wieter na lateral to’n böveren Rand vun’t Schullerblatt. Op den Weg krüüzt de Ader den ünneren Muskelbuuk vun’n Musculus omohyoideus. Hier twiegt de Ramus acromialis af, de na’n Rete acromialis löpt, en Fattnett vun de Schullerhööch (Acromion).

Bi’t Schullerblatt ankamen, verlöpt de Arteria suprascapularis över dat Ligamentum transversum scapulae superius, dat de Arterie vun den gliek nöömten Nerv, den Nervus suprascapularis, scheedt, in de Fossa supraspinata (Bövergradengruuv). Hier liggt se twüschen den Knaken un den Musculus supraspinatus, de vun ehr över eenige Twiegen mit Blood versoorgt warrt.

Vun dor teht de Arteria, de Vena un de Nervus suprascapularis gemeensom dör de Incisura spinoglenoidalis, wat in Insnitt twüschen de Basis vun de Schullerblattgraat (Spina scapulae) un den Schullerblatthals (Collum scapulae) is, in de Fossa infraspinata (Ünnergradengruuv). Dor billt de Arteria suprascapularis Anastomosen mit de Arteria circumflexa scapulae, en Twieg vun de Arteria subscapularis, un mehrfack mit de Arteria transversa colli.

Wietere Twiegen vun disse Arterie vünd de Ramus suprasternalis un de Ramus acromialis

Funkschoon ännern

De Arteria suprascapularis hett to Opgaav, den Musculus sternocleidomastoideus, den Musculus subclavius, de Musculi supraspinatus un infraspinatus as ok Delen vun de Clavicula, vun’t Acromioclavicularlidd un vun’t Schullerlidd mit Blood to versorgen. De Huuttwiegen nehrt Delen vun de Huut in’t bövere Bostrebeet un över’t Akromion (Schullerhööch).

Literatur ännern

  • J. Fanghänel (Rgv.): Waldeyer Anatomie des Menschen. de Gruyter 2003, 17. Oplaag, S. 883. ISBN 3-11-016561-9