Raumpatrouille

eerste düütsche Science-Fiction-Feernsehreeg
Daten vun de Reeg
Plattdüütsche Titel:
Düütsche Titel: Raumpatrouille
Originaltitel: Raumpatrouille
Produkschoonsland: Düütschland
Produkschoonsjohr(en): 1966
Produzent(en):

Hans Gottschalk
Helmut Krapp

Episodenläng: 60 Minuuten
Episodentall: 7 in 1 Staffel
Originalspraak:

Düütsch

Musik:

Peter Thomas

Genre:

Science-Fiction

Eerst Sennen: 17. September 1966
op Eerst Düütsch Feernsehn
Dorsteller

Raumpatrouille (op Platt so veel as „Weltruumpatrouille“), faken mit den Tosatz Die phantastischen Abenteuer des Raumschiffs Orion (ok Raumschiff Orion oder Raumpatrouille Orion) is de eerste düütsche Science-Fiction-Feernsehreeg. Dat gifft söven Folgen, de vun’n 17. September 1966 an alle veerteihn Daag jümmer Sünnavend avends na de Tagesschau vun de ARD utstrahlt worrn is.

De Feernsehreeg is in swart-witt dreiht worrn un hett siet Johrteihnten al Kultstatus. Bi’t eerste Utstrahlen in de ARD kreeg se Inschaltquoten vun bit to 56 % un is dorüm faken as „Stratenfeger“ betekent worrn. In Düütschland is de Reeg in’t Eerste Programm 1968 un 1975 as ok vun verschedene Regional-Senner vun de ARD, un later ok vun Sat.1 bit 1999 tosamen twintig mol wedderhaalt worrn. Op Sat.1 löpen aver ut rechtliche Grünnen faken blots fief Folgen.

Inholt ännern

Worüm dat in de Reeg geiht, warrt bi jede Folg in’n Vörspann vertellt, de mit dramaatschen Ünnertoon vun Claus Biederstaedt snackt worrn is:

„Was heute noch wie ein Märchen klingt, kann morgen Wirklichkeit sein. Hier ist ein Märchen von übermorgen: Es gibt keine Nationalstaaten mehr. Es gibt nur noch die Menschheit und ihre Kolonien im Weltraum. Man siedelt auf fernen Sternen. Der Meeresboden ist als Wohnraum erschlossen. Mit heute noch unvorstellbaren Geschwindigkeiten durcheilen Raumschiffe unser Milchstraßensystem. Eins dieser Raumschiffe ist die ORION, winziger Teil eines gigantischen Sicherheitssystems, das die Erde vor Bedrohungen aus dem All schützt. Begleiten wir die ORION und ihre Besatzung bei ihrem Patrouillendienst am Rande der Unendlichkeit.“

De Reeg vertellt in söven Folgen, wat Commander Cliff Allister McLane mit sien Kru op den gauen Ruumkrüzer Orion beleven deit. McLane is bekannt för sien opsternaatsche Oort un Wies mit högere Amtdrägers ümtogahn, wenn sien Stuurkopp dat nich anners tolett. Gliek in de eersten Folg vun de Reeg warrt he wegen sien Verhollen to de Ruumpatrouille straafversett, vun wegen dat he gegen en utdrücklichen Befehl de Lannenmööglichkeit op den Saturnmaand Rhea bewiest hett. Tosamen mit sien Mannschop beleevt he Geschichten in’n Weltruum, wobi sik en Krieg mit de frömme Spezies Frogs as’n roden Faden dor de Reeg tütt.

De Stammmannschop vun de Orion besteiht ut fief Lüüd: De Kommandant vun’t Ruumschipp is Cliff Allister McLane. Em to Siet staht de Armierungsoffizeer Mario de Monti, de Boordingeniör Hasso Sigbjörnson, de Astrogator Atan Shubashi un Helga Legrelle as Leutnant för Ruumöverwachen. As nu de Mannschop straafversett worrn is, warrt jem dwangswies tosätzlich de Sekerheitsoffizeer vun’n Galaktischen Sekerheitsdeenst (GSD) Tamara Jagellovsk an de Siet stellt. Se schall dorför sorgen, dat McLane dat deit, wat em opdragen worrn is.

För de Reeg is en tokamen Welt mit vele Details utarbeit worrn. Tosamen mit den Charakter vun McLane warrt disse Welt as Wegwieser för dat moderne Feernsehn in Düütschland ansehn. Legendär is to’n Bispeel ok de Sellschopsdanz, de an’n Seegrund in’t „Starlight Casino“ danst warrt.

De Inholt vun de Folgen:

Angriff aus dem All ännern

Liekers dat Commander McLane Alphaorder harr, lannt he mit de Orion op den Saturnmaand Rhea. Man ok vörher al, hett he wegen sien opsternaatsche Oort un dat nich beachten vun Befehlen mehrmols disziplinaarsch Arger kregen un warrt na dit Vergahn nu mit sien kumplette Mannschop to de Ruumpatrouille straafversett. Un dat he nich noch mehr Arger maken deit, warrt em to’n Oppassen ok no en Offizeersche vun’n Galaktischen Sekerheitsdeenst (GSD), Tamara Jagaellovsk, an de Siet stellt. Jemehr eerste Routine-Opdrag an’n nächsten Dag is, de Bewegen in en Ruumsektor to överwachen. Op’n Weg kamt se an de vörschaven Butenbasis MZ-4 vörbi, de aver op jemehr Anfragen nich reageert. An Steed vun en Antwoort warrt de Orion en sünnerboren Kood övermiddelt. As McLane nakieken will, wat mit MZ-4 nich stimmt, gifft dat to’n eersten mol Striet mit Lt. Jagellovsk. Liekers sett McLane sik dör un kann ehr dorvun övertügen, dat dat nich blots’n fixen Infall vun em is.

Sigbjörnson un Shubashi warrt rünner op de Statschoon schickt, woneem se faststellt, dat dat dor keen Suerstoff mehr gifft. All de Lüüd op MZ-4 sünd dood un seht ut as weern se in jemehr Bewegen infroren. In de Gäng finnt se sünnerbore Wesen vör, de een kuum sehn kann un gegen de jemehr Strahlenwapen nix utrichten künnt, vun wgen dat se eenfach dör jem dörgaht. To de glieken Tiet warrt de Orion vun frömme Ruumscheep angrepen, de jem technisch wiet över sünd. Gau warrt klor, dat dat feendliche Butenirdische sünd. Wegen Invasions-Gefohr gifft Jagellovsk den Befehl, MZ-4 tonichten to maken, ok wenn de beiden Kru-Liddmaten dorbi ümkamt. Dorbi kriggt se sik wedder mit McLane in’e Wull, sütt opletzt aver in, dat se Recht hett. Man, as he den Befehl utföhren will, markt he, dat jemehr Energiesmieters blockeert sünd, un se nix mehr doon künnt. Üm gau Wohrschau to geven, warrt’n Torüchstörten na de Eer beslaten. De galaktische Flott op MZ-4 lostoschicken warrt as nich mehr nödig ansehn, vun wegen dat en automaatschen Laborkrüzer op MZ-4 tostüert, de mit de Statschoon kollideert, wenn he vun de Statschoon keen ne’en Kurs kriegen deit, un ehr dormit tonichten maakt.

In de Twüschentiet versökt Shubashi un Sigbjörnson, mit jemehr Lannenfähr vun’n Tyyp Lancet wegtokamen, mööt aver faststellen, dat de Butenirdischen jemehr Elektronik twei maakt hebbt. Se künnt dor nix an doon, dat sik mehr vun jem op de Basis to bewegt. Denn aver hett Shubashi den Infall, de jem redden kann: vun wegen dat keen Suerstoff mehr op MZ-4 is, kummt he dorop, dat de Butenirdischen keen verdrägen doot. Nu is aver de hele Suerstoff in de Statschoon un in de Lancet tonichten maakt, so dat se blots noch de letzte Reserve vun jemehr Ruumantög hebbt. Se leegt een Patroon in een vun de Rüüm af un klemmt sik beid an de annere, de se noch hebbt. As opletzt all Butenirdische in den Ruum versammelt sünd, scheet se dorop mit jemehr Wapen un bringt de Patroon to’n explodeeren. De Butenirdischen blievt doot, un de Laborkrüzer explodeert ok, neemlich an en Magnetschirm, den de Butenirdischen vörher üm de Statschoon leggt harrn. To’n Enn vun de Folg, as se all wedderop de Eer sünd, dööpt Shubashi de Frömmen op den Naam Frogs.

De eerste Utstrahlen weer an’n 17. September 1966 mit en Inschaltquoot vun 37 %. Speelbaas weer Michael Braun.

Planet außer Kurs ännern

De Ruumkrüzer Hydra ünner dat Komamndo vun General Lydia van Dyke is in en Megnetstorm kamen un kann nu nich mehr stüert warrn. De Mannschop hett en Supernova opdeckt, de bannig gau op de Eer toflüggt. Se finnt rut, dat de Frogs dorachter steekt un de Nova stüert, üm de Eer tonichten to maken. Van Dyke kann disse Naricht noch an de Eer wietergeven, denn brickt ehr Lichtfunk tosamen. Op de Eer warrt McLane un Jagellovsk dör den GSD dorvun gewohr. Wiel inn GSD övern Evakueeren vun de Eer beraat warrt, maakt McLane sik Sorgen üm General van Dyke, sien Baas as he noch nich straafversett weer.

Vun wegen dat de Orion 7 dat gaueste Schipp is, wat McLane foorts losschickt, üm de Hydra to redden. Henkamen künnt se nich, aver mit jem Kuntakt opnehmen un so de Koordinaten vun de Leitstatschoon vun de Frogs rutfinnen, de de Hydra in de TWüschentiet bestimmt hebbt. McLane will toeerst van Dyka redden, warrt aver vun Jagellovsk mit vörhollen Strahlenwapen dwungen, sik üm de Eer to scheren, vun wegen dat dat wichtiger is. McLane sütt dat in un kann ok wohraftig de Leitsteed in Dutt scheten, man de Nova neiht wieter op de Eer to. Op de Eer warrt de Diskusschoon üm’t Evakueeren jümmers duller: blots noch veer Daag sünd dat, bit de Katastroof över jem rinbreken deit.

McLane hett aver noch en Infall, de liekers aver levensgefährlich is: Mit de Orion will he in de Flaagbahn vun de Nova flegen üm dor Antimateriebomben aftosmieten, um ehr ut de Bahn to smieten. De Plaan geiht aver nich ganz op un de Orion kriggt böös een mit. As de Laag nu jümmer utsichtsloser warrt, hett McLane noch en letzte Idee: He lett de Orion mit Energie opladen un stüert dat Schipp direkt op de Nova to. De Mannschop geiht an Boord vun de beiden Lancets un versöcht sik na de Hydra dörtoslahn in de Hapen, dat Schipp wedder flott to kriegen.

De Orion explodeert, as se op de Nova stört un maakt ehr mit tonichten. Op de Eer herrscht nu grote Freid, as se mitkriegt, dat de Nova nich mehr dor is. Man togliek gifft dat ok Truer, vun wegen dat annahmen warrn mutt, dat McLane un sien Lüüd dood sünd. De finnt in de Twüschentiet aver wohrhaftig na de Hydra, reddt jemehr Mannschop un fleegt dormit torüch na de Eer. Dor kriegt se an’n Enn en ne’et Schipp, de Orion 8, mööt sik aver noch mit de Bürokratie rümslahn, vun wegen dat McLane meist en Dutz Verlustmeldungen för de Orion 7 utfüllen mutt.

De eerste Utstrahlen weer an’n 1. Oktober 1966 mit en Inschaltquoot vun 43 %. Speelbaas weer Theo Mezger.

Hüter des Gesetzes ännern

De Kru vun de Orion is to’n Wieterbilln na’n Kurs över en ne’en Arbeitsroboter schickt worrn, as se en Naricht vun TRAV kriegt, dat se den Opdrag hebbt, in’n Ruumafsnitt 12M8 sössteihn Ruumsonden to kontrolleeren. As se dor ankamen sünd, övernehmt Shubashi un Legrelle de eerste Schicht un fleegt mit’n Lancet na de Sonden. Man denn kummt de Ruumfrachter Sikh 12 bi de Orion vörbi ünner dat Kommando vun Commodore Ruyther, en fröheren Baas vun McLane. De hett jüst’n Ladung Ierz vun’n Planetoiden Pallas opnahmen, glöövt aver, dat dor was nich stimmt, vun wegen dat he letzt mol blots den Schutt an Boord nahmen harr un sik de Lüüd op Pallas nich mehr bi em meelt. McLane beslutt op Pallas natokieken, wat dor los is. Man, dat keeneen op de Erd wat vun dien Wegblieven markt, driggt he Shubashi op, mit de Lancet en Energiefeld to tügen, dat so groot is as de Orion –’n ollen Ruumfohrertrick: („Laurin lett gröten“, en Anspelen op Laurins Tarnkapp).

De Orion flüggt also wieter na de Pallas, woneem se in de ünnerirdischen Anlagen vun twee Arbeitsroboters mit Wapen insparrt warrt. Dat dröff gor nich wesen, vun wegen dat Roboters so programmeert sünd, dat se Minschen nix doot. In de Stollen finnt se ok de vermissten Bargarbeiters. Dat de Roboters dat Regeer övernahmen hebbt liggt doran, dat se mitankieken müssen, as bi’n Striet Minschen doodschaten worrn sünd. Dorbi is dat to’n Kunflikt vun de Robotergesetten kamen un de Programmeeren is dör’n Tüdel kamen.

Wiel de Mannschop beraat, wat se doon kann, geiht op de Lancet langsom de Energie to Enn, man liekers ünnerstüüt Shubashi wieterhen den „Laurin“. Op Pallas künnt Jagellovsk un McLane dör en List de Roboters wedder ümprogrammeren un de Laag dor wedder in Orden bringen. Se maakt sik wedder op’n Weg torüch na de Lancet. Dor sütt dat böös ut, vun wgen dat de Energie meist opbruukt is un de Schuulschild tosamenbroken is. In letzte Sekunn warrt se vun de Orion rett un se all künnt torüch na de Eer flegen. Dor aver hebbt se jem al stünnenlang söcht un ok al en grote Söökakschoon inleidt, vun wegen dat de Insatzbefehl gor nich för de Orion bestimmt wesen is. Opletzt sünd all tofreden, as de Orion sik mellt, ok wenn General Wamsler den Trick mit den „Laurin“ in de Twüschentiet al spitz kregen hett.

De eerste Utstrahlen weer an’n 15. Oktober 1966 mit en Inschaltquoot vun 53 %. Speelbaas weer Theo Mezger.

Deserteure ännern

To’n Angang vun de Episood warrt op de Orion en nee Wapen inboet, de Overkill nöömt, un ok glieks utprobeert warrt. To de sülven Tiet steiht Commander Alonzo Pietro op de Eer ünner Verdacht, dat he to de Frogs överlopen wull. He weer jüst noch rechttietig vun en annert Ruumschipp affungen. Man Pietro seggt, he weet dor nix mehr vun.

McLane kriggt nu den Opdrag, Overkill op de Ruumstatschoon M8/8-12 in’n Vesta-Afsnitt optoboen. Mit jem flüggt de Bregen-Fackmann Prof. Sherkoff, vun wegen, dat in dat Rebeet in de letzten Tiet faken Lüüd vun’n Ruumkoller befallen worrn sünd. He schall üm beobachten un to Noot ok ingriepen. Sigbjörnson blifft to Wacht op dat Schipp, warrt aver op eenmol mööd in slöpt in. Waak warrt he wedder, as McLane em över Funk seggt, dat he den Kurs vör de nächste Ruumstatschoon programmeren schall. Man, as McLane den Kurs kort vör’t Afflegen noch mol nakiekt, markt he, dat de Kurs vun de Basis vun de Frogs ingeven worrn is.

Jagellovsk sütt Sigbjörnson glieks as’n Verrader un övernimmt dat Regeer an Boord. Man gliektietig geiht de Monti an’n Reekner un gifft ok wedder den Kurs in. Ok he seggt achterran, dat he dor nix mehr vun weet. De Professer hett en Idde un segg nu to Tamara, dat se sik an’n Reekner stellen schall. Ok se gifft den Kurs na de Frogs in, un dat warrt nu kloor, dat de Frogs den Willen vun de Minschen manipuleeren künnt.

Dorbi kummt nu McLane ok en Infall, neemlich, dat de Orion so doon schall, as wull se överlopen, üm den Stüttpunkt vun de Frogs to finnen un mit Overkill tonichten to maken. Op de Eer markt de Lüüd dat natürlich un schickt de Hyra ünner van Dyke achterran, üm de Orion doran to hinnern. Se kummt aver nich so wiet, vun wegen dat se vun de Frogs affungen warrt. De Orion kann dat Teel also tonichten maken.

De eerste Utstrahlen weer an’n 29. Oktober 1966 mit en Inschaltquoot vun 56 %. Speelbaas weer Theo Mezger.

Kampf um die Sonne ännern

Op de Eer stiegt de Temperaturen un gliektietig finnt de Orion op den Planetoiden N116a unvermodens neddere Vegetatschoon vör. De hogen Temperaturen laat Gletscher smölten und so draut op de Eer grote Katastrofen. Da warrt vermoodt, dat de Sünn künstlich ophitt warrt, un de Orion schall den Planetoiden-Gördel ünnersöken. Dorbi stööt se op N 108 op en frömme Lancet un twee Mannslüüd mit Wapen, de sik as Wetenschopplers utgeevt. Se warrt na de Eer bröcht un utfraagt. So warrt klor, dat de beiden vun den Planeten Chroma kamt, woneem en minschliche Rass leevt, de vun ehmolige Rebellen ut de galaktischen Kriegen afstammt.

Op Chroma is dat nu so, dat jemehr egen Sünn jümmer köller warrt un dormit de Levensgrundlaag swinnt. Dorüm hebbt se Experimenten mit de Sünn vun de Eer maakt. För de Regeren op de Eer gifft dat blots een Weg: en Präventivslag gegen Chroma, vun wegen dat dor blots Verbrekers leevt, McLane Will dat hinnern un flüggt mit Tostimmen vun’n GSD-Baas Villa op egen Verantworten mit de beiden Wetenschopplers na Chroma. He finnt dor en Matriarchat vör un McLane mutt mit en Regeerensbaas’sche verhanneln. Se lett sik nich recht övertügen, vun wegen dat dat ok üm dat Överleven vun ehr egen Welt geiht.

Man, vun de Eer geiht de Präventivslag los. Villa informeert Jagellovsk doröver, de dorophen in mit een vun de Wetenschopplers bi de Regeeren op Chroma inbrickt, üm McLant to warnen. Se warrt dorbi aver fangen nahmen un kummt tosamen mit McLane in’t Gefängnis. Vun wegen dat se beide glöövt, dat dat mit jem nu vörbi is, gifft Tamara to, dat se sik in Mc Lane verkeken hett un küsst em. Man de Baas’sche vun Chroma seggt jem denn, dat se nageven hett un de Eer dat ok vertellt hett. De Orion dröff torüch na de Eer, man McLane mutt för unbestimmte Tiet as „Sünnerbottschopper“ op Chroma blieven.

De eerste Utstrahlen weer an’n 12. November 1966 mit en Inschaltquoot vun 40 %. Speelbaas weer Michael Braun.

Die Raumfalle ännern

De Orion warrt wedder mol in’t All schickt, ditmol to’n Sammlen vun Sporen, üm Bewiesen för de Panspermia-Theorie to finnen. Mit an Boord is Paul Ibsen, de Swiegersöhn vun’n Minister, de as Science-Fiction-Schriever op de Söök na Stoff för wietere Romanen is. McLane hollt dor nich veel vun, kann aver nix dorgegen maken. In’t Teelrebeet in de Neeg vun’n Maand Umbriel fangt de Mannschopp mit de Arbeit an. Ibsen fraagt McLane, wat he mol mit en Lancet flegen dröff, un na en beten Tögern seggt he em dat to, hollt am liekers aver op’n Leddstrahl fast. Ibsen schalt den aver af un lannt op’n Planetoiden Mura, vun den aver nich mehr wegkummt.

Mura is en Straafkolonie för Verbannte un Ibsen warrt dor vun de Verbrekers fangen nahmen. He warrt mit Omikron-Strahlen ünner Druck sett un seggt opletzt de Orion-Kru Bescheed woneem he is un dat se em hollen mööt. De Mannschop warrt ok glieks fangen sett un McLane kummt nu twüschen den Omikron-Strahler, mit den de Tourenne, en verbannten Wetenschoppler, em langsom doodquälen will. Sien Plaan is, mit de Orion na de Frogs to flegen, üm jem sien Technik antobeden. McLane kann em aver besnacken, dat he ahn sien Mannschop de Orion gor nich flegen kann. Tourenne lett sik dorop in un bringt jem mit en poor vun sien Lüüd an Boord, üm sik de ne’en Systemen wiesen to laten. Üm de Flucht to hinnern, gifft dat över Mura en Magnetschild.Man de Orion-Kru kann en Lancet an den Shcild to’n exploderen bringen un denn sülvst mit de Orion utneihn. De Orion warrt düchtig dörschüttelt, wat de Mannschop utnütt, üm de Verbrekers ünnertokriegen.

De eerste Utstrahlen weer an’n 26. November 1966 mit en Inschaltquoot vun 51 %. Speelbaas weer Theo Mezger.

Invasion ännern

McLane is jüst bi General Wamsler, as en Nootroop vun dat Ruumschipp Tau oplöpt. An Boord sünd Oberst Villa un acht wichtige Lüüd vun’n Sekerheitsdeenst op Geheemmisschoon. Villa bericht vun gau wesseln Gravitatschoonsfeller un glöövt an’n Angreep vun de Frogs. In en Lancet willt se de Statschoon Gordon anflegen, denn brickt de Verbinnen af. Dat warrt annahmen dat Villa un sien Lüüd dood sünd. Villa un sien Lüüd kamt as eenzige dör un sünd ’n poor Daag later wedder torüch op de Eer. In en Beraden seggt Villa nu aver, dat se in’n ganz gewöhnlichen Lichtstorm kamen weern un dat nix mit de Frogs to doon harr. McLane kummt dor nich recht mit un bestieht op wietere Ünnersöken, kummt aver nich dormit dör.

Bito warrt nu vun’n GSD Starts vun Ruumscheep ünnerseggt un se öbernehmt ok de Kontroll vun de Startbasen. McLane sütt sik in’t Recht un maakt sik Sorgen, dat dat en Putsch dör Villa geven künn. üm em op de Proov to stellen, fraagt he direkt bi Villa an, wat he doch wegflegen dröff un fraagt Tamara, dat se sik in’t Büro na Bewiesen ümkieken schall. McLane kriggt Verlööf to flegen un dröff sogor den böversten Ingenieur Kranz mitnehmen.

Tamara kriggt nu wohrhaftig wat rut, man dat weer en Fall un se warrt fastnahmen. Mc Lane kummt opletzt in de Neeg vun Gordon an un finnt dor Ruumscheep vun de Frogs, de ut all Richten kamt. Villa plaant ogenschienlich en Invasion op de Eer. Kranz öbernimmt an Boord dat Regeer un dwingt McLane, wieter na Gordon to flegen, üm de Frogs de Overkilltechnik to wiesen. Sigbjörnson sabotteert aver den Andrief un se künnt blots noch mit halve Kraft flegen. To glieken Tiet kann Tamara op de Eer en Spreekverbinnen schalten, so dat TRAV vun de Invasionsplaans Wind kriegt. Se künnt den GSD överraschen und jem fangen setten, man de Invasion lett sik nich ophollen.

De eenige Lösung is, den Leddstrahl op Gordon tonichten to maken, den de Frogs för jemehr Energieversorgen bruukt. De Orion-Mannschop kann Kranz utschalten un flüggt mit vulle Kraft wieter na Gordon. Mit Overkill künnt se de Statschoon Gordon tonichten maken un so den Vörmarsch vun de Frogs afwehren. An’t Enn warrt McLane wedder torüch versett na sien fröhere Eenheit un togliek ok to’n Oberst maakt. To’n Sluss küsst sik McLane un Jagellovsk un dat warrt andüüt, dat de beiden nu ok privat en Poor warrt.

De eerste Utstrahlen weer an’n 10. Dezember 1966 mit en Inschaltquoot vun 39 %. Speelbaas weer Michael Braun.

Raumpatrouille in’n tiethistoorschen Rahmen ännern

Ut de hüütigen Sicht mag de Feernsehreeg eher komisch un kultig wirken. Dietmar Schönherr segg aver in en Interview, dat de Reeg to de Tiet woll eernst meent weer, ok wenn se mit Humor maakt weer. De Reeg is Enn vun de 1960er un Anfang vun de 1970er Johren vun de Sichtwies, de in de Kulturpolitik begäng weer, teemlich negativ beweert, bit hen to dat Prädikat „faschistoid“.

To dat 40-johrige Jubiläum vun de Reeg harrn all Bedeeligten, de noch leven deen, de Mööglichkeit över de Produkschoon mit groten Tietafstand noch mol natodenken. De WDR hett an’n 17. September 2006 en Sennen vun een Stünn in sien Hörfunkprogramm utstrahlt, de en poor Maanden later vun Düütschlandradio Kultur wedderhaalt worrn is un in de Twüschentiet ok as Höörbook to köpen is. De Titel dorvun weer „Raumpatrouille – Die phantastische Geschichte des Raumschiffes Orion. Eine Fernsehlegende wird 40.“ De Medienjournalist un Schriever Robert H. Bales hett mit Schauspelers as Dietmar Schönherr, Eva Pflug, Wolfgang Völz oder Charlotte Kerr-Dürrenmatt snackt, man ok mit Lüüd, de achter de Kamera stahn hebbt, as den Speelbaas Theo Mezger, den Tricktechniker un hüütigen Produkschoonsdesigner Götz Weidner oder den Komponisten Peter Thomas.

Produkschoon ännern

De Feernsehreeg is 1965 in swart-witt mit för de dormolige Tiet veel Kreativität un Opwand dreiht worrn. Eenige Szenen sünd al mit dat Bluescreen-Verfohren herstellt worrn un müssen dorüm in Farv dreiht warrn. De Bavaria-Baas Helmut Jedele hett na Co-Produzenten söcht, vun wegen dat de plaanten Produkschoonskosten vun 360.000 DM för een Folg to hooch weern för den WDR, de anfangs as Hööftproduzent dacht weer. Funnen weer de franzöösche ORTF, de sik mit 20 % an de Kosten bedeeligen de. Dorför sünd eenige Szenen sünners för de franzööschen Tokiekers parallel maakt worrn. To’n Bispeel weer in de föfften Folg de Baas’sche vun Chroma in de franzööschen Faten vun Christiane Minazzoli speelt worrn, in de düütschen vun Margot Trooger. In Frankriek hett de Reeg Commando spatial – Les aventures fantastiques du vaisseau d'espace ORION heten.

De Trickeffekten un Utstatten, de för de dormolige Feernsehwelt meist spektakulär weern, laat een vundaag en beten smuustern. Dor geev dat to’n Bispeel frömd maakte Plettiesens un Bliekstickenspitzers as Amaturen oder Plastikbekers as Dekenlampen. De Rangafteken an de Uniformen weern Stücken vun Lockkorten för EDV-Systemen. Klockenpennels mit Metallkugels op’n zylindrischen Stift, de op’n Kopp stahn deen, weern as Fohrhevels bruukt. Un ok Waterhahns un Gorrnrullen weern in de Dekoratschoon verbruukt. De Kunststoffkulissen in de Kommandekanzel vun de Orion sünd mit de dormols ganz ne’en Thermoformen maakt worrn.

Dreiht worrn is de Feernsehreeg to’n gröttsten Deel in de Bavaria Film- un Feernsehstudios in Geiselgasteig. De Butenopnahmen sünd an de folgen Öörd maakt worrn:

  • Slott Höhenried: Planet Chroma in Episood 5 „Kampf um die Sonne“
  • Königsplatz in München: Deel vun de Ruumschippbasis 104
  • Pechkohlen-Barghalde in Peißenberg: ü.a. Lannenrebeden op Pallas in Episood 3 „Hüter des Gesetzes“, Mura in Episood 6 „Die Raumfalle“ un de Planetoiden N 108 un N 116a in Episood 5 „Kampf um die Sonne“. Disse Szenen schülln egentlich op Iesland dreiht warrn, man wegen de Kosten sünd denn doch lever Afruumhalden bruukt worrn.
  • Aquarium Berlin: Dor sünd de Opnahmen vun de Fisch un Schildpadden maakt worrn, de achter de Finster vun’t Starlight-Casino un in McLanes Huus to sehn weern.
  • Golfplatz vun en Golfclub in Feldafing: Lannenrebeet op Chroma in Episood 5 „Kampf um die Sonne“

För de Opnahmen geev dat de Orion as Modellen in dree Grötten mit Dörmetern vun 60 cm bit 1,60 m. Dat Set vun’n Kommandostand harr en Dörmeter vun 28 m. För de elektrischen Schaltungen sünd 3200 Gleihlampen un 10.000 m Kavel inboet worrn. An eenige Steden gifft dat Ventilen vun en Mischbatterie un annere Kuriositäten, de ut’n Bomarkt stammt, ünner annern ok en groten, klobigen Thermostat, as de för de 1960er Johren tyypsch weer.

Trickeffekten ännern

För de Trickeffekten sünd to’n Deel optische Printers bruukt worrn, üm de ünnerscheedlichen Szenen tosamentosetten. To’n Deel weern ok Tekentrickelementen insett, as bi de Strahlenwapen un de Magnetstörm. Ok Modelltrickopnahmen un Matte-Opnahmen sünd bruukt worrn, bi de en Deel vun’n oorsprünglichen Achtergrund dör en annert Bild uttuuscht warrt. So ist to’n Bispeel de Bodden vun de Ünnerwaterbasis 104 för de Orion egentlich de Königsplatz in München. Disse Szeen besteiht ut dörteihn Deelen, de bi’t Nabearbeiten tosamensett worrn sünd. Alleen dat Ruumschip Orion bestünn al ut fief Deelen.

Astroschiev ännern

Op de Schiev weern ünnerscheedliche Szenen to sehn, as de Countdown oder de Overkill-Test. Se bestünn ut en witte Platt vun 1.60 m Dörmeter. Över de Platt weer in de Dekoration en Lock utsneden, wo en Spegel in hüng. Över den Spegel is mit’n Fimprojekter de Szeen afspeelt worrn, de vörher al opnahmen weer.

Frogs ännern

De Frogs weern vun Schauspelers dorstellt, de drange, blaue Antög dragen hebbt. Se weern mit en Cinemascope-Lins in de Läng togen. För dat Blenkern is op en Holtrull Gleem (blenkern Partikels) opkleevt worrn, de langsom dreiht (eenmol link rüm, eenmol rechts), versett un unscharp opnahmen weer. De beiden Opnahmen weern överenanner leggt un mit de Bluescreen-Technik op de langtogen Ümreten vun de Schauspelers kopeert.

Laserstrahlen ännern

 
Laserwapen HM-4 (Resin-Modell)

In eenige Folgen warrt mit den Handlaser HM-4 schaten. De Laserstrahlen sünd mit en opwännige Technik maakt worrn: Op en Lüüchtkasten is swarte Papp kleevt worrn, in de en dünnen Schlitz sneden weer. Ünner den Lüchtkasten weer en tweete Schiev ut Melkglas, de dreiht warrn künn. In’t Stop-Motion-Verfohren is de Schlitz nu mit en annert Stück Papp stück för Stück grötter maakt worrn. Togliek is de Melkglasschiev bi jede Opnahm wieterdreiht worrn. So is na un na en Laserstrahl mit ünnerscheedliche Konturen tostannen kamen un weer denn in de Opnahmen rinkopeert.

Lichtstorm ännern

För den Lichtstorm in’n eersten Deel is de Orion in’t Bluescreen-Verfohren filmt worrn. För den Storm weern Rieskoorns smeten, mit en Highspeed-Verfohren opnahmen un achteran wedder mit normale Snelligkeit afspeelt.

Omikronstrahlen ännern

För de Strahlen vun’n „Omikronstrahler“ in Episood 6 is de Film achteran Bild för Bild mit en Raseerkling nabearbeit worrn. Jede enkelte Strahl is vun Hand in den fardigen Film inritzt worrn.

Overkill ännern

För den Overkill in de Folgen 4 un 7 is en Gipskugel an en Steed holl maakt un mit Rosinen, Ries un mahlen Kaffee opfüllt worrn. Mit Pressluft is de Füllen den wegpuust worrn. En Highspeed-Kamera hett dat opnahmen un naher is dat wedder mit normale Snelligkeit afspeelt worrn.

Roboter ännern

För de Roboters in de Episoden 3 un 4 sünd eenfacke Attrappen ut Papp un Holt insett worrn, de in’t Maat 1:1 an dünne Fadens ophangen weern – de in de Naprodukschoon wedder rutmaakt weern – oder vun achtern afstütt weer, dat dat för de Kamera nich to sehn weer. Stahn künnen de Roboters nich, man för eenige Opnahmen weern welke brukkt, de sik bewegen künnen. Dorför geev dat en Modell, woneem achtern een rinkladdern künn, de de Arms bewegen de. De rechte Arm weer en normalen Iesportschoonslepel un de linke Arm weer en Deel vun en Geboortstang. Dat geev blots twee Roboters in Originlgrött, de ut Holt maakt weern. Annere Modellen vun 30 cm Grött sünd mit Stop Motion animeert un in de richtigen Proportschoon in eenige Szenen rinkopeert worrn. Dordör keem de Indruck, dat de Roboters sweevt. Wenn een nipp un nau henkiekt, markt man dat de rinkopeerten Roboters keen Schadden wiest.

Supernova ännern

För de so nöömten Supernova in Episood 2 is en Holtkugel mit Brandmasse inkliestert un an en Seel ophangen worrn. För Den Füersteert is en Striepen ut Blick ok mit de Brandmasse insmeert un affilmt worrn. de beiden Opnahmen sünd later tohopensett worrn.

Ünnerwaterbasis 104 ännern

 
Kopeerschema vun de Szeen „Ünnerwaterbasis 104“: se weer in fief Evenen ut 13 Bänner tosamensett.

De Opnahmen för de Basis weern de mit den gröttsten Opwand an Tricktechnik: De Bodden, op den de Mitarbeiters löpen, weer de leddige Königsplatz in München, de 1965 aver noch anners utseeg as hüüt. De weer to de Tiet noch mit grote Granitplatten utleggt. De Arbeiters weern dor vun en hoge Positschon filmt. De Szeen weer ut dörteihn Filmbänner in en optischen Printer tohopensett. Dat weern ü. a. de Fro in’n Vördergrund, de belüüchte Achtergrund, De Opnahm vun’n Königsplatz, de Orion, de Lannenschacht un en poor Masken un Gegenmasken as op dat Schema to sehn is.

Start ut dat Water ännern

För den Start vun de Orion weer en Foto vun dat Ruumschipp utsneden un op en Glasplatt kleevt. Dorachter weer en lütt Brett mit dree Alka-Seltzer-Tabletten monteert un denn allens tohopen in en Küvett induukt. Opnahmen worrn is dat mit en Kamera, de koppöver stünn, dat dat ütseeg, as en de Luftblasen na ünnen güngen. Üm de Bewegen vun de Orion beter rutkamen to laten is achter de Küvett en bemalten Achtergrund bewegt worrn.

De Krüsel in’t Water weer in en Versööksanlaag för Waterdynamik an de Technischen Hoochschool München maakt un mit en Cinemascope-Lins mit 120 Biller in de Sekunn tarrt opnahmen. Bi’t Afspelen mit normale Snelligkeit tüüg dat den Indruck vun en bannig groten Waterkrüsel in de See. Dat dat Water mehr na de See utsehn de, is dat infarvt un mit starke Schiensmieters anstrahlt worrn. Dat lichte Krüseln op de See weer dör en Ventilater maakt, de op de Waterböverflach puusten de. De Orion sülvst is eerst later in’t Bild kopeert worrn.

Dekoratschoon ännern

Hööftverantwoortlich för de Dekoratschoon weer Rolf Zehetbauer, en vun de bekanntsten Filmarchitekten ut Düütschland. De gröttste Deel vun de Kuliss weer ut den Kunststoff Accuplan maakt. Dorför is de Technik vun’t Deeptehverfohren insett worrn, dat to de Tiet noch nee weer.

In de Kommandostatschoon vun de Orion weern tosamen 22 Anspitzers vun’n Tyyp 322 vun de Firma Dahle as Bedeenelementen inboet. In de zentralen Eenheit vun’n Kommandostand un ok as Proovredschop bi’t Inboen vun Overkill weer en Rowenta-Plettiesen as Dekoratschoon bruukt. De Kommandokanzel weer de gröttste Dekoratschoon mit en Binnenmaat vun meist 10 Meter un en Butenmaat vun 28 Meter. Se stünn op en 60 cm hooch Gestell, üm de tosamen 10.000 m Kavel to versteken, de för dat Set bruukt worrn sünd. För de Produkschoon weer ok en grote Tall vun hoochweertige Designermöbel, -glääs un -lampen insett. So hett de Kru to’n Bispeel op fief Designersöhl vun’n Tyyp Karusseli vun Yrjö Kukkapuro seten, de mit tosätzliche Chromdelen höger maakt weern.

Musik ännern

De Filmmusik to de Reeg is vun Peter Thomas komponeert worrn. De eerste Langspeelplatt, de al 1966 rutgeven weer, is bannig opwäänig opmaakt worrn. De Hüll weer tovn Apenklappen un wies Szenenfotos binnen un buten. Binnen in weer noch en wietere Siet mit Tosatzinforamtschonen inarbeit. Op disse Eerstutgaav weern 18 Musikstücken. In de Johren dorna sünd de Single un de LP mehrmols nee opleggt worrn. In de Twüschentiet gifft dat den Soundtrack ok mehrfack op CD, wobi de letzte Publikatschoon ut dat Johr 2003 mit den Ünnertitel „The Complete Music“ Titel bargt, de bit dorhen nich publizeert weern (t. B. „Mars Menuett“, „Enter The Crew“, „Attention Frogs!“)

Wietere Produkten ännern

Romanen ännern

De söven Original-Episoden un wietere utdachte Aventüers vun de Orion sünd toeerst as Taschenböker rutkamen. Vun 1972 an weern de Tachenböker as Hefte nadruckt un wieterföhrt. Vun de tosamen 145 Folgen sünd blots de Bännen 46 bit 81 exklusiv as’n egene Heftreeg rutbröcht worrn. De Rest weer Deel vun de Heftreeg Terra Astra.

De Schrievers kemen ut dat Ümfeld vun de Perry Rhodan-Reeg. En groten Deel vun de Romanen wer vun Hans Kneifel schreven, de de eersten 41 Delen alleen produzeert hett. Dorbi hett he sik de Freeheit verlööft, enkelte Saken un Elementen vun’n Inholt mit rintonehmen, de in de Feernsehreeg nich vörkamen sünd. He hett de Räng, Deenstbeteken un ok Schrievwiesen ännert. So tuuschen Wamsler un Kublai-Krim de Räng un ut Cliff Allister McLane möök he Cliff Allistair McLane.

Fotoroman ännern

In de Heftreeg TipTop, de vun Rolf Kauka rutgeven worrn is, sünd de eerste veer Episoden vun Raumpatrouille as Geschicht to’n Wietermaken mit Biller rutkamen. As TipTop instellt worrn is, sünd de restlichen Episoden in Fix und Foxi – Super TipTop Band 6, ünner den Titel Raumpatrouille Orion rutbröcht worrn.

Kino ännern

För dat Kino is in’t Johr 2003 en Tosamensnitt vun mehrere Folgen ünner den Titel Raumpatrouille Orion – Rücksturz ins Kino publizeert worrn.

Afkörten un Beteken in de Reeg ännern

  • EAS = Erd-Außen-Station
  • GSD = Galaktischer Sicherheitsdienst
  • MZ4 = Megasatellit Zaragoza Vier, en Relaisstatschoon in’t All
  • ORB = Oberste Raumbehörde
  • RXQ = Eilmeldung mit höchster Priorität
  • TRAV = Terrestrische Raumaufklärungsverbände

Anners wat ännern

In de Johren 1992 un 1993 weern in’n Rahmen vun’n dormoligen Bavaria Filmpark in Bottrop-Kirchhellen-Feldhausen Deelen vun de Kulissen as ok Vörföhren un Simulatschonen in en Themenhuus mit den Naam Orion II to sehn.[1]

Literatur ännern

Weblenken ännern

Borns ännern

  1. Informatschonen to Orion II in’n Bavaria Filmpark, Bottrop afropen an’n 06. August 2009