Dit Woort hett noch annere Bedüden: kiek dorför ünner Fork (Software).

De Fork oder ok Greep is en Warktüüch, dat in de Bueree oder ok in’n Goorn veel bruukt warrt. De Fork besteiht ut en langen Greep mit iesern Tinnen (oder Stahltinnen) vörn an.

En ole Fork, de noch ganz ut Holt maakt is

Formen vun de Fork:

  • Haufork, dree Tinnen (gifft ok welk mit blot twee Tinnen), för dat Vörgeven vun Hau un Grassilo to’n Bispeel, Forken för Grassilo sünd aver faken noch en beten massiver boot as de Forken för dat temlich lose Hau,
    • en besünnere Form vun de Haufork is de Stakelfork, de en langen Greep hett, dat een dat Hau dor mit op’n Böhn oder op’n Ackerwagen forken kann,
  • Messfork, veer Tinnen (gifft ok welk mit fief Tinnen), för’t Utmesten,
    • en besünnere Form vun de Messfork is de Messhaken, de ok veer Tinnen hett, de aver in’n rechten Winkel afbagen sünd, brukt ward de toon Afhaken vun'n Meßwagen. Dormit wern lütte Humpen makt, de denn mit de Meßfork ut'n ein smeten wören,
  • Maisfork, söss Tinnen (köönt ok mehr wesen), för dat Vörgeven vun Maissilo to’n Bispeel,
  • Kartuffelfork, acht, negen un noch mehr Tinnen, de vörn lütte Gnubbels hebbt un nich spitz sünd, dat een de Kartuffeln nich opspießt,
  • Rövenfork, söss Tinnen, extra stabil, mit so welke Gnubbels wie an de Kartuffelfork,
  • Steenfork, twölf un mehr Tinnen, toon Steen tohoop kleien op'n Acker,
  • Graavfork, veer Tinnen, wat massiver boot, warrt mehr in’n Goorn to’n Graven bruukt,

Dör de spitzen Tinnen is de Fork ok en Born för Arbeidsunfäll in de Bueree. Fröher hebbt de Buurn de Fork aver ok as eenfache Wapen bruukt, de nich veel kösten deen, wenn se sik mal verdedigen müssen.

Weblenken ännern

  Forken. Mehr Biller, Videos oder Audiodateien to’t Thema gifft dat bi Wikimedia Commons.