Cilly Aussem
Cäcilia „Cilly“ Aussem (* 4. Januar 1909 in Köln; † 22. März 1963 in Portofino, Italien) weer en düütsch Tennisspelerin. Se hett as eerste Düütsche an’ 3. Juli 1931 in en ren düütsch Duell tegen Hilde Krahwinkel den Titel in in dat Daamenenzel in Wimbledon wunnen un weer dormit inoffiziell Weltmeesterin.
Karriere ännern
Traineert wurr Aussem toletzt vun de Tennislegende Bill Tilden, mit de se ok 1930 bi de franzöösch Meesterschapen in’ Mixed wunn. Buterdem wunn se 1931 bi de franzöösch Meesterschapen in’ Daameenzel tegen Betty Nuthall. In dat sülvig Johr wunn Aussem ok de Apen Düütsch Meesterschapen in Hamborg, bi de se ok all 1927 und 1929 spoodriek weer. Ok de Meestertitel vun Öösterriek, Argentinien un Chile kunn se för sück entscheeden.
In de Johren 1930 un 1931 belegg Aussem den tweeten Platz in de Tennis-Weltranglist achter de överragend Amerikanerin Helen Wills Moody. Nah lang, dör Krankheit bedingt Abstinenz vun den Tennisplatz keem se 1934 nochmal up den 9. Platz. 1935 is se in Wimbledon fröh utscheeden un se hett hör Karriere beend. To völ Krankheiten harr se, so dat se nich mehr so good Tennis spelen kunn.
Leven ännern
Se weer de Dochter vun en riek Kölner Koopmann. Up Bedrieven vun hör Moder Helen hett se mit 14 Johren Tennisspelen lehrt. Se wurr Liddmaat in de Vereen KTHC Stadion Rot-Weiss, Köln. Se traineer ünner annern ünner Roman Najuch un Willy Hannemann, de hör 1927 to’n Gewinn vun de Düütsch Meesterschap führen dee. Bi en Süüdamerika-Reis kreeg se Enn’ 1931 en swoor Lever-Erkrankung, de later ok Grund för de Beendigung vun hör Karriere weer. Anner Erkrankungen keemen dorto, besünners mit hör Oogen harr se bannig Probleme.
1936 hett se in München den italieenschen Diplomaten Graf Fermo Murari dalla Corte Brà heiraadt. Mit hüm truck se nah Somalia, later nah Portofino. Dor is se denn 1963 – intüschen meest völlig blind - nah en Leveroperatschoon storven.
Würdigung ännern
To hör Andenken wurr de Mannschapsmeesterschapem vun de Juniorinnen vun de Düütschen Tennisbund siet 1965 Cilly-Aussem-Spiele nömmt. An’ 5. Mai 1988 keem en Breefmark mit dat Bild vun Cilly Aussem vun de damalige Düütsch Bundespost rut. Wiederhenn wurr se 2008 in de neegrünnd Hall of Fame vun den Düütschen Sport upnommen.
Literatur ännern
"Ich war ein Wunderkind - das Leben der ersten deutschen Wimbledon-Siegerin" von Bernd Tuchen, Shaker Verlag, Aken 2008