Bermudas

Dit Woort hett noch annere Bedüden: kiek dorför ünner Bermuda.

Bermudas oder Bermuda-Boxen (ok: Bermuda-Büxen) is en sunnerliche Aart vun korte Box, as de hüdigendags för Mannslüde un Froenslüde in Alldag un Freetied ganz begäng is. Dat Been geiht dor bit knapp boven dat Knee oder geiht dor ok en beten överweg.

Polizist up de Bermuda-Inseln mit Bermudas

Twee Brittsche Offzieren, Brooke-Popham un Wavell, in'n Tweeten Weltkrieg

Ehren Naam hefft düsse Boxen vun dat Eiland Bermuda, wat en vun de Brittschen Överseekuntreien is. Dor weert se as ganz normolen Antog for Mannslüde bi de Arbeit ankeken. Se sünd dor ut en Stoff maakt, wie he sünst bi Antöög nahmen warrt un weert antrocken tosamen mit Kneestrump, Hemd un Slips. De „Original“-Bermudas gaht so bit 5 cm boven dat Knee. In Europa un in Noordamerika weert unner den Naam „Bermudas“ hüdigendags ok Boxen verhökert, de över dat Knee rutlangen doot un de bannig bunt un ut Jeans-Stoff maakt sünd. Vundeswegen kann vundagen nich mehr so akraat unnerscheden weern twuschen „Bermudas“ un normole Shorts.

Upkamen sünd de Bermudas bi de Royal Navy. Dor hefft düsse korten Boxen bi Operatschonen in de Tropen oder in'e Wööst to de Uniform tohöört un höört dor noch to. Later hett ok de Landmacht in dat Vereenigte Königriek düssen Bruuk övernahmen. Wohrschienlich is düsse Mode denn up Bermuda an'n Anfang vun dat 20. Johrhunnert vun Geschäftslüde övernahmen wurrn.

Weblenken

• Bermuda shorts up "Bermuda Online" vun de Royal Gazette.