Landgericht Wersermünn
Dat Landgericht Wersermünn weer en Landgericht in de Stadt Wersermünn, dat blots för korte Tied na’n Tweten Weltkrieg bestahn hett (1945/1946).
Historie ännern
Na’n Tweten Weltkrieg weren de breemschen Städer Bremen un Bremerhoben Deel von de Amerikaansche Besatzungszoon. In de eerste Tied bet Dezember 1945 hebbt dor ok de vörher prüüßschen Landkreise Wersermünn un Oosterholt un de ollnbörgsche Landkreis Wersermasch mit tohöört.
Dat Rebeed stünn vörher also ünner dree verscheden Gerichtsborkeiten un de ollnbörgschen un prüüßschen Landgerichten un Oberlandsgerichten legen in de Brietsche Besatzungszoon. Dorüm hebbt de Amerikaners verordnet, dat en egen Landgericht in Wersermünn inricht warrt, to dat de Bezirk von de Amtsgerichten Wersermünn, Dorum, Hagen un Nordenham höörn schull. Över dat Landgericht Wersermünn stünn dat Hanseaatsche Oberlandsgericht in Hamborg.
Dat Gericht hett an’n 11. September 1945 apenmaakt. De eerste Sitzung von de Zivilkamer weer an’n 10. Oktober un de eerste Sitzung von de Straafkamer an’n 1. November 1945.[1]
An’n 28. Januar 1946 hett de brietsche Miltärregerung verordnet, dat dat Amtsgericht Wersermünn wedder an dat Landgericht Veern un dat Oberlandsgericht Celle trüggfallen schall. Briten un Amerikaners hebbt denn aver noch wedder beraden un sünd denn dor över eens worrn, dat dat Amtsgericht Wersermünn blots noch för de Stadt Wersermünn tostännig ween schall un an dat Landgericht Bremen fallt. Dat is an’n 18. Februar so ümsett worrn. Dat Amtsgericht Nordenham keem wedder an dat Landgericht Ollnborg. Dormit harr dat Landgericht Wersermünn keen Amtsgerichten mehr ünner sik. Dorüm hett de Militärregerung an’n 21. Februar 1946 den Präsident von dat Hanseaatsche Oberlandsgericht beopdragt, dat Landgericht Wersermünn optolösen. Dat Landgericht schull to’n 15. März oplööst warrn, schull aver bestahn blieven as detacheerte Kamer von dat Landgericht Bremen. Von wegen dat hen un her twüschen Briten un Amerikaners weer dat aver ok na’n 15. März noch nich kloor, wat dat Gericht bestahn blieven schull oder nich. Eerst an’n 27. März keem bi’n Landgerichtspräsident Heimann-Trosien de Order von de Militärregerung an, dat dat Gericht oplööst is.
In de söven Maand, in de dat Gericht bestahn hett, hett dat üm un bi 120 Ziviloordelen un bi 60 Straafoordelen fällt.[1]
Baaslüüd ännern
- September 1945–4. Oktober 1945: Gerhard Dreyer
- 4. Oktober 1945–März 1946: Georg Heimann-Trosien
Footnoten ännern
- ↑ a b Henning Hübner: Der Aufbau des Gerichtswesens nach dem Zweiten Weltkrieg. In Uwe Lissau: 1852-2002. 150 Jahre Amtsgericht in Bremerhaven. 2002, Sieden 72–82