Schnittberichte.com
Schnittberichte.com is en Websteed in hoochdüütsche Spraak, de sik vör allen mit Ünnerscheden vun verschedene Snittfaten vun Filmen, Feernsehregen, Musikvideos, Comics un Reeknerspelen befaten deit. Bito maakt de Bedrievers ok Narichten un Reviews to de verschedenen Medien publiek. Anfang Januar 2014 weern 8970 Snittberichten op de Websteed to finnen.
Achtergrund ännern
Tallrieke Filmen un annere Medien gifft dat in mehrere verschedene Snittfaten. So kann dat wesen, dat to’n Bispeel en Film rutkamen is nadräglich för’t Feernsehn oder för den Verkoop op DVD oder VHS noch eenmol nasneden warrt. Tomeist warrt dorbi de Film kört, vunwegen dat Szenen, in de Sex oder Gewalt dorstellt warrt, rutnahmen warrt. Disse Vörgang is en Oort vun Sülvstzensur, wobi de originale Filmfaten (Final Cut) normalerwies as „nich-sneden“ betekent warrt, üm se vun zenseerte „snedene“ Faten aftogrenzen.[1]
Dorto gifft dat ok Snittfaten, de ut dat Original-Filmmaterial (Footage), dat noch gor nich sneden weer, nee tohopenstellt warrt. In disse Faten künnt denn ok Szenen binnen wesen, de vörher noch nich wiest weern, so as bi’n Director’s Cut. Op de Oort kann en annere Faten ok länger wesen, as de originale Film.
Inholten vun de Websteed ännern
De Websteed baseert op en System vun freewillige Schrievers, de jemehr Berichten sülvst maken doot. An eenige Berichten sitt de Schrievers mehrere Daag.[2] In’n Karn stünn in de verleden Johren de Vergliek vun de Tweetpublikatschonen vun verschedene Langfaten, de vun de Filmprodukschoonssellschoppen ut ökonoomsche Grünnen maakt weern.
Dorbi warrt Szenen, de sneden worrn sünd, mit Biller vun dat snedene Material wiest un kort verkloort. Butendem warrt ok zenseerte Spelen (faken de düütsche Faten) mit jemehr nich zenseerten Faten vergleken.[3] Jüst so warrt ok verschedene Faten vun Feernsehregen, Musikvideos un Comics vergleken.
De Websteed bringt jeden Dag en List mit de Feernsehzensuren in Free- un Pay-TV rut, de an den Dag vun morgens Klock söss bit Klock söss den nächsten Morgen lopen doot. Dorbi warrt op de Öllersfreegaven henwiest, wenn wegen de Tiet vun’t Sennen Szenen rutsneden worrn sünd. Bito warrt op de naue Beteken henwiest, wenn dat vun dat Wark mehrere Faten gifft, so as Director’s oder Extended Cut. De Berichten baseert op Insichten oder fröhere Utstrahlen vun den Film op en Sennergrupp. Blangen de News jeden Dag gifft dat för en unregelmatige Tall vun Daag ok en Vörschau, splitt na Free- un Pay-TV.
Historie ännern
Ünner den Naam Schnittberichte.de is de Websteed in’n März 2000 to’n eersten mol in’t Nett gahn. Man, de Siet weer in’n Mai 2002 slaten, vunwegen dat de Biller vun snedene Szenen faken bannig Gewaltdorstellen wiesen, wat nich mit dat düütsche Jöögdschuulgesett övereen to bringen weer. An’n 6. Januar 2003 is de Websteed vun den öösterriekschen Bedriever Gerald Wurm ünner den hüütigen Naam wedder opnahmen worrn. Se fallt nu ünner dat öösterrieksche Recht. Siet Anfang 2008 gifft dat mit Movie-Censorship.com ok en engelsche Faten vun de Websteed.
Rezepschoon ännern
De Stuttgarter Zeitung hett dorop henwiest, dat de Bedrievers vun de Siet nix mit Zensur an’n Hoot harrn. Op de Websteed künn een nakieken, wat wegsnibbelt worrn is. Bito künn een in’t Forum över den Nütten un Weert vun de snedenen Biller diskuteren. Man müss ok nich de glieke Anischt hebben as de Bedrievers, aver so kreeg man en beteren Överblick över de Filmzensurdiskusschoon.[4]
För de apentliche Diskusschoon to dat Thema Horrorfilmen heebt de verschedenen Kommunikatschoonsformen in’n Internett blangen de klass’schen Medien an Bedüden wunnen. So nöömte knowledge communities hebbt Formen vun kollektive Intelligenz utbillt. Dör multinatschonale Diskusschoon warrt de Inschränken dör’t Gesett in’t egene Land vergliekborer mit annere Länner. So kann een dat beter beweerten.[5]
Weblenken ännern
- Schnittberichte.com (hoochdüütsch)
- Movie-Censorship.com (engelsch)
Borns ännern
- ↑ Cut oder Uncut?, in: Telepolis.de vun’n 13. Mai 2004 afropen an’n 23. Februar 2011)
- ↑ Beschnitten!. In: Kölner Stadtanzeiger, 17. Februar 2005.
- ↑ Deutsches Call of Duty 6: Activision verschwieg Änderung. Golem.de, 6. November 2011 (afropen an’n 23. Februar 2011).
- ↑ Ins Netz Gegangen. In: Stuttgarter Zeitung, 4. März 2002, S. 16.
- ↑ Peter Riedel: Horrorfilm, S. 424 - 430, in: Christian Schicha und Carsten Brosda: Handbuch Medienethik, Wiesbaden 2010, S. 426