Bargslag
En Bargslag warrt dorto seggt, wenn en grötteren ünnereerdsch Hollruum flach ünner de Eerdbavenflach instörten deit. Se stellt en sünnere Oort vun Eerdbeven dor.
De fakenste Oorsaak för Bargsläg is dat Ingriepen vun’n Minschen in dat Steenföög binnen de Eer dör den Bargbo. Dat sünd denn tomeist künstlich anleggte Stollen, de in sik tohopenbreken un instörten doot. Liekermaten künnt aver ok natürliche Hollrüüm Utlöser för en Bargslag wesen. Natürliche Höhlen kamt dör dat Utwaschen vun lösliche Mineralen dör Water tostannen, as to’n Bispeel bi Soltstöck oder Draapsteenhöhlen.
De Stärk vun Bargsläg hangt vör allen dorvun af, wo groot de Hollruum wesen is, de dör dat Inbreken vun’n Deeksteen vullfüllt warrt. Bi’t Instörten vun wiete, grote Höhlen, künnt ok starke Erschüttern utlöst warrn, de in de Ümgeven as swach Eerdbeven wohrnahmen warrn kann. De opstunns starkste dör den Bargbo utlöste Bargslag weer an’n 13. März 1989 bi’t döringsch Völkershusen. Dat Beven, wat dordör utlöst worrn is, künn bit to 300 km wiet föhlt warrn un harr en Lokalbevenmagnitude ML=5,6. En annern Bargslag mit de Magnitude ML=5,5 is an’n 11. September 1996 bi Teutschenthal passeert.