Filmdaten
Plattdüütsch Titel:
Originaltitel: The Desert Trail
Düütsch Titel: Der Rodeo-Raub
Produkschoonsland: USA
Johr vun’t Rutkamen: 1935
Läng: 54 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Cullen Lewis
Dreihbook: Lindsley Parsons
Produkschoon: Paul Malvern
Musik: Billy Barber
Kamera: Archie Stout
Snitt: Carl Pierson
Szenenbild: E.R. Hickson
Dorstellers

The Desert Trail (op plattdüütsch so veel as „De Wöstenpadd“; dt. Titel: Der Rodeo-Raub) is de Titel vun en US-amerikaanschen Western ut dat Johr 1935. In den B-Movie hett John Wayne de Hööftrull speelt, Speelbaas weer Lewis D. Collins (ünner den Naam Cullen Lewis). Dreiht weer de Film an verscheden Öörd in Kalifornien[1]. De Premiere weer an’n 22. April 1935 in de USA[2].

Inholt ännern

De Frünnen John Scott, en Rodeo-Rieder, un Kansas Charlie, en Speler, de veel för Fronslüüd över hett, sünd op’n Weg na Rattlesnake Gulch. Dor schall en groot Rodeo stattfinnen, an dat John deelnehmen will, wiel Charlie sien Glück in’t Koortenspeel versöken deit. Dorbi höört he, dat de Veranstalters nich noog innahmen hebbt, üm de Priesgeller vull uttobetahlen. Dat vertellt he foorts John, de dorophen sien 900 $ ut dat Büro mit vörhollen Pistool afhollen deit. Man, kuum dat de beiden weggahn sünd, överfallt Pete un Jim dat Büro, scheet den Anstellten Farnsworth doot un rüümt den Safe ut.

As de Sheriff un annere Lüüd in’t Büro kamt, doot Pete und Jim so as weern se ok jüst eerst dortokamen un vertellt, dat Scott un Kansas kort na’n Schott ut dat Büro kamen weern. Fehl harr nich fehlt, den harr de Sheriff jem tofaten kregen. Man, John un Charlie künnt utrieten un maakt sik op’n Weg na Juanita, üm de se sik beide strieden doot. Bi Juanita is aver ok Pete al. De roovt jem dat Geld un maakt sik op’n Weg na Poker City. Wedder warrt John un Charlie meist vun’n Sheriff grepen, künnt em aver afschüddeln un ok wieter na Poker City rieden, woneem se sik beid ünner verkehrten Naam vörstellt. In de Stadt draapt se op de söte Verköpersche Anne, an de se sik ok glieks beide rantomaken versöökt. Anne is de Süster vun Jim.

Een Dag warrt de Kutsch vun Pete un Jim överfallen. John un Charlie kamt dör Tofall överto un verjaagt jem. Charlie verfolgt de Rovers un kriggt dorbi Charlie tofaten, de em de Büüt gifft un vertellt, dat he blots mitmaakt, vunwegen dat Pete em Druck maken de. John föhrt intwüschen de Kutsch torüch in de Stadt, woneem ok Pete al ankamen is. Üm de Schuld vun sik to wiesen, vertellt Pete den Sheriff vun den Moord in Rattlesnake Gulch, un dat John un Charlie dor as Möörders söcht warrt. As ok Charlie torüch is un een vun de Fohrgäst sien roovte Klock wedderkennt, sparrt de Sheriff beide in.

Mit Hülp vun Jim künnt se utbreken, warrt dorbi aver vun’n Sheriff un sien Lüüd in en Scheeteree verwickelt. Pete will de Gelegenheit nütten, üm de Bank to överfallen, man Jim hett de Snuut vull von em un sien Ideen un seggt, dat he sik den Sheriff stellen will. Dorophen warrt he vun Pete anschaten. John un Charlie kriegt Pete sien Överfall mit un neiht em achteran, üm em dorto to bringen, sien Schuld totogeven. Ok de Sheriff mit sien Lüüd ritt achteran un stellt jem in en Hütt in de Wildnis, woneem sik Pete verkröpen wull. In de Twüschentiet hett aver Jim sien Süster allens bicht. Anne maakt sik gau op’n Weg na den Sheriff un vertellt em de Wohrheit. So kamt John un Charlie opletzt free un Pete mutt för sien Daten in’t Gefängnis.

Borns ännern

  1. Dreihöörd in de IMDb afropen an’n 12. Oktober 2013
  2. Premierendaten auf IMDb afropen an’n 12. Oktober 2013

Weblenken ännern