Cannonball Adderley

Julian Edwin „Cannonball“ Adderley (* 15. September 1928 in Tampa, Florida; † 8. August 1975 in Gary, Indiana) weer en US-amerikaansch Jazz-Altsaxophonist (af 1968 ok Sopransaxophon) in de Periood vun de lütt Combos in de 1950er und 1960er Johren.

Cannonball Adderley - vörn

Leven ännern

Nahdem he Highschool-Band-Leiter in Florida weern weer, gung he 1955 nah New York. He harr vör, in Manhattan wieder to studeeren, aber nahdem he bi Oscar Pettifords Band in dat Cafe Bohemia en Gastupträe harr, wurr de Altsaxophonist gau to en Sensation. Völ hebbt in hüm den neen Charlie Parker sehn. Aber Adderley harr ganz klor en eegen Stil, de vun Benny Carter genauso beinfloot weer as vun Parker. He hett sien fröh Bekanntheit nutzt un sien eerst Quintett grünnd, in dat ok sien jüngerer Bröer Nat Adderley an‘t Kornett mitspeel. Während sück de Grupp finanziell swoor dee, truck Cannonball de Upmarksomkeit vun Miles Davis up sück, de den Saxophonisten Enn‘ 1957 för twee Johr in sien Sextett haalt hett. Dor speel he ünner annern neben John Coltrane (Tenorsaxophon). De bekanntst Upnahm ut disse Tiet is dat in‘ Fröhjohr 1959 upnommen Kind of Blue, een vu de an’n meesten verköfft Alben in de Jazzhistorie. Ut disse Tiet gifft dat aber ok Upnahmen vun dat Miles Davis Sextet ahn Miles Davis. De up fiev Musiker minneseert Combo hett to’n Bispeel dat Album Cannonball Adderley Quintet in Chicago.

Speziell is ok up dat för Blue Note inspeelt Album "Somethin' Else" hentowiesen, dat Miles Davis in de bannig selten Rull vun en Sideman wiest, wat hüm aber nich hinnern dee, en paar Soli bitostüeren, de nich vergeeten wurrn sünd.

In‘ September 1959 hett Cannonball Miles Davis verlaaten un speel weer mit Nat in en Quintett. Blots een Maand later nehm de Band en Live-Upträe in San Franciscos Jazz Workshop up. Ditmal harr de Grupp denn ok kommerziellen Spood. Vör allen hör Version vun dat Stück This Here vun Pianist Bobby Timmons weer spoodriek, un dat Quintett wurr to de führend Grupp vun en Stilrichtung, de man denn bald as Soul Jazz beteken sull. Van 1959 bit 1963 weer dat Quintett bi Orrin Keepnews’ Riverside ünner Verdrag un speel hööftsächlich soulig Interpretatschonen vun Hard-Bop-Stücken. Yusef Lateef hett de Grupp van 1962 bit 1963 to’n Sextett makt. Nahdem Riverside tosommenbraken weer ünnerschreev Cannonball 1963 bi Capitol un sien Upnahmen wurrn wat kommerzieller. Charles Lloyd hett een Johr lang Lateef ersett - allerdings mit weniger Spood.

Anner Liddmaaten vun dat Quintett weern neben sien Bröer Nat Adderley de Pianisten Bobby Timmons, Victor Feldman, Joe Zawinul un George Duke, de Bassisten Sam Jones (1957, 1959-65), Walter Booker bzw. Vic Gaskin as ok Louis Hayes (1959-1965) un Roy McCurdy an’t Slagtüüch. Cannonball harr Hits as This Here von Timmons, den Work Song Nat Adderleys un Mercy, Mercy, Mercy vun Zawinul.

In de laat 60er un in de 70er Johren hett sück Adderley den Fusion towendt. 1968 harr he up dat Album „Accent on Africa“ sien Debüt up dat Sopransaxophon, he speel dat aber nich allto faken. He harr dormit woll en eenzigoordigen un charakteristischen Sound, aber de is nich mit sien voluminöös un dördringend Alt-Sound to verglieken.

Tegen Enn‘ vun sien Leven leet he sien Karriere Revue passeeren: Sien vörletzt Album Phenix enthull de gröttsten Erfolge vun de Adderley-Bröers as Country Preacher, This Here oder Work Song as Fusion-Version un up sien letzt Album Lovers hett he nee un old Frünnen to en Band vereenigt. He is storven noch bevör de an Lovers afslooten weern. De restlich Liddmaaten vun de Band hebbt dat Wark denn tosommen mit Flora Purim (Gesang) mit de vun Adderleys Neffen Nat Jr. schreven Titel Lovers as letzt Verbuugen vör Cannonball Adderley to’n Enn‘ brocht.

Julian Cannonball Adderley hett tietlevens an Diabetes leeden. Sien Ökelnaam „Cannonball“ is allerdings up en Verspreker vun en Mitschöler torüchtoführen. De wull hüm eenig Kannibale nömm, wiel de bannig dick Adderley för sien dörgahn Hunger bekannt weer. Ut „Cannibal“ wurr denn aber „Cannonball“. Vermutlich in Folg vun disse Krankheit un de dorut resulteerend Gewichtsprobleme is Adderley 1975 an en Slaganfall storven, söss Week nah de Upnahm vun sien letzt Album in Gary, Indiana. He wurr up den Süüdkarkhoff in Tallahassee, Florida, begraben.

Ehrungen ännern

Cannonball Adderley wurr 1985 in de Big Band and Jazz Hall of Fame upnommen.

Zitate ännern

“He’s the most underrated musician of the century. Hardly anybody talks about Cannonball, but he was a giant. He was his own guy. He didn’t play like Charlie Parker. He played like no-one else.” (Joe Zawinul, 1997)[1]

Trivia ännern

Cannonball Adderley harr tosommen mit David Carradine un Jose Feliciano 1975 en Upträe in de 55. Folg vun de US-amerikaansch Feernsehreeg Kung Fu.

Up Here Comes Louis Smith (Blue Note, 1958), dat Debütalbum vun den Trompeter Louis Smith, speel he ünner dat Pseudonym Buckshot La Funke.

Upnahmen (Utwahl) ännern

  • Julian Cannonball Adderley - Presenting Cannonball (1955, Savoy)
  • Julian Cannonball Adderley - Same (1956, EmArcy)
  • Julian Cannonball Adderley - Somethin' Else (1958, Blue Note) mit Miles Davis un Art Blakey
  • Miles Davis with Julian “Cannonball” Adderley, John Coltrane, Bill Evans u. a. - Kind of Blue (1959, Columbia CS 8163)
  • Cannonball Adderley Quintet - Live in San Francisco (1959, Riverside) (1999 in de „Grammy Hall of Fame“ aufgenommen[2])
  • Cannonball Adderley Quintet - At the Lighthouse (1960, Riverside)
  • Cannonball Adderley and His Orchestra - African Waltz (1961, Riverside)
  • Cannonball Adderley with Bill Evans - Know What I Mean? (1961, Riverside)
  • The Cannonball Adderley Quintet Plus (1961, Riverside)
  • Cannonball Adderley Sextet - In New York (1962, Riverside) mit Yusef Lateef (ts, fl, Oboe)
  • Cannonball Adderley Sextet - Nippon Soul (1963, Riverside) live in Tokyo
  • Cannonball Adderley Quintet - Mercy, Mercy, Mercy! - Live at "The Club" (1966, Capitol)
  • Cannonball Adderley Quintet - Accent on Africa (1968, Capitol) mit Letta Mbulu
  • Cannonball Adderley Quintet - Country Preacher (1969, Capitol) mit Jesse Jackson
  • Cannonball Adderley - The Black Messiah (1970, Capitol)
  • Cannonball Adderley - Phenix (1974, Fantasy)

Wiedere Literatur ännern

  • David N. Baker: The Jazz style of Cannonball Adderley. A musical and historical perspective. Studio 224, Lebanon, In. 1980
  • Chris Sheridan: Dis here. A bio-discography of Julian "Cannonball" Adderley. Greenwood Press, Westport, Conn. 2000. ISBN 0-313-30240-5

Born ännern

  1. „Joe Zawinul. Man of the people“, innerviews.org, 30. August un 18. September 1997, Interview Zawinuls
  2. Liste der Hall-of-Fame-Aufnahmen

Weblenken ännern

  Cannonball Adderley. Mehr Biller, Videos oder Audiodateien to’t Thema gifft dat bi Wikimedia Commons.