Jacobs University Bremen

De Jacobs University Bremen, (vörmalig International University Bremen (IUB). Vunwegen een grode Spenn vun de Jacobs Foundation in Zürich is de Naam ännert wurrn) is een Privatuniversität in Bremen-Grohn. Se is in dat Johr 1999 vun de Stadt Bremen, de Universität Bremen un de Rice-University ut Houston, Texas (USA) grünnt wurrn.

Dat Logo vun de Universität

Präsidentsche vun de International University is, vun den 10. Februar 2014 af an, Katja Windt. Vördem weer Heinz-Otto Peitgen Baas, man de harr an'n 6. November 2013 vor de Tied Bott geven. Dorvör weer Prof. Dr. Joachim Treusch Präsident. He harr an’n 1. Juli 2006 dat Amt vun Dr. Fritz Schaumann öbernahmen. Vörsitter vun dat „Board of Governors“ is vun den 1. Januar 2005 af an Prof. Dr. Theodor Berchem.

Inschreben sünd in’n Momang (September 2006) 1.000 Studenten ut 86 Nationen (618 Bachelor- un 382 Master- Studenten). An de Uni lehrt 102 Professors, sünst sünd dor noch 164 anner wetenschuplich Mitarbeiders bi.

De Campus vun de University liggt up dat Land vun de vörmalig Roland-Kasern in Bremen-Grohn.

Wat een studeeren kann ännern

Up de International University kann een Ingenieurwesen, Naturwetenschop, Wetenschoppen vun den Geist un Sozialwetenschoppen studeeren. Dat gifft 16 Bachelor-Studiengäng un 14 Master-Studiengäng. De Spraak vun den Unnerricht is Engelsch.

Wat dat Studeeren kosten deit ännern

Een Bachelor-Studium köst 15.000.- Euro in’t Johr. Bi een Master-Studium sünd dat 20.000 Euro. Een Probleem is, dat veel Studenten düt Geld nich betahlen könnt un dorüm Stipendien vun de University kriegt. Bi de Utwahl vun de Studenten warrt vör allens dor up keken, wat de Lüde könnt, un nich up jem ehr Geld. Man up düsse Aart kümmt nich so veel Geld in de University rin, as de bruken deit to’t Ünnerholen vun so’n düürn Appraat as’n Universität. Toschüss vun’n Staat scholl dat anunforsik nich geven, hett dat denn aber man doch jümmers geven.

Scholen ännern

De University deelt sik up in dree Scholen („Schools“):

  • School of Engineering and Science (SES, School för Ingenieurs- un Naturwetenschoppen)
  • School of Humanities and Social Sciences (SHSS, School för de Wetenschoppen vun den Geist un för Sozialwetenschoppen)
  • Jacobs Center for Lifelong Learning and Institutional Development (JCLL, Jacobs-Zentrum för Lehren in’t ganze Leben un för Wieterbringen vun de Institutionen )

Dat Studium kann afslaten weern mit de akadeemschen Graden Bachelor of Arts, Bachelor of Science, Master of Arts, Master of Science, Executive Master / Master of Business Administration und Doctor of Philosophy (Ph. D.).

 
Campus Center vun de Jacobs University Bremen

Colleges ännern

Vörbild vun de Colleges sünd de Universität vun Oxford un de Universität vun Cambridge. Dorüm gifft dat bitherto dree so nömmte „Residential Colleges“: Alfried Krupp College, Mercator College un College III. Vunwegen datt een grötter Tall vun Studenten upnahmen weern kann, schall noch een veert College boot weern.

Finanzen ännern

De Bedriev vun de Uni köst in’t Johr üm un bi 25 Mio. Euro. Dat Geld kümmt up ünnerscheedlich Aart tohopen. Toeerst mal mütt de Studenten een Studienbidrag betahlen. Denn gifft dat jummers wedder Spennen un Stiftungen. Dorto kaamt Drüddmiddels (bi 12,5 Mio. Euro in’t Johr), Winnsten ut dat Kapitalvermögen vun de Stiftung un Krediten vun de Banken. Dat Land Bremen hett vun 1999 af an 109 Mio. Euro to de University bidragen. Wenn dat sowiet is un dat kümmt to een Insolvenz, denn kriggt Bremen dat Grundstück un all Bowarken, de dor up staht, för 1.- Euro torüch. [1].

In de Johren 2004 un 2005 hett de dormalige IUB een groden Verlust maakt (18,4 un 20,9 Mio. Euro). To’n Utglieken möss de University wat vun ehr Vermögen verhökern. An’t Enn vun’t Johr 2005 stünnen 90 Mio. Euro an Frömdkapital gegen 13 Mio. Euro an Ümloopvermögen öber. Dat bedüüd: Jedet Johr keemen nee Schullen dorto.[2].

Bi dat Grünnen vun de IUB wurr fastleggt, de University scholl mit de Tiet 250 Mio. Euro Vermögen för de Stiftung tohopensammeln. Man de Ünnernehmen geben nich so veel, as een sik dat dacht harr. Dor is de Kurs vun dat Schipp meist nich to holen ween un dat wurr annahmen, dat duur nich mehr lang un de University möss tomaakt weern. Man an’n 1. November 2006 wurr kunnig maakt, dat de Jacobs Foundation, de vun Klaus Johann Jacobs upleggt wurrn is, in Zürich alltohopen 200 Mio. Euro toscheten will. Dat schall so gahn, dat 5 Johr lang jedet Johr 15 Mio. Euro för Forschen un Lehren tobottert weert un amenn, in dat Johr 2011 noch eenmal 125 Mio. Euro baben up den Kapitalstock uppackt weert. De „Board of Governors“ (dat is de Upsichtsraat) hett vunwegen sien Freud öber düsse Spenn ohn Gegenstimm beslaten: De IUB schall tokümstig den neen Naam Jacobs University Bremen dregen. De Jacobs Foundation hett düssen Besluss aber nich to'e Grundlaag vun sien Spenn maakt.[3]

Weblinks ännern

Quellen ännern

  1. [1] die tageszeitung: Ein ganz privater Fehlschlag, 11. September 2006
  2. [2] Wat de IUB süms seggt hett, Stand: Oktober 2006
  3. [3] Wat de IUB an de Press geben hett, 1. November 2006