Bam
Bam (pers'sch بم) is ene Stadt in de Provinz Kerman in'n Süüdoosten vun den Iran. Se hett so wat 100.000 Inwahners (Stand 2004).
Historie ännern
De vun de Sassaniden an ene Oaas grünnte Stadt besetten 642 de Arabers. Üm un bi 650 boen se de Hazrat-e-Rasul-Moschee un in't 10. Johrhunnert de Zitadell Arg-é Bam. Se is ut Lehmtegels boot un leeg an de ole Siedenstraat.
De Zitadell hett de UNESCO an'n 27. Dezember 2004 bi ene fierliche Zeremonie to'n Weltkulturarv verkloort. Dormit schall de Wedderopbo vun de Festungsanlaag sekerstellt un stütt warrn.
Eerdbeven ännern
An’n 26. Dezember 2003 üm 1:56 UTC (5:26 Lokaltiet) sünd de Zitadell un so wat 70 Perzent vun de hüdige Stadt Bam dör en Eerdbeven tweegahn. Siene Stärk weer 6,6 op de Momentenmagnitudenskala. Offiziell sünd 30.000 Minschen dör dat Beven dood bleven, na Angaven ut de Inwahnerschop vun Bam weren dat sogor 60.000 Minschen.
An’n 21. Juli 2004 schüddel en Eerdbeven vun de Ruumbülgenmagnitude mb4,2 de Stadt op en ne’et dör. Vele Hüüs, de na dat eerste Beven nee opricht worrn sünd, sünd dorbi wedder tweegahn.
För den Wedderopbo harr de internatschonale Gemeenschop Bam 1,1 Milliarden US-Dollar toseggt, de aver ok lang na dat Beven noch nich vull utbetahlt weren.
Verkehr ännern
De Stadt is över Feernstraten mit de Städer Kerman un Sahedan verbunnen.
Geografie ännern
De Stadt liggt op en Hööch vun 1100 Meter över dat Meer wat süden de Wööst Lut. Dat Klima is warm un dröög.