Komodo
Komodo is en Eiland in de Provinz Oost-Nusa Tenggara in Indonesien, dat to de Lüttjeren Sunda-Eilannen tohöört un twüschen de wat gröttern Eilannen Sumbawa in’n Westen un Flores in’n Oosten liggt. Komodo is 390 km² groot un hett so bi 2000 Inwahners. Dat is tohoop mit Padar un Rinca Deel von’n Komodo-Natschonalpark. De gröttste Barg op dat Eiland is de Gunung Arab, de 823 Meter hoog is un in de Midd liggt. In’n Noorden liggt de 758 Meter hoge Gunung Satalibo, in’n Süden de 658 Meter hoge Gunung Komodo un op en Halvinsel ganz in’n Süden de 518 Meter hoge Gunung Langkoi.
Dat Eiland is vör allen bekannt för den Komodo-Waraan, de hier vörkummt. Dat gifft ok veel Tourismus mit Touristen, de sik de Waraans un ans de Planten un Deerten von Komodo ankieken wüllt.
De Mehrheit von de Inwahners sünd Muslims, man dat gifft ok welk Christen un Hindus. De Lüüd leevt meist all in dat Dörp Komodo an de Oostküst un sünd Nakamen von Straaffungene, de sik mit de Bugis von Sulawesi vermengelt hebbt. An de Bucht Loh Liang bi dat Dörp Komodo gifft dat en lütten Haven.
Weblenken ännern
Koordinaten:8° 33′ S, 119° 27′ O