Bushido (egentlich : Anis Mohamed Youssef Ferchichi; * 28. September 1978 in Bonn), ok bekannt ünner sien Ökelnaam Sonny Black is een düütsch-tuneesischen Rapper ut Berlin. Sien Aart vun’t Uptreden hett he sik bi de amerikaanschen Gangsta Rappers afkeken.

Bushido (bi en Konzert Anfang 2006)

Leben un Karrier

De Künstlernaam „Bushido“ stammt ut de Japaansche Spraak un bedutt „Den Krieger sienen Weg“ (kiek nah bi Bushidō). Bushido is vun siene düütsche Mudder alleen uptagen wurrn. Mit sienen Vadder ut Tunesien hett he keen Kontakt harrt. Upwussen is he in Berlin-Tempelhof. Dor güng he ok up’t Gymnasium, man nah den 11. Johrgang hett he de School verlaten.

Vunwegen dat he fökener mit dat Gesett öber de Middel to’n Bedoven tohopenstott is un vunwegen „Kaputtmaken“ keem he vör Gericht. Dor möss he sik öberleggen, ob he in’t Jöögdgefängnis woll oder ob he sik leber up den Staat sien Kosten to’n Maler un Lackerer utbillen laten woll. He hett denn de Lehr maakt. Dor lehr he sienen latern Macker Fler kennen.

To’n Hip-Hop is Bushido dör dat Spröhen vun Graffitis kamen. Ünner den Ökelnaam „Fuchs“ (Voss) hett he bi de Gängs ES (Esoterics) un DMK (Dark Mindz Klique) Biller maalt. Sien Macker Vader(-licious) vun DMK hett em denn nah’n Rap bröcht.

Tohopen mit King Orgasmus One hefft de dree denn een Demotape upnahmen, dat hett den Naam 030 kregen. Mank jem ehr Frünnen un Mackers hefft se dor welk vun verköfft. Man to veel weern dat nich. Toeerst wat bi een richtig Label rutkamen is vun Bushido wat in dat Johr 2000 up dat „Froondokter-Tape“ tohopen mit King Orgasmus. Luv Money Records hett dat rutbröcht. Dat duur nich lang, denn bröch he sien eerst egen Tape rut, dat weer „King of Kingz“. Vunwegen düt Tape hett he nah dat Label Aggro Berlin wesselt, wo he mit Sido, B-Tight un Fler tohopenarbeit’ hett. Bi Aggro Berlin sünd se bi dat Album noch mal digital bigahn un hefft dat denn 2003 in düsse Version noch mal rutgahn laten. 2004 keem dat denn ünner sien egen Laben ersguterjunge noch mal wedder rut. Dor weern dor veer Remixen mit bi un dat Ganze hett den Naam „King of Kingz 2004 Edition“ kregen. 2005 keem dat Album up’n Index un dröff so nich fudder verköfft weern. Nu hett he de Saak noch mal wedder öberarbeit’ un wat softer maakt un tohopen mit een Demotape ünner den Naam „King of KingZ & Demotape- extended version“ in digitalen Tostand rutbröcht.

Lange vördem harr he in dat Johr 2002 ünner sien Ökelnaam „Sonny Black“ dat Album „Carlo, Cokxxx, Nutten“. Dor harr ok sien Fründ Fler bi mitmaakt. Later (2005) hett he ünner densülbigen Ökelnaam ok „Carlo Cokxxx Nutten II“ produzeert. 2003 hett he mit Ilan as Co-Producer sien neegst Soloalbum fardigstellt. Dat weer „Von Bordstein bis zur Skyline“ (Vun’n Bordsteen bit nah de Skyline). Vunwegen dat Musikvideo to den Tidel „Bei Nacht“ (Bi Nacht) un vunwegen dat he bi grötter Hip-Hop-Festivals uptreden dö, schaff he dat mit düt Album up Platz 88 vun de Charts.

Vergleken mit annern düütschen Hip-Hop gellt düt Album as düüster un hart. Dat warrt as Milensteen ansehn in de düütsche Rap-Geschicht.

Vunwegen dat se in Saken vun de Kunst nich öbereen kamen konnen, besünners, wat de tokümstig Solo-Karrier vun den Künstler angüng, hett Bushido in’n Summer 2004 Aggro Berlin verlaten un is bi Urban/Universal Music ünner Verdrag gahn. Dor hett he tohopen mit D-Bo dat Label ersguterjunge upmaakt. In de Midden vun’t Johr produzeer he tohopen mit Ilan in’n Updrag vun Rammstein een Remix vun de ehr Leed „Amerika“. In’n Oktober 2004 hett Bushido denn bi Universal de LP „Electro Ghetto“ rutgahn laten. De is up Platz 6 vun de düütschen Album-Charts kamen. Al an’n 4.April 2005 keem ünner den Ökelnaam „Sonny Black“ dat Album Carlo Cokxxx Nutten II rut. Dat weer de veerte LP binnen twee Johren. Dütmol hett nich sien vörmaligen Macker Fler mitmaakt, man Baba Saad. Dat Album keem noch höger, as Electro Ghetto un lann up Platz 3 vun de Charts.

In’n Winter 2004/2005 speel Bushido een Hööftrull in den Beef üm Eko Fresh ümto un hett dor ok een Disstrack mit Naam „Flerräter“ gegen sienen olen Macker Fler upnahmen. An’n 4. November 2005 keem Bushido sien Album „Staatsfeind Nr. 1“ rut. Dat weer in Linz produzeert wurrn.

Bushido sien neest Soloalbum heet Von der Skyline zum Bordstein zurück un keem an’n 1. September 2006 rut. Dor is keen Feature mit bi un Bushido hett de Saak tomeist süms produzeert. Na 2 Weeken geev dat dor in Düütschland al Gold för.

In Kopenhagen hett Bushido an’n 2. November den MTV Europe Music Award för den Best German Act vun MTV-Moderatersche Mirjam in’e Hannen kregen. Öber de Priesdrägers weer in’t Internet afstimmt wurrn. Upstellt weern ok Rammstein, Silbermond, Die Toten Hosen un Sportfreunde Stiller

De tweede Sampler vun dat Label „ersguterjunge“ mit den Naam „Vendetta“ schall an’n 1. Dezember 2006 rutkamen. Up de Single mit densülbigen Naam weert Chakuza un Eko Fresh featurt.

Striet üm Bushido

Rechtsextremismus

In de Medien warrt Bushido fökener mol vörsmeten, datt he sik nich wiet genug wegstellt vun sien rechtsextremen Fans. Ok schöllt siene Texten nich ganz wiet af vun Nationalismus un Rassismus stahn. Sien Anhängers seggt ober, dat is Dummtüüg, vunwegen datt sien Vadder Afrikaner is un he jümmers mit anner Künstlers tohopenarbeit’, de nich vun Düütschen afstammt, as mit Azad, Eko Fresh un Cassandra Steen. He süms seggt, mit jede Aart vun Rechtsextremismus harr he rein gornix an’n Hoot.

Fiendschup gegen Froonslüüd un Homosexuellen

Faken warrt ok dor öber snackt, dat Bushido Homosexuellen un Froonslüüd rünnermaken deit. In sien Leed „Nutte Bounce“ is dat Schimpwoort „Nutte“ (Punke) dat Woort, wat an’n meisten vörkummt. Wenn he fraagt warrt, seggt Bushido, he meent mit so’n Woort nich all Froonslüde, man bloß de richtigen Slutterdeerns, as Groupies.

Wenn he den Gangbang as een mooi Aart vun Sex henstellt un singt: „Pimmel in’n Mors, Pimmel in’n Mund. Een Pimmel in’e Kutt, nu warrt richtig bummst“ (Ut dat Leed „Gangbang“, dat midderwielen up’n Index steiht) denn seht sien Gegenspelers dat as Sexismus an un smiet em vör, he fodder up, Deerns Gewalt an to doon. In’n November 2005 geev dat grode Öberschriften in de Narichtenbläder, as Bushido in een Interview seggt hett, Paris Hilton, dat weer „man bloß een dumm Stück Fleesch“, dat he geern mal „för den Akt“ hebben dö: „Rünnermaken un denn tschüss“.

Den Bund sien Pröövstell för Schriften, de de Jöögd Tort andoot (Bundesprüfstelle für jugendgefährdende Schriften) glöövt, datt dat een oder anner Leed vun Bushido nich goot is för de Jöögd.

So sütt Bushido toeerst mol ut as een dummerhaftigen, düstern Gangster. Man up de anner Siet maakt he Leeder mit veel Geföhl, as Schmetterling, Hoffnung stirbt zuletzt, Wie ein Engel oder Schau mich an. In den Track Augenblick sett sik Bushido mit dat Verleeren vun sien grode Leev ut’eneen.

In de leste Tiet is dat rutkamen, dat Bushido al siet een poor Johren verheiraat is. An’n 20. Dezember 2005 hett he dat in’t Fernsehen bi „Viva live“ ober afstreden.

Wat vun em rutkamen is

Alben

  • 1998: 030 (nich rutbröcht, as Fuchs mit Vader un King Orgasmus One (as Orgasmus))
  • 1999: Demotape (nich rutbröcht)
  • 2001: King of KingZ (up’n Index)
  • 2002: Carlo, Cokxxx, Nutten (as Sonny Black mit Fler as Frank White)
  • 2003: King Of KingZ [Digital Remastered Version] (up’n Index)
  • 2003: Demotape 1999 (eerste CD, de vun dat Demotape rutbröcht weer, harr een lüttje Uplaag vun 300 Stück)
  • 2003: Vom Bordstein bis zur Skyline (up’n Index) (DE: #87)
  • 2004: King of KingZ 2004 Edition (up’n Index)
  • 2004: Electro Ghetto (up’n Index) (DE: #6)
  • 2005: Carlo Cokxxx Nutten 2 (as Sonny Black mit Saad) (DE: #3)
  • 2005: King of KingZ & Demotape - extended version
  • 2005: Staatsfeind Nr.1
  • 2005: Electro Ghetto (Limited Pur Edition)
  • 2005: Electro Ghetto (Re-Release)
  • 2006: ersguterjunge Sampler (Vol.1) „Nemesis“ (DE: #4)
  • 2006: Deutschland, gib mir ein Mic! (Live-CD/DVD) (DE: #10)
  • 2006: Von der Skyline zum Bordstein zurück (DE: #2, A: #3, CH: #15)
  • 2007: Von der Skyline Zum Bordstein Zurück (Ltd. Platinum Edt.) [Dubbel-CD]
  • 2007: 7
  • 2008: Heavy Metal Payback

Singles un wat süß noch rukamen is

  • 2000: I Luv Money Sampler (Labelsampler, he weer mit een paar Tracks un Produktionen dor mit bi)
  • 2002: Aggro Berlin - Ansage Nr. 1 (Labelsampler, he weer mit een paar Tracks dor mit bi)
  • 2003: Aggro Berlin - Ansage Nr. 2 (Labelsampler, he weer mit een paar Tracks dor mit bi) (up’n Index)
  • 2003: Bei Nacht (Single)
  • 2003: Gemein wie 10 (Single)
  • 2003: Aggro Berlin - Ansage Nr. 3 (Labelsampler, , he weer mit een paar Tracks dor mit bi) (up’n Index)
  • 2004: Gegensätze ziehen sich an (Eko Fresh Feat. Bushido)
  • 2004: Mitten ins Gesicht (Promotrack in Electro Ghetto Player)
  • 2004: Electro Ghetto (Single)
  • 2004: Nie wieder (Single)
  • 2005: Hoffnung stirbt zuletzt (Single, tohopen mit Cassandra Steen)
  • 2005: FLERräter (Freetrack mit Eko Fresh; Fler-Diss)
  • 2005: Nie ein Rapper (Single, Feat. Saad)
  • 2005: Worldwide (Featured-Track, Strapt & Bushido)
  • 2005: Endgegner / Staatsfeind Nr.1 (Single)
  • 2005: Augenblick (Single)
  • 2006: Kein Ausweg (Bushido, Chakuza & Bizzy Montana - as Juice-Exclusive [CD #63])
  • 2006: H.E.N.GZT (Freetrack, Bass-Sultan-Hengzt-Diss)
  • 2006: Gheddo (Eko Fresh Feat. Bushido) (Single) (DE: #15)
  • 2006: Von der Skyline zum Bordstein zurück (Single) (DE: #14)
  • 2006: 11. September (Freetrack)
  • 2006 Sonnenbank Flavour (Single)´
  • 2007: Geben und Nehmen - Nyze feat. Bushido & Chakuza (rutkamen as Video - Internet Exclusive)
  • 2007: Eure Kinder - Chakuza feat. Bushido (DE:#25)
  • 2007: Alles Verloren (Single)
  • 2007: Reich mir nicht deine Hand (Single)
  • 2008: Unter der Sonne - Chakuza feat. Bushido (Single)
  • 2008: Ching Ching (Single)