Julia Simon

Julia Simon (* 9. Oktober 1996 in Albertville) is en franzöösch Biathletin. Se wunn in de Saison 2022/23 den Gesamtweltcup un is mehrfack Weltmeesterin.

Simon nah hör Weltmeestertitel 2023 in Oberhof

Sportlich Loopbahn

Vun den Jöögdberiek in den B-Kader (bit 2018)

Tonächst fung se as Kind mit den Skilangloop an, bevör se sück mit 16 Johren up Biathlon konzentreeren dee. 2012 wurr se in hör Öllersklass Viezmeesterin achter de wenig Maand öllere Justine Braisaz, de ebenso as Simon hör Loopbahn in’n Club des Sports Les Saisies anfung.

Hör internatschonales Debüt geev Simon in’n Rahmen vun de Juniorinnenrennen bi de Europameesterschapen 2014 vun Nové Město na Moravě, wo se as best Ergevnis twee 24. Plätze in Eenzel un Verfolgung recken dee. Noch in de gliekken Winter wunn se bi de Jöögdweltmeesterschapen 2014 in Presque Isle achter Lisa Vittozzi un Anna Weidel de Bronzemedaille in dat Sprintrennen un ansluutend gemeensam mit Estelle Mougel un Lena Arnaud den WM-Titel in de Staffel. Dissen Spood hett Simon in de nächsthöhgere Öllersklass vun de Junioren nochmal schafft. Bi de Biathlon-Juniorenweltmeesterschapen 2015, ditmal an de Siet vun Arnaud un Chloé Chevalier.

Parallel to hör Insätze bi internatschonalen Juniorenmeesterschapen is Simon af den Winter 2014/15 in‘n IBU-Cup antreeden. Dorbi keem se meest immer ünner de best 40 un kreeg somit Punkte för de Gesamtwertung, ahn Top-Ten-Resultate bleev se aber tonächst achter de Ergevnisse vun hör Teamkolleginnen torüch. Simon hett later seggt, dat besünners de ständigen Verglieken mit hör Vereenskollegin Justine Braisaz „nich eenfach“ ween weern: Wiels Braisaz all 2014 mit 18 Johren in dat franzööösch Weltcupteam upsteegen weer, wurr Simon deelwies nich eenmal för den IBU-Cup berücksichtigt.

In‘n Januar 2017 stunn Simon in Martell in twee IBU-Cup-Sprints up dat Podest un kunn een dorvan mit 17,6 Sekunnen Vörsprung up Darja Wirolainen för sück entscheeden. Doruphen kreeg se in Ruhpolding un later (nah en wieder IBU-Cup-Podium) ok bi dat Saisonfinale in Oslo hör eerst veer Weltcupinsätze. As best Ergevnis reck se dorbi en 25. Rang in’n Sprint an‘n Holmenkollen, womit se up Rang 77 in den Gesamt-Weltcup keem.

In den folgend Winter funn Simon – as Folg vun wiederen Top-Ten-Ergevnissen in‘n im IBU-Cup – af Januar 2018 regelmatig Berücksichtigung in dat Weltcupteam. Nah Platz 12 in’n Sprint vun Antholz wurr se ok för de olympisch Winterspelen vun Pyeongchang nimineert, keem aber nich to’n Insatz. Bi de Biathlon-Europameesterschapen 2018 (de en Grootdeel vun de Olympiadeelnehmer utlaaten dee) wunn Simon Bronze in de Verfolgung un tosommen mit Émilien Jacquelin Sülver in de Single-Mixed-Staffel. All dree Johr tovör harr se bi de EM 2015 Staffelbronze wunnen. In de Gesamtweltcupwertung keem se in disse Saison up Rang 67.

Upstieg in den Weltcup (2018 bit 2022)

Simon (l.) mit hör Teamkolleginnen Anaïs Bescond, Célia Aymonier un Justine Braisaz nah dat Staffelrennen vun Oberhof in‘n Januar 2020

Över de Saison 2018/19 tell Simon formal wiederhen to’n B-Kader vun den franzööschen Skiverband, wurr aber över den gesamten Winter weg ahn Utnahm in’n Weltcup insett. Se stunn somit up en Ebene mit de dree A-Kader-Athletinnen Anaïs Chevalier, Anaïs Bescond un Justine Braisaz, mit de se in dat Staffelrennen vun Ruhpolding in‘n Januar 2019 eerstmals in’n Weltcup wunn. Simon weer dorbi Startlöperin un bleev in’t Scheeten fehlerfree. Ok in Eenzelrennen keem se in dat bövere Mittelfeld, verpass in’n Sprint vun Pokljuka mit Platz veer, dat Podium knapp un belegg an dat Enn’n vun de Saison den 23. Rang in‘n Gesamtweltcup. Bi hör eerst WM-Deelnahm bi de Utwussen reck se as best Eenzelergevnis den 21. Rang in dat 15-Kilometer-Rennen, in den Staffelwettkämpen harr se mit de Medaillenvergaav nichts to doon.

Simon – de siet Mai 2019 ok offiziell in‘n A-Kader führt wurr – hett hör Ergevnisse över den folgenden Winter wieder verbetert. All bi den Saisonuptakt in Östersund stunn se in dat 15-Kilometer-Eenzel eerstmals up dat Podest. In‘n Januar 2020 reck se as Slusslöperin vun de Mixed-Staffel up de Pokljuka an de Siet vun Quentin Fillon Maillet, Simon Desthieux un Justine Braisaz den tweeten Staffel-Weltcupsieg. Bi den Weltmeesterschapen vun Antholz wies se tonächst ganz swaak Saisonleistung un keem eerst nich ünner de best 30, kunn aber de WM mit en 5. Platz in’n Massensatrt afsluuten. In dat letzt Rennen vun de Saison reck se eerstmals Platz 1 in en Eenzelwettkamp in’n Weltcup: Nah en 11. Platz in’n Sprint hett se in de Verfolgung vun Kontiolahti all Konkurrentinnen överhaalt un wunn dat Rennen vör Selina Gasparin, nahdem se anners as de bit dorhen führende Tiril Eckhoff bi dat letzt Scheeten ahn Fehler bleev. An’t Enn’n vun de Saison keem se in den Gesamtweltcup up den 8. Platz un weer dormit de beste Französin mit 4 Punkten mehr as Justine Braisaz.

Ok 2020/21 weer Simon mit twee Massenstartsiegen in‘n Januar 2021 en vun de spoodrieksten Französinnen in‘n Weltcup: In Oberhof kunn se sück up de Slussrunn gegen Franziska Preuß dörsetten, in Antholz wunn se gegen Hanna Öberg in’n Teelsprint. Bit to dat letzt Saisonrennen in Östersund führ se de Massenstartweltcup an, wurr dor aber mit 15 Scheetfehlern Letzte un full up den darten Rang vun de Disziplinenwertung torüch. Mehrere Beobachter hemm de Saison vun Simon as „Achterbahnfohrt“ betekent Wegen unbeständiger Scheetergevnisse – meestens in’n Liggendanslag – keem se tüschen hör spoodriek Wettbewarfen deels nich mal ünner de best 50 Athletinnen. Bi de Weltmeesterschapen Midden Februar 2021 up de Pokljuka verpass Simon in den Eenzelwettkämpen vördere Ergebnisse un geev in dat 15-Kilometer-Rennen nah söben Scheetfehlern in chancenloser Positschoon up. Twee Daag later aber wunn se gemeensam mit Antonin Guigonnat de Goldmedaille in de Single-Mixed-Staffel un reck dormit hör eersten Weltmeestertitel, wobi se up de letzte Runn noch flinker as Tiril Eckhoff leep. In‘n Weltcup harr Simon ok an de Siet vun Émilien Jacquelin een Single-Mixed-Staffel wunnen. In den Gesamtweltcup keem se an’t Enn’n up den 13. Rang.

In‘n Winter 2021/22 leep Simon nah en in en AFP-Meldung as „katastrophal“ bewerte Saisonstart (ahn Top-20-Ergevnis in de eerst Weeken) to hör eerst Sprint-Weltcupsieg – vör Vanessa Voigt – bi de Rennen vun Otepää un mehreren wiederen Podestergevnissen. Bi de Olympisch Winterspelen 2022 in Peking belegg se as best Eenzelergevnis Rang 6 in’n Massenstart. Mit de Mixed-Staffel wunn se aber an de Siet vun Anaïs Chevalier-Bouchet, Émilien Jacquelin un Quentin Fillon Maillet de olympisch Sülvermedaille.

Gesamtweltcupsieg (siet 2022)

Simon wiels de Weltmeesterschapen 2023 in Oberhof

Mit twee Siegen in de eerst fief Wettkämpen vun de Weltcupsaison 2022/23 övernehm Julia Simon in den naholympischen Winter fröh dat Geel Trikot vun de Gesamtführende. Insgesamt hett se in de Saison17 vun 20 Weltcuprennen ünner de eerst teihn Athletinnen afslooten, teihn dorvan up dat Podium. Se hett den Gesamtweltcup mit 1093 Punkten vör Dorothea Wierer (911 Punkte) wunnen. De as Favoritin in den Winter start Elvira Öberg, de in de eerst Saisonhälft hör starkste Konkurrentin weer, full in de Wertung wegen gesundheitlicher Probleme torüch. Simon weer insgesamt de veert Französin nah Anne Briand, Emmanuelle Claret un Sandrine Bailly, de den Gesamtweltcup up hör Naam schrieven kunn. Todem wunn se ok noch de lütt Kristallkugel in den Disziplinenwertung Verfolgung bzw. Massenstart. Bi den Weltmeesterschapen 2023 wunn Simon dat Verfolgungsrennen vör Denise Herrmann-Wick, Marte Olsbu Røiseland, Ingrid Landmark Tandrevold un annern. Dorto keemen noch twee Bronzemedaillen in’n Massenstart as ok mit de Mixed-Staffel.

Up de Saison 2023/24 hett Julia Simon sück överweegend alleen vörbereit un bleev Anfang Juli 2023 den eersten Trainingslager mit de Mannschaft „aus persönlichen Gründen“ ebenfalls fern. Kört dorup hett de L’Équipe mitdeelt, dat gegen Simon twee Anzeigen wegen Kreditkartenbedroog vörliggen, een dorvan dör hör Teamkollegin Justine Braisaz-Bouchet. Simon sall wiels dat Blinkfestivalens – en Veranstaltung in Norwegen in den Disziplinen Langloopen un Biathlon – Anfang August 2022 mit de Kreditkoort vun Braisaz-Bouchet as ok de vun en anner, mit Naam nich bekannt Teamliddmaat, Waren vun de Marke GoPro in’n Wert vun 1000 bit 2000 Euro online köfft hemm. De Waren sullen denn an dePrivatanschrift vun Julia Simon leefert wurrn ween. Simon hett sück dorto tonächst nich ütert un hett vörövergahnd hör Prüfile in den sozialen Nettwarken sparrt. An’n1. Juni hett de franzöösch Skiverband en Disziplinarkommission inberopen, vun de Simon un Braisaz-Bouchet to de Vörwürfe anhörrt wurrn. In de Folge betruck de Verband en neutrale Positschoon un will vör en Entscheeden dat amtliche Ergevnis vun de Straafverfolgungsbehörden afwachten. In‘n August 2023 hett sück Julia Simon eerstmals to de Vörwürfe ütert un dorbi hör Unschuld betüert. Se hett en Avkaat beupdragt un hett vun hör Siet ut Anzeige wegen Identitätsdiebstahl stellt. In‘n September nehm se mit wiederen Liddmaaten vun de franzöösch Mannschap an dat Martin Fourcade Nordic Festival deel un keem dor up den darten Platz. Nah un nah kehr se to dat gemeensam Training mit de Mannschap torüch un nehm in’n Harvst an den natschonalen Sömmerbiathlonrennen deel. In’n Oktober hett de Polizei vun Albertville Simon vörladen un hett hör utführlich to den Kreditkartenbetrug befraagt. Vörutgahn weern umfangriek Ünnersöken vun IP-Adressen as ok mit de Köper in Verbinnen stahn Smartphones un Tablets. Nah mehreren Stünnen wurr Simon entlaaten, hör Anwalt Jean-Michel Reynaud hett vun en „normalen Vorgang der Polizei“ snackt. Reynaud hett wieder seggt, dat de Ünnersöken wiederloopen deen un wiedere Dinge ünnersöcht wurrn mooten.

Unafhängig dorvan leep hör sportlich Loopbahn in disse Saison goot wieder. De Start in Östersund mit Platz 31 in’t Eenzel weer woll mau, aber dornah gung dat stetig vöran. Bi de Verfolgung vun Oberhof wunn se nah den Sprint up Platz 10 noch vör Justine Braisaz-Bouchet, Ingrid Landmark Tandrevold, Elvira Öberg un de franzöösch Upstiegerin vun de Saison, Lou Jeanmonot. Den nächsten Sieg reck se mit den Massenstart vun Antholz, ditmal vör Jeanmonot, Lena Häcki-Groß un Vanessa Voigt. An dat Enn’n vun de Saison belegg se in den Gesamtweltcup Rang 5. Allerdings verpass se in dat letzt Rennen vun de Saison noch den Gewinn von de Gesamtwertung in’n Massenstart-Wettbewarf. Lou Jeanmonot wunn dat Rennen un dormit ok de Kristallkugel för den Massenstart. Ok in’n Verfolgungsweltcup reck se den 2. Platz. Bi de Biathlon-Weltmeesterschapen 2024 in Nové Město na Moravě weer se de spoodriekste Biathletin. Se wunn dat Sprintrennen un de ansluuten Verfolgung, keem in’t Eenzel up den Bronzerang, in Massenstart verpass se mit den 4. Platz en wiedere Medaille, wunn aber mit de Fruen-Staffel un de Mixed-Staffel wiedere twee Goldmedaillen.

Weblinks

Julia Simon. Mehr Biller, Videos oder Audiodateien to’t Thema gifft dat bi Wikimedia Commons.

• Julia Simon up de Sieden vun de IBU (engelsch)
• Statistische Auswertung up realbiathlon.com (engelsch)