Etienne De Wilde (* 25. März 1958 in Wetteren) is en ehmalger belgisch Radrennfohrer un Bahnradfohrer.

Etienne De Wilde weer van 1980 bit 2001 as Profi-Rennfohrer, vör allen up de Radrennbahn tätig. He hett an all tosommen 197 Sössdaagrennen deelnommen, vun de he 38 winnen kunn un dorvan 13 tosommen mit den düütschen Rennfohrer Andreas Kappes. Dat is gliekbedüüdend mit Platz 7 vun de „Ewige Sössdaag-Ranglist“.

1993 wurr De Wilde Weltmeester in’t Punktefohren, 1998 gemeensam mit Matthew Gilmore Weltmeester in’t Twee’er-Mannschapsfohren. Bi de Olympisch Spelen in Sydney in dat Johr 2000 wunn he gemeensam mit Gilmore de Sülvermedaille in’t Twee’er-Mannschapsfohren.

Etienne De Wilde weer aber ok bi Straatenrennen spoodriek. So wunn he 1980 den Grand Prix d’Isbergues, 1983 Dwars dör Flannern, 1987 den Nokere Koerse un den Grand Prix Scheldeprijs, 1989 den Omloop Het Volk, de Kampioenschap van Vlaanderen un den Étoile de Bessèges as ok 1990 den Grand Prix d’Ouverture La Marseillaise. Dreemal hett Etienne De Wilde dat Rennen Omloop van het Houtland wunnen, wat en Rekord is, de he sück mit twee anner Rennfohrers deelen deiht. He is ok veermal bi de Tour de France antreden. Tüschen 2988 un 2992 kunn he dorbi twee Deelstrecken winnen, keem aber ansonsten blots up achtere Platzen in’t Teel.

Weblenken ännern