Sigmundur Brestisson

Sigmundur Brestisson (* 961 in Skúvoy/Färöer; † 1005 in Sandvík ok dor; in de Literatur meist in'n färööschen Akkusativ Sigmund nömmt) weer en Hööftling vun de Wikingers. He leev up de Färöers un hett sik dor achter klemmt, dat in't Johr 999 de christliche Gloven up de Inselgrupp annahmen wurrn is.

Sigmundur Brestisson sien Graff warrt pleegt up’n Karkoff up Skúvoy.

Vertellt warrt vun em in de Färingersaga. Man dat is en unsekern Born. Avers dat twiefelt doch keen Forscher dor an, dat Sigmundur leevt hett un dat de Geschicht sik ungefähr so afspeelt hett, as se dor vertellt warrt.

Sigmundur is de Söhn vun Brestir. Sien Mudder hett Cæcilia heten. Freet hett he Turið Torkilsdóttir. Tohopen hefft se de Dochter Tóra Sigmundsdóttir un de Söhns Tórálvur, Steingrímur, Brandur un Heri harrt.

Nadem sien Vadder Brestir in't Vörjohr 970 vor Sigmundur siene Ogen up Stóra Dímun an'e Siet maakt wurrn weer as de Jung 9 Johre oold weer, keem he tohopen mit sien Vedder Tóri Beinirsson, Beinir sien Söhn, unner de Flunken vun Tróndur í Gøtu. Al in densülvigen Summer versoch Tróndur, de beiden Jungs los to weern un hett se den Koopmann Ravnur Hólmgarðsfari ut Norwegen to'n Slaven anbaden. Ravnur weer just in Tórshavn unnerwegens. Man he kreeg spitz, wat dat for Jungs weern un woll dat beter nich. Man he meen, he konn Sigmundur un Tóri na Norwegen bringen. Tróndur woll de beiden wiet weg hebben vun de Färöers, denn he weer bange, dat se molins Wraak öven wollen for den Moord an ehren Vadder. So betahl he de Överfohrt. As se in Norwegen weern, hefft se sik dor mit Hölp vun den norweegschen König Håkon Jarl up vörbereit', na de Färöers torüch to kamen. In't Johr 983 weer dat ok so wiet.

Den christlichen Gloven hett de Norwegerkönig Olav Tryggvason dör Sigmundur na de Färöers brocht. De König bestell Sigmundur an sien Hoff un besnack de Saak mit em. Sigmundur harr sik dat toeerst so vorstellt, dat he 998 up dat Allthing up Tinganes vörslahn woll, de Färinger schollen nu den neen Gloven annehmen. Man dor sünd de Lüde bannig in Brass kamen un hefft em meist dootslahn. Dor hett he sik anners wat overleggt un gung 999 mit 30 Lüde unner Wapen to den Hööftling Tróndur í Gøtu. Dor brook he s'nachts in sien Huus in un heel em dat Sweert unner'n Strott un meen: „Du warrst christlich, oder de Kopp kummt af“. So slump de Sak mit dat Christendom up dat neegste Thing.

1005 is Sigmundur vun Tróndur overfallen wurrn un möss midden in'e Nacht utbüxen un over den Suðuroyarfjørður nah Sandvík up Suðuroy swimmen. He versteek sik dor in Sigmundargjógv, wat later sien Naam kregen hett, man de Buer Torgrímur Illi hett em upspöört un em dootslahn un sien gullen Armring klaut.

Denkmalen ännern

Sigmundur sien Graffsteen is de so nömmte Sigmundarsteinur. He steiht up den Karkhoff vun Súvoy. Dor hannelt sik dat um een vun de wichtigsten Denkmalen ut dat Middeloller up de Färöers bi. Up den Steen sind keen Runen inschreven, man blot en Krüüz is dor mit'n Beitel inhaut.

Up'n Pingstmaandag 2006 sünd glieks dree Denkmalen for Sigmundur inwieht wurrn: Vor de Vesturkirkjan in de Hööftsadt Tórshavn, wo he toeerst dat Christendom inföhren woll, denn up siene Heimatinsel Skúvoy, wo he de eerste Karken boot hett, un in Sandvík, wo he dootslahn wurrn is. De dree Standbiller hett de Bildhauer Hans Pauli Olsen maakt.