Roland Trimen

Roland Trimen (* 29. Oktober 1840 in London; † 25. Juli 1916 Epsom bi London) weer en brietsch-süüdafrikaansch Entomoloog un Lepidopteroloog, bekannt för dat Utforschen vun de süüdafrikaansch Bottervagels.

Roland Trimen

He weer de Bröer vun den Botaniker Henry Trimen un vun Mary Elizabeth Barber un gung in Rottingdean und Wimbledon (King' College School) to de School. Wegen en chronischen Krankheit gung he nah Süüdafrika, wo he as Freewilliger ünner Edgar Leopold Layard de Käfersammlung vun dat South African Museum ordnen dee. Af 1860 weer he in de apenlich Verwalten tätig un wurr later Privatsekretär vun Richard Southey un af 1873 Sekretär vun Henry Barkly (1815–1898), den Gouverneur vun de Kapkolonie.

1866/67 un af 1873 weer he in Deeltiet Kurator vun dat South African Museum. Mit dat Museum kunn he sück aber blots en Dag befaaten, bit he 1876 Kurator in Vulltiet wurr, wat he bit 1895 bleev. Gesundheitsgründe hemm hüm dwungen, weer nah England torüch to gahn.

He hett Bottervagels ut Süüdafrika (besünners Kapkplonie) beschreeven un klassifizeert, woröver he mit den Offizier un Sammler James Henry Bowker (1825–1900) en Monographie in dree Bände herutbroch, in de 380 Aarten beschreeven wurrn, un in anner Deelen vun Afrika (as Madagaskar, Mauritius, Namibia, wo he de Sammlung vun Axel W. Eriksson bearbeiten dee). He hett sück mit Mimikry un Ornithologie befaat.

He hett sück aber ok mit Wien-Schädlingen un Orchideen-Bestuuven befaat, wat to Korrespondenz mit Charles Darwin führen dee. Doröver herut weer he ok Botaniker.

1897/98 weer he Präsident vun de Entomological Society of London. He weer Fellow vun de Linnean Society un de British Association for the Advancement of Science. 1882 wurr he Fellow vun de Royal Society un 1910 kreeg he de Darwin-Medaille. He weer Grünnensliddmaat un 1883/84 Präsident vun de South African Philosophical Society. 1908 wurr he Honorary Fellow vun de Royal Society of South Africa. 1899 kreeg he en Honorary M.A. vun de Oxford University.

Sien Bottervagelsammlung keem an den Privatsammler James John Joicey (1870–1932). En groo Deel vun Joicey sien Sammlung keem an dat Natural History Museum. Trimen hett as eerst de Bottervagel-Gattungen Deloneura, Durbania un Erikssonia un de Aarten Libythea laius un Orachrysops niobe beschreeven.

Schriften (Utwahl)

• mit James Henry Bowker: South-African Butterflies, 3 Bände, London: Trubner, 1887 bis 1889, Biodiversity Library

Weblinks

• C. Plug: Triman, Mr. Roland, Biographical Database of Southern African Science