Glenmorangie
Glenmorangie [ɡlɛnˈmɔrəndʒi] is en Whisky-Brenneree in Tain in de nöördlichen Highlands von Schottland.
| Glenmorangie | |
|---|---|
 De Brenneree Glenmorangie | |
| Land | Schottland |
| Region | Highlands |
| Tyyp | Malt |
| Status | aktiv |
| Besitter | Moët Hennessy Louis Vuitton |
| Grünnt | 1843 |
| Grünner | William Matheson |
| Waterborn | Borns in de Tarlogie Hills |
| Washstill(s) | 8 × 11.400 l |
| Spiritstill(s) | 8 × 8.200 l |
| Produkschoonsvolumen | 9.000.000 l |
| Websteed | www.glenmorangie.com |
Historie ännern
Nawiesen över dat (verbodene) Brennen vun Whisky in Tain reckt wiet torüch bi in de Tiet üm 1700. Op legalen Weg warrt aver eerst siet 1843 Whisky destilleert, siet de Bröder Matheson de Glenmorangie-Brenneree grünnt hebbt. In de Bowarken vun de Destille weer vörher en Broeree ünnerbröcht. Al 1880 künn de Brenneree Whisky na Italien un in de USA utföhren, 1883 müss de olle Brenneree aver nee opboet warrn. Veer Johren later weer de Glenmorangie Distillery Co. Ltd. grünnt. Dat Ünnernehmen bleev bit 1918 in de Hand vun de Familie Matheson. Wegen den Eersten Weltkrieg güng de Produkschoon denn aver torüch un de Brenneree weer an MacDonald & Muir verköfft. In de Tiet vun 1931 bit 1936 as ok vun 1941 bit 1944 weer de Brenneree dichtmaakt.
Glenmorangie harr groten Spood un müss dorüm sien Produkschoon mehrmols vergröttern. 1980 weern twee ne’e Brennblasen inboet, 1990 noch mol veer, so dat vundaag mit acht Brennblasen produzeert warrt. Op’n schottischen Markt is de Marke de, de an’n fakensten verköfft warrt. Siet Oktober 2004 höört dat Ünnernehmen to de Grupp Moët Hennessy Louis Vuitton (LVMH), de den Andeel vun de Familie McDonald övernahmen hett. De Familie harr sik na 161 Johren ut dat Whisky-Gewarf torüchtogen. To de eegentliche Brenneree in Tain höört to de Glenmorangie PLC ok noch de Brenneree Ardbeg op Islay, de 1997 övernahmen weer.
En Grundsatz, de sik bit hüüt hollen hett, sünd de 16 Men of Tain. Dat heet, dat in de Destille Glenmorangie jümmer nipp un nau sössteihn Lüüd arbeiten schüllt. In de hüütige Tiet betütt sik dat aver blots noch op de eegentliche Produkschoon vun’n Brennvörgang. Alltohopen sünd in de Destille ruchweg 90 Lüüd anstellt, de deelwies in’n Laden, in’t Lager oder in de Verwaltung arbeit. Butendem is ünner de „16 Men of Tain“ intwüschen ok een Fro.
Produkschoon ännern
Glenmorangie höört to dat schottische Whiskyrebeet Highlands un betütt sien Water för de Produkschoon ut Borns in de Tarlogie Hills. Dat Molt, dat för den Whisky as Grundlaag deent, warrt vundaag nich mehr sülvst maakt. Liekers warrt bi’n Inkoop dorna keken, dat dat Molt vun Gassen ut dat Rebeet stammt. Bito schall dat Molt blots ’n beten Törfrook hebben. Dat sünnere an de Destille sünd de Brennblasen: mit en Hööch vun tosamen acht Meter un 5,14 m över de Brennblaas sünd bi Glenmorangie de hööchsten Brennblasen vun all schottischen Brennereen in Bedrief. De Whisky warrt dordör sünners mild. Brennt warrt mit veer wash stills to 11.400 l un veer spirit stills to 8.200 l.
Kiek ok ännern
Literatur ännern
- Ralf Bernhardt, Hans Georg Würsching: The Glenmorangie Single Malt Whisky Collector’s Guide. Cluaran, Einhausen 2005, ISBN 3-9809344-3-8.
- Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
- Walter Schobert: Das Whiskylexikon. Fischer Taschenbuch Verlag, Frankfort an’n Main. 2003, ISBN 978-3-596-15868-3.
Weblenken ännern
Koordinaten:57° 50′ N, 4° 5′ W