Tell Them Willie Boy Is Here

Filmdaten
Plattdüütsch Titel:
Originaltitel: Tell Them Willie Boy Is Here
Düütsch Titel: Blutige Spur
Produkschoonsland: USA
Johr vun’t Rutkamen: 1969
Läng: 98 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Abraham Polonsky
Dreihbook: Abraham Polonsky
Produkschoon: Jennings Lang
Philip A. Waxman
Musik: Dave Grusin
Kamera: Conrad L. Hall
Snitt: Melvin Shapiro
Dorstellers

Tell Them Willie Boy Is Here (op platt so veel as „Segg jem, dat de Jung Willie hier is“; dt. Titel: Blutige Spur) is de Titel vun en US-amerikaansch Filmdrama vun Abraham Polonsky ut dat Johr 1969. Dat Dreihbook to den Western hett Polonsky na den Roman Willie Boy: A Desert Manhunt vun Harry Lawton schreven, dat 1960 rutkamen weer.

Inholt ännern

De Film speelt in Kalifornien in’t Johr 1909. Willie Boy is en Indianer, de wat mit Lola, en Witte, an’t lopen hett. He is eenmol mit ehr dörbrennt un nu will de Vadder em nich mehr sehn un warrt glieks argdenkern, as Willie wedder torüch kummt. As he Willie in de Nacht tofaten kriggt, as he buten mit Lola togang is, schütt Willie den Vadder in Nootwehr dood. Tofoot neiht Willie un Lola ut. De Helpssheriff Christopher Cooper maakt sik dorophen mit en Koppel vun Mannslüüd op’n Weg, üm Willie to fangen oder an de Siet to maken. Mit verkehrte Sporen versöcht Willie Boy jem aftoschüddeln, hett dormit aver nich veel Spood, vunwegen dat Cooper nich dorop rinfallt. Cooper is de Jagd aver leed, un glövt ok nich, dat se Willie finnen künnt. Bito hett he Tietdruck un dreiht also üm. Man, de annern verfolgt Willie Boy wieter, stellt sik dorbi aver unklook an un begeevt sik so in en Fall. Willie schütt jemehr Peerd doot, ümdat se em nich mehr achteran kamt. Ut Versehn aver dröpt he dorbi en ollen Fründ vun Cooper sien Vadder, de doran doodblifft. Cooper kann nu nich mehr anners un neiht em wedder achteran.

Mehr un mehr warrt Lola kloor, dat se de Flucht nich lang dörhollen kann. Se hollt Willie Boy blots op un sett em de Gefohr ut, dat he in’t Gefängnis mutt un dorin togrunnen geiht. Se weet sik keen Utweg un schütt sik mit en Colt vun ehr Verwandten sülvst dood, ümdat Willie nich länger ünner ehr to lieden hett. Cooper hett Twievel, wat se sik wohrhaftig sülvst dat Leven nahmen hett oder wat Willie Boy ehr ümbröcht hett. In de Bargen överrascht de Sheriff em. He hollt sik torüch un töövt af, wat passeert. Eerst as Willie Boy dat Gewehr op em anleggt, schütt Cooper em dood. Later stellt sik rut, dat dat Gewehr gor nich laadt wesen is.

Kritik ännern

In de Tietschrift TIME warrt de Film as „subtile Dokumentatschoon vun de rassistisch motiveerten Verfolgen“ betekent, de en Reeg vun Filmen anstött hett, in de de witten Minschen de Bösen weern. De Kameraarbeit weer vun Emanuel Levy as „luunsch“[1].

Joe Hembus hett faststellt, dat de Film as „een vun de besten Hollywood-filmen vun 1969 gell“. Butendem kreeg he en „annere Dimension vun’t Authentische“ dör Polonsky, de op de Swarten List stünn un twintig Johren nich ünenr sien Naam arbeiten dröfft hett. Polonsky hett toseggt, dat de Film nich vun Indianers hanneln de, man vun em sülvst[2].

Phil Hardy beteken den Film as en „verkehrt leidten ‚liberalen‘ Film“, de blots as Star-Vehikel för Robert Reford funkschoneren de. En poor Afsneden, as to’n Bispeel de Besöök vun’n Präsidenten Taft, weern „akkerat dorstellt“, weern aver „to pointeert, üm to övertügen“[3].

Utteken ännern

De Film is goot opnahmen worrn un weer in’t Johr 1971 mit dree Filmpriesen ehrt:

  • mit den Bodil Award in de Kategorie Best nich-europääsch Film för Abraham Polonsky
  • mit den BAFTA Film Award in de Kategorie Best Schauspeler för Robert Redford
  • mit den BAFTA Film Award in de Kategorie Best Schauspelersche för Katharine Ross

Borns ännern

  1. Kritik von Emanuel Levy
  2. Joe Hembus: Western-Lexikon - 1272 Filme von 1894-1975. Carl Hanser Verlag München Wien 2. Oplaag 1977. ISBN 3-446-12189-7. S.68
  3. Phil Hardy: The Encyclopedia of Western Movies. Woodbury Press Minneapolis 1984. ISBN 0-8300-0405-X. S.317

Weblenken ännern