Arteria temporalis superficialis

De Arteria temporalis superficialis („bavenflachlich Dünnenslagader“) is de letzte Aftwiegen vun de buteren Halsslagader (Arteria carotis externa) un dormit en arteriell Bloodfatt in’n Kopp.

Na ehr Aftwiegen löpt de A. carotis ext. as Arteria maxillaris („Böverkeevarterie“) wieter, wieldat de Arteria temporalis superficialis vör’t Ohr na de Dünn hoochlöpt, üm de bövere Kopphälft mit Blood to versorgen. Nipp un nau vör dat Ohr baven vun’n Jückbagen kann an disse Arterie de Puls föhlt warrn. Blangen de Arterie loopt de glieknöömte Veen (Vena temporalis superficialis) un de Nervus auriculotemporalis.

Sünners öllere Minschen leedt mitünner an en Sweren vun de Dünnenslagader (Arteriitis temporalis).

Aftwiegen ännern

Vun de Arteria temporalis superficialis gaht mehrere Twiegen af:

De Arteria transversa faciei („dweerlopen Gesichtsslagader“) löpt ünner’n Jückbagen över’t Gesicht tosamen mit Twiegen vun den Nervus facialis. Se versorgt de Ohrseverdrüüs, den Musculus masseter un de Huut vun’t Gesicht. Se hett vele Anastomosen to de Gesischtstwiegen, de vun de Arteria maxillaris un de Arteria facialis afgaht. Bi Schaap un Zegen is disse Slagader de Hööftversorgen för’t Gesicht, wieldat se keen Arteria facialis utbilln doot. Bi de Peerd warrt se to’n Afnehmen vun arteriell Blood nahmen.
De Arteria temporalis media („middlere Dünnenslagader“) geiht baven den Jückbagen af un versorgt den Muscukus temporalis.
De Ramus zygomaticoorbitalis („Jückbeen-Ogenhöhlen-Twieg“) kummt mitünner ok ut de A. temporalis med. togang un löpt na’t Rebeet vun de Ogen. Dor versorgt de den Musculus orbicularis oculi un de Ogenliders.
De Rami auriculares anteriores („vördere Ohrentwiegen“) versorgt de vörderen Delen vun de Ohrmussel un den buteren Höörgang.
De Ramus frontalis („Steerntwieg“) is een vun de beiden Endtwiegen. De löpt na’t Steernrebeet.
De Ramus parientalis („Scheedtwieg“) tütt na’t Rebeet vun’n Scheed.

Literatur ännern

Gille, U.: Herz-Kreislauf- und Abwehrsystem, Angiologia. In: Salomon, F.-V. u. a. (Rgv.): Anatomie für die Tiermedizin. Enke-Verlag, Stuttgart 2004, S. 404–463. ISBN 3-8304-1007-7