Carl-Uwe Steeb (* 1. September 1967 in Aalen) is en ehmoligen düütschen Tennisprofi.

Karriereverloop ännern

De Linkshänner Carl-Uwe Steeb, de ok „Charly“ nöömt weer, hett 1986 mit sien Profiloopbahn anfungen, dree ohren nadem he de düütsche U-16-Meesterschop wunnen hett. In de Weltranglist vun de ATP hett he 1990 sien beste Positschoon hatt. He weer dormols op’n veerteihnsten Rang. Tosamen hett he in’t Enkelspeel dree Titel wunnen: 1989 in Gstaad, 1991 in Genf un 1995 in Moskau.

Bekannt worrn is Steeb vör allen dör sien Insätz as tweete Enkelspeler in de düütsche Davis-Cup-Mannschop. He hett 1988 in’t Endspeel in’t sweedsche Göteborg den dormoligen Eersten in de Weltranglist, Mats Wilander, na en Torüchstand vun 0:2 na Sätz mit 8:10, 1:6, 6:2, 6:4 un 8:6 wunnen (De Tie-Break in de eersten veer Sätz is eerst een Johr later ok in’n Davis Cup inföhrt worrn). Dorna harr Boris Becker sien Enkelspeel gegen Stefan Edberg wunnen as ok dat Dunnel an de Siet vun Eric Jelen gegen Stefan Edberg un Anders Järryd. Düütschland hett dormit to’n eersten mol in de Historie vun’t Wettstriet den Pokal wunnen.

Ok in’t Johr dorop stünn Steeb wedder mit de düütsche Mannschop in’t Endspeel vun’n Davis Cup. Dat hett in Düütschland in de Hanns-Martin-Schleyer-Hall in Stuttgart stattfunnen. Wedder weer Sweden de Gegner, un to’n tweeten mol sik de düütsche Mannschop dörsetten künnt, liekers dat Steeb sien beiden Enkelspelen gegen Wilander un Edberg verloren hett. Un ok bi’n drüdden un opstunns letzten Sieg bi’n Davis Cup weer Steeb wedder in de Mannschop dorbi, man ditmol as Ersatzspeler.

Steeb keem vör allen mit Sandplätz goot torecht, wobi em sien utermatig gote Physis to go’e keem. Jüst wat Utduer, Knööv, Snelligkeit un de Will to’n Kämpen angüng, stünn he ünner de Mitsportlers jümmer goot dor. Grötteren Spood harr Steeb man vör allen dorüm nich, as he in sien Speel nich noog Techniken afwesseln künn un he bannig vun sien Vörhand afhangen de. Sien Opslag weer Middelmaat, sien Rüchhand weer vergleken mit annere Weltklasse-Spelers ehr ünner’n Dörsnitt. Ok dat Speel an’t Nett leeg em nich so goot.

Na teihn Johren hett Steeb 1996 sien Profiloopbahn opgeven, weer aver vun 1999 bit 2001 as Nafolger vun Boris Becker de Kaptein vun de düütsche Davis-Cup-Mannschop.

Af un to is Steeb bi Tennis-Överdrägen as Ko-Moderater un Fackmann bi Sport1 to sehn, wat he vörher ok af un an al bi’t ZDF maakt harr. 2010 hett he de Charly Steeb GmbH Agentur grünnt, de Sportlers as t. B. Jan Ullrich vermarkten un Sportverstalten organiseeren dee. Enn' August 2013 muss de Firma, ünner anner wegen utblieven Betallen in' Tosommenhang mit de BMW Open 2013, Insolvenz anmellen.[1]

Wegen de Insolvenz vun Steeb sien Firma hett de Bundesutschuss vun den DTB Anfang November 2013 eenstimmig beslooten, sück tietnah vun Steeb as Viezpräsident to trennen.[2]

Publikatschonen ännern

Carl-Uwe Steeb & Markus Hornig: Moving – ab jetzt gesund, Knaur-Verlag, München, 2004, ISBN 3-426-66916-1

Weblenken ännern

Enkeld Nahwiesen ännern

  1. Sven Clausen: http://www.welt.de/sport/tennis/article119351710/Carl-Uwe-Steebs-Firma-muss-Insolvenz-anmelden.html, Carl-Uwe Steebs Firma muss Insolvenz anmelden. welt.de van' 25. August 2013, afropen an' 18. September 2013
  2. Michael Neudecker: http://www.sueddeutsche.de/sport/vizepraesident-des-tennisbundes-alle-gegen-steeb-1.1817030, Alle gegen Steeb, sueddeutsche.de van' 13. November 2013, afropen an' 25. November 2013