Ons’ Lieve Heer op Solder

Ons’ Lieve Heer op Solder (Onze-Lieve-Heer-op-Zolder, Uns leven Herrn op’n Dackborrn) is en ole Schuulkark, de an’n Oudezijds Voorburgwal in de Binnenstadt van Amsterdam liggt.

Dat Huus mit de Kark
Groot Saal van de Kark

Dat Huus Oudezijds Voorburgwal 40 süht ut as en normal Grachtenhuus. Dat is en veer Finsterregen breed Wahnhuus mit en Tridd un en deelwies höltern Front. An’n Deckbalken van dat eerste Stockwark is to kennen, dat dat Huus ut dat 17. Johrhunnert is. Dat stammt ut de Tied üm 1630. De Gevel is in dat 18. Johrhunnert körter maakt un van en klassizistischen Halsgevel in en Spitzgevel ännert worrn. An’n Vörgevel gifft dat keen Hievbalken. Dat Huus hett aver an de Sied, in’n Heintje Hoeksteeg, en Hievanlaag.

Dat Huus is 1661 van’n westfäälschen Koopmann Jan Hartman köfft worrn. Dat weer in de Tied na de Reformation, as de Katholiken keen apene Goddsdeensten mehr hollen kunnen. Hartman hett dor de Kark inrichten laten. Na buten schull dat Huus nich as Kark to kennen wesen. Hartman hett de Dackborrns (also den tweten Stock) van dree Hüüs an’n Oudezijds Voorburgwal un an’n Heintje Hoeksteeg tohoopleggen laten, dat se een groten Ruum harrn. De Ingang weer in de lütte Twiet blangenan. Jüst as fröher de Oude Kerk ganz in de Neegd, weer de Schuulkark an Nikolaus van Myra wieht. Dat Huus sülvst hett Hartman as Wahnhuus bruukt.

De Barockaltar is van Jacob de Wit 1715 boot worrn un wiest Jesus Christus sien Dööp. Dat se noog Platz harrn, geev dat ok noch en Galerie. Dor steiht ok de Orgel, de Hendrik Meyer 1794 boot hett.

De Naam Ons’ Lieve Heer op Solder kummt ut dat 19. Johrhunnert. In de Schuulkark hett dat van 1663 bet 1687 Goddsdeensten geven bet de grote ne’e St. Nicolaaskerk gegenöver den Hauptbahnhoff trech worrn is. 1888 is se denn as Museum inricht worrn, dat Museum Amstelkring. Normale Goddsdeensten gifft dat dor nich mehr, aver dat is ünner annern mööglich dor to heiraden.

Weblenken ännern

  Ons’ Lieve Heer op Solder. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:52° 23′ N, 4° 54′ O