Ninndörp
| Wapen/Flagg | Koort | |
|---|---|---|
|
|
| |
| Basisdaten | ||
| Inwahners: | ||
| Postleettall: | 21224 | |
| Vörwahl: | 04108 | |
| Geograafsche Laag: | Koordinaten:53° 23′ N, 9° 54′ O53° 23′ N, 9° 54′ O | |
|
| ||
Ninndörp (hoochdüütsch Nenndorf) is en Dörp in un Seet von de Gemeen Rosengoorn in’n Landkreis Horborg, Neddersassen.
Geografie ännern
Ninndörp liggt an’n Oostrand von de Horbörger Bargen. In’n Noordwesten liggt de Gannabarg.
De Naveröörd sünd Sieversen un Leversen in’n Noorden, Westerhoff, Tötsen, Jiddens un Hinteln in’n Noordoosten, Klecken un Eekel in’n Süüdoosten, Büüns un Vaans in’n Süden, Dibbersen un Dangersen in’n Süüdwesten, Ems in’n Westen un Langenrehm in’n Westen.
Historie ännern
In’n Düütsch-Franzööschen Krieg 1870/1871 sünd twölv Soldaten ut Ninndörp fullen oder vermisst, in’n China-Krieg een, in’n Eersten Weltkrieg ölven un in’n Tweten Weltkrieg 36.[1]
Verwaltungsgeschicht ännern
In de Franzosentied von 1810 bet 1814 hett de Oort to de Mairie Hittfeld in’n Kanton Hittfeld höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1852 to de Vaagdie Hittfeld in dat Amt Horborg tohöört un denn von 1852 bet 1859 to dat Amt Hittfeld. 1859 is dat wedder Deel von dat Amt Horborg worrn. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.
De Oort is an’n 1. Juli 1972 mit de Gemeenreform in Neddersassen Deel von de Gemeen Ninndörp worrn, de von 1973 af an denn Gemeen Rosengoorn heten hett. Ninndörp billt nu en Oortschop binnen de Gemeen Rosengoorn un hett en Oortsbörgermeester un en Oortsraad.
Inwahnertall ännern
| Johr | Inwahners |
|---|---|
| 1791[2] | 14 Füürsteden |
| 1812[3] | 185 |
| 1824[4] | 21 Füürsteden |
| 1848[5] | 232 Lüüd, 28 Hüüs |
| 1. Dezember 1871[6] | 280 Lüüd, 43 Hüüs |
| 1. Dezember 1910[7] | 425 |
| 1925[8] | 394 |
| 1933[8] | 413 |
| 1939[8] | 432 |
Religion ännern
Ninndörp is evangeelsch-luthersch präägt un billt siet 1926 mit de Krüüzkark en egen Kaspel. Vörher hett de Oort to dat Kaspel von de Mauritius-Kark in Hittfeld höört.
För de Kathoolschen is de St.-Petrus-Kark in Bookholt tostännig.
Wapen ännern
Dat Wapen von Ninndörp wiest op gollen Grund en swarten Klockentoorn.
Oortsbörgermeesters ännern
- opstunns: Bernd Lühmann
Kultur ännern
En Denkmaal för de Fullenen ut den Düütsch-Franzööschen Krieg, den China-Krieg un de twee Weltkrieg’ steiht in Ninndörp an de Kark.
Verenen ännern
De Schüttenvereen Ninndörp is 1898 grünnt worrn.
Weertschop un Infrastruktur ännern
Ninndörp as Hauptoort von de Gemeen Rosengoorn gellt na dat Regionale Ruumordnungsprogramm as Grundzentrum för de Öörd in de Ümgegend.
De Oort hett en egene freewillige Füürwehr.
De Oort hett Filialen von de Spoorkass Horborg-Buxthu un de Volksbank Lümborger Heid.
Verkehr ännern
Dör Ninndörp löppt de Kreisstraat 85, de fröher Deel von de Bundsstraat 75 weer. Vondaag geiht de K 85 aver eerst in’n Süüdwesten an de Autobahn 1 in de B 75 över. De B 75 geiht an Bookholt langs na Kakenstörp un Töst. In’n Noordoosten geiht de K 85 över Tötsen na Horborg. Von de K 85 geiht na Westen de K 26 af, de na Ems löppt, un na Süüdoosten de K 12 na Eekel, Klecken un Bendsdörp.
De nächste Autobahn is de Autobahn 1. De Opfohrt 42 Dibbersen liggt so een Kilometer in’n Süüdwesten von Ninndörp an de K 85. De nächste Opfohrt op de Autobahn 261 is de Opfohrt 3 Tötsen veer Kilometer in’n Noorden an de K 52.
De nächste Bahnhoff is so bi dree Kilometer wied weg in’n Süüdoosten de Bahnhoff Klecken an de Bahnlien Hamborg–Bremen.
Lüüd ännern
De Tähndokter un Politiker Ehrhart Glaser hett von 1959 bet to sien Dood 2006 in Ninndörp leevt.
Literatur ännern
- Siegbert Groenitz: Nenndorfer Geschichten. 1993
Footnoten ännern
- ↑ http://www.denkmalprojekt.org/dkm_deutschland/nenndorf.htm
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 161
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 60
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 444
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 92
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 130
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
