Kardinal in pectore

Kardinal in pectore (v. lat. in pectore „in de Bost;in'n Harten“, also „stickum“) – fröher ok Kardinal in petto – warrt en Kardinal, de vun'n Paavst beropen wurrn is, denn nömmt, wenn sien Naam vun den Paavst nich bekannt maakt warrt. So steiht dat in can. 351 § 3 vun den Codex Iuris Canonici. Dat warrt unner annern so handhaavt, wenn de Mann, de to'n Kardinal maakt wurrn is, vunwegen de politische Laag in sien Land dormit reken mutt, dat he allerhand Theater kriggt, wenn de Sake bekannt warrt.

Nun is dat avers so, dat de Beropen eerst in Kraft treden deit, wenn se apentlich maakt wurrn is, t.B. wenn dat Dekret over de Beropen in en Konsistorium wiest warrt. Vundeswegen hett de Kardinal in pectore noch nich de Privilegien un ok nich de Rechte vun en Kardinal. Dat Karkenrecht verlangt man bloß, dat de Naam vun den Kardinal apentlich bekannt maakt weern mutt. Dat mutt nich mündlich passeern, dat langt ok, wenn de Kardinal in en vun den Paavst siene schriftlichen Dokumente to lesen steiht.

Bispeele ännern

  • 2. Dezember 1615: De Kanzler vun dat Hillge Röömsche Riek, Melchior Khlesl, warrt vun Paavst Paul V. to'n Kardinal in pectore böört. Bekannt maakt wurrn is de Saak in'n April 1616.
  • A'n 17. Juni1771 is Antonio Eugenio Visconti (1713–1788), Nuntius an'n Kaiserhoff in Wien, vun Clemens XIV. to'n Kardinal in pectore böört wurrn.
  • In dat Konsistorium vun 1960, dat vun Paavst Johannes XXIII. tohopen ropen wurrn weer, sünd neven seben Kardinalen, de ehre Naams bekannt geven wurrn sünd, ok dree in pectore beropen wurrn, de ehre Naams bit up den hüdigen Dag nich bekannt wurrn sünd.
  • Paul VI. hett Iuliu Hossu un Štěpán Trochta 1969 in pectore to'n Kardinal maakt, Hossu hett dat nich mehr beleevt, wie de Saak apentlich bekannt maakt wurrn is (beide 1973) un is denn posthum böört wurrn.
  • Johannes Paul II. hett alltohopen veer Kardinalen in pectore beropen, dormank Ignatius Kung Pin-Mei (1979, apentlich maakt 1991), Jānis Pujats un Marian Jaworski (beide 1998, apentlich maakt 2001). De veerte Kardinal is vun Johannes Paul II. noch in sien lest Konsistorium in'n Oktober 2003 beropen wurrn, man de Paavst is denn sturven, ohn dat de Saak dör Tügen oder schriftliche Tüüchnisse apentlich bekannt maakt wurrn is. So hett de Mann, wo dat um geiht, de Ansprüch un Rechte vun en Kardinal nie nich kregen.