Beverly Hills Cop II

Filmdaten
Plattdüütsch Titel:
Originaltitel: Beverly Hills Cop II
Düütsch Titel: Beverly Hills Cop II
Produkschoonsland: USA
Johr vun’t Rutkamen: 1987
Läng: 100 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Tony Scott
Dreihbook: Larry Ferguson
Warren Skaaren
Daniel Petrie Jr. (Figuren)
Produkschoon: Don Simpson
Jerry Bruckheimer
Musik: Harold Faltermeyer
Kamera: Jeffrey L. Kimball
Snitt: Chris Lebenzon
Michael Tronick
Billy Weber
Szenenbild: James J. Murakami
Dorstellers

Beverly Hills Cop II (op platt so veel as: „Polizist vun Beverly Hills II“) is de Titel vun en US-amerikaansche Actionkummedie ut dat Johr 1987 mit Eddie Murphy in de Hööftrull. Dormit geiht de Geschicht um den Polizist Axel Foley wieter, de mit Beverly Hills Cop in’t Johr 1984 to sehn weer, en drüdden Deel is 1994 dreiht worrn.

Inholt ännern

In Beverly Hills, Kalifornien warrt över de so nöömten „Alphabetverbreken“ snackt. An den Daatoort warrt jümmer en Breef mit en verslötelten Text torüch laten, de ut en Reeg vun Tallen besteiht. Bi’t Ermiddeln geht dat nich recht vöran. Dorto kummt, dat ok de ne’e Polizeibaas, Harold Lutz, Dör’nanner dorin bringt, vunwegen dat he sik bi den Börgermeester anklaien will. As Andrew Bogomil, de intwüschen Captain vun’t Beverly Hills Police Department worrn is, Taggart un Rosewood op egen Fuust Ünnersöken in den Fall anstellt, will Lutz dorvun nix weten. He suspendeert Bogomil un versett Taggart un Rosewood na de Verkehrspolizei versett. Kort later warrt Bogomil op apene Straat daalschaten.

Vun dissen Vörfall höört ok Axel Foley in Detroit. He stickt sülvst in en wichtigen Fall un schall sien Baas Chief Todd Resultaten bringen, liekers maakt he sik foorts op’n Weg na Beverly Hills, üm sien Frünnen Taggart un Rosewood to hülpen de Alphabetverbrekers to kriegen. Al korte Tiet later finnt se en hitte Spoor: Bi de Alphabetverbreken sünd rore Patronenhülsen funnen worrn, de sünners maakt weern. Dat föhrt jem na’n Beverly Hills Shooting Club, en Scheetvereen, de in’n Besitt vun den Industriellen Maxwell Dent is.

In’n Verloop vun de Ünnersöken wiest sik, dat de Verdacht richtig weer un Dent achter de Verbreken stickt. Dent will mit dat Geld ut de Roven Wapen köpen, de he dorna mit veel Gewinn in’t Utland wieterverköpen will. De Kood in de Brefen harr blots den Sinn, Charles Cain, de Dent sien Scheetclub managen deit, as Verantwoortlichen vun de Överfäll un dormit as Hööftdäder dortostellen. Ünnerstütt warrt Dent dorbi vun sien persönlichen Helpersche un Leeftsen Karla Fry. Foley, Rosewood un Taggart künnt nix mehr gegen den letzten un wichtigsten Överfall doon, man dör en Henwies, op den Bogomil kort vör den Anlsag op em kamen is, is jem dat mööglich Dent un sien Mackers op de Öölfeller vun den Industriellen hoochtonehmen. Dent sülvst warrt dorbi vun Foley doodschaten, worophen Karla op em daal geiht. Jüst as se afdrücken will, warrt ok se vun Taggart doodschaten.

As nu de Börgermeester un de Polizeibaas Lutz kamt, geiht Lutz glieks wedder op sien Bedeensteten los. Man ditmol ahn Spood: Taggart un Rosewood bringt klore Bewiesen för Dent sien Schuld. De Börgermeester sett Lutz dorophen an de frischen Luft. Den sien Steed warrt an’t Enn vun Bogomil innahmen, de intwüschen wedder gesund is. Foley – in Beverly Hills as Held fiert – hett in Detroit nu aver wedder all Hannen full to doon.

Kritik ännern

  • Dat Lexikon vun’n internatschonalen Film meen, dat de Film op den Hööftdorsteller Eddie Murphy tosneden weer un den Konstellatschonen vun Perosnen un Geschicht ut den Vörgängerfilm to’n gröttsten Deel övernimmt. Schicke Biller un en Ümfeld vun Luxus staht in’n Vördergrund, de kriminalistische Logik blifft dorachter torüch.[1]
  • Desson Howe schreev in de Washington Post vun den roren Fall, dat de Film jüst so goot weer as sien Vörgänger, wenn nich sogors beter[2].
  • Roger Ebert kritiseer dorgegen in de Chicago Sun-Times, dat de Film nich witzig weer. He meen, dat de Figur Axel Foley nich sympathisch speelt weern, man blots arrogant un luut. Dat Dreihbook bestünn sien Ansicht na ut Standardszenen, de tohopenmengeleert weern[3].

Utteken ännern

Beverly Hills Cop II weer tosamen för acht Filmpriesen vörslahn, dorünner ok eenmol för den Oscar in de Kategorie Best Leed för dat Leed Shakedown. Uttekent weer de Film opletzt mit söss Priesen:

Anners wat ännern

In de Wahnung vun Rosewood sünd verschedene Filmplakaten to sehn vun Rambo: First Blood Part II un Cobra – beids Filmen mit Sylvester Stallone in de Hööftrull. Dat speelt dorop an, dat Stallone in’n eersten Deel egentlich Axel Foley spelen schüll. He weer denn aver dör Murphy uttuuscht, vunwegen dat he mit de plaanten Actionszenen för de Produzenten to düür worrn is. Grote Deelen vun dat för em anpasste Dreihbook hett Stallone naher för Cobra bruukt, för dat he sülvst dat Dreihbook maakt hett. Brigitte Nielsen, de in dissen Film mitspeelt weer to de Tiet mit Stallone verheiraat.

In een Szeen as Capt. Bogomil bi Axel Foley anröpt deit de an’n Apparat so, as wäär he en Anroopanterer. In de Originalfaten bruukt Foley dor en Süüdstaten-Akzent un gifft sik as George „Kingfish“ Stevens ut, wat in’n US-amerikaanschen Ruum en bekannte Rull vun den Schauspeler Tim Moore ut de Feernsehreeg Amos ’n’ Andy is. In de düütschen Faten is dor Michael Jackson ut maakt worrn.

Sien Speelfilm-Debüt hett Chris Rock in dissen Film. He speelt den Park-Dener vör Playboy Mansion. Playboy Mansion is wohrhaftig dat Gewees vun den Playboy-Grünner Hugh Hefner, de in den Film ok sülvst to sehn is un sik sülvst speelt.

Borns ännern

  1. Filmkritik in’t Lexikon vun’n internatschonalen Film, afropen an’n 7. März 2013
  2. Kritik vun Desson Howe, Washington Post vun’n 22. Mai 1987; afropen an’n 7. März 2013
  3. Kritik vun Roger Ebert, Chicago Sun-Times vun’n 20. Mai 1987; afropen an’n 7. März 2013

Weblenken ännern