Tory (Mehrtahl Tories) is een Utdruck för de Liddmaten vun de Konservative Partei in Grootbritannien.

Dat Woort is to'n eersten Mal in de Tiet vun König Charles II. bruukt wurrn. Dormals weer dat en Schimpwoort ut de Irische Spraak Gäälsch. Dor heet dat tóraighe. Dat bedutt irisch Rebellen.

De Tories weeren in dat 17. un 18. Johrhunnert de, de glöben döen, dat de Könige up de Eer vun Gott insett wurrn sünd un dat se ehren Thron verarben könnt an ehre Kinner.

De Tories hören to de Tiet to de Lüde, de jümmers al Land un Geld harrt hefft. De eenen weern up de Siet vun de anglikaansche Karken gegen de Dissenters un gegen de Kathoolschen, de annern muchen dat lever, wenn jedereen sien Globen hebben dröff. All öbereen in ehre Meenung weern de Tories dormals nich. De Lüde, de dat mit Charles II. holen döen, as England en Republiek weer un he noch in't Exil in Frankriek seet, weern Tories. Se streden dorför, datt de Stuarts wedder up den Thron kemen. Dé Gegenspelers vun de Tories weern de Whigs.