Pyroklastisch Steen
En Pyroklastisch Steen (ut greeksch: pyro „Füer“ un klastos „twei broken“) is dat Ergevnis vun Vulkanismus, wobi fletig Material, dat as Lava betekend warrt dör en explosiv Utbrook vun’n Vulkan utstött oder twei broken warrt. Man kann dat ok as Schutt vun’n Vulkan beteken.
Dree Oorden vun Transport künnt dorbi ünnerscheedt warrn: Pyroklastisch Stroom, Glootwulken oder -lawinen und Pyroklastisch Fallen. Dat Material warrt in den Sloot hoochföddert un dorbi de Druck jümmer weniger. Gas, dat in de fletig Lava löst is, neiht dorbi gau ut, wat denn to de Explosion föhrt. Dorbi warrt ok Steen vun Sloot sülvst tweibroken un trümmert un flüggt mit de Lava rut.
Warrt de opstaute Druck in den Vulkan to groot, stiggt en Deel vun dat trümmerte Material hooch op un fallt denn wedder daal na Eer. Dat is dat Pyroklastisch Fallen, un de Steen, de dorbi rutkommt, warrt as Tephra tohopenfaat. En Deel vun de faste Masse, de utsmeten warrt, mischt sik aver mit dat freesette Gas un billt en Dispersion, de mit grote Snelligkeit den Barg daal lopen kann. Dat sünd de pyroklatisch Strööm, de in’t Innerst noch bannig hitt sünd un all’ns tonicht maakt, wat in jemehr’n Weg liggt.
De Aflagern vun pyroklastisch Strööm könnt eenige Meters dick wesen. Wenn dor en grötteren Andeel vun Bimssteen mit binnen is, warrt de Stenen as Ignimbrit betekend. Wenn Aschenlagen, de toeerst as Tephra daalfallen is, dör den eegen Druck oder annere Inwarkens fast warrt, kann dorut Tuff entstahn, de denn ok to de Pyroklastisch Stenen rekent warrt.