South Park

South Park (op Platt so veel as „Süüd-Park“) is ene Feernsehserie ut de USA, de vun Trey Parker un Matt Stone maakt warrt. Se löppt in de USA siet 1997 op den Senner Comedy Central un siet 1999 in Düütschland op RTL. Jede vun de mehr as 140 Folgen ut de 10 Sesons duert 22 Minuten. Vun wegen den bösen Humor un de velen slimmen Schimpwöör dröff de Serie eerst laat an’n Avend in’t Feernsehn lopen. Op Plattdüütsch liggt de Serie nich vör.

Handlung

De Serie hannelt vun veer Jungs in’t Öller vun acht Johren, de in de lütte Stadt South Park in de Bargen vun Colorado leevt. Stan Marsh, Kyle Broflovski, Eric Cartman, Kenny McCormick gaht op de Grundschool un verleevt in jede Folg wille Aventüürs. Mehrsttiets is de Inholt absurd un kumplett överdreven. Dorbi warrt dat aktuelle Schehn un aktuelle Diskuschonen ut Politik un Sellschop opnahmen un op groteske Wies op’t Koorn nahmen.

Technik

De Figuren un Achtergrünn sünd eenfach hollen. Se bestaht ut tweedimenschonale Flächen, de bannig vereenfacht sünd. Dat lett meist so, as wenn de Figuren ut Papeer maakt wörrn un vör en Achtergrund ut Papeer hen un her bewegt warrt. To Anfang weer dat würklich so. Parker un Stone weren kene goden Tekners un müssen sik behelpen. Doch disse eenfachen Animatschonen hebbt to den Scharm vun de Serie bidragen. In de ne’eren Folgen sünd de Animatschonen mit dat Programm Maya maakt, doch de eenfache Stil is nich ännert worrn.

Historie

Dat eerste Maal hebbt Parker un Stone 1992 enen South-Park-Trickfilm schreven, as se noch Studenten an de Universität vun Colorado weren. Den hebbt se blots vör annere Studenten wiest. 1995 hebbt se wedder enen Film maakt. Ditmal weer dat gegen Geld för Brian Graden, de bi den Senner FOX arbeiden dee, de dat as Geschenk to Wiehnachten för siene Frünnen hebben wull. In’t Internett hett de lütte Film denn vele Lüüd funnen, de dat geern sehn hebben un sik högen, so dat Comedy Central South Park in Serie produzeren wull.

1999 keem en Kinofilm to de Serie rut. He heet South Park: Bigger, Longer & Uncut.

Weblenken

• Websteed to de Serie (engelsch)