Dit Woort hett noch annere Bedüden: kiek dorför ünner United States Marshals Service.

Filmdaten
Plattdüütsch Titel:
Originaltitel: U.S. Marshals
Düütsch Titel: Auf der Jagd
Produkschoonsland: USA
Johr vun’t Rutkamen: 1998
Läng: 120 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Stuart Baird
Dreihbook: John Pogue
Produkschoon: Arnold Kopelson,
Anne Kopelson
Musik: Jerry Goldsmith
Kamera: Andrzej Bartkowiak
Snitt: Terry Rawlings
Szenenbild: Maher Ahmad
Kledaasch: Louise Frogley
Dorstellers

U.S. Marshals (dt. Titel: Auf der Jagd) is de Titel vun en US-amerikaanschen Action-Thriller ut dat Johr 1998, bi den Stuart Baird Speelbaas weer. De Hööftrullen hebbt Tommy Lee Jones un Wesley Snipes speelt. De Film is en Nafolger to den spoodrieken Film The Fugitive.

Inholt ännern

Dör en Tofall warrt Mark Roberts in en Unfall verwickelt un kummt in’t Krankenhuus. Man de Polizei finnt ein Pistool bi em un kiekt in jemehr Akten: he is anklaagt twee Lüüd ümbrocht to hebben. He stritt dat af, ofschoonst an’n Oort vun’t Verbreken sien Fingerafdrück funnen worrn wesen schüllt. Op en Fangenentransport vun Chicago na New York warrt he vun en annern Fangenen mit en an Boord smuggelte Wapen angrepen. Dorbi warrt en Lock in de Boordwand reten un de Fleger stört af. An Boord is ok de U.S. Marshal. Tosamen mit Roberts reddt he na dat Afstörten en Reeg vun Fangene ut dat Wrack. Man, dorna kann Roberts utbüxen. Wiel he versöcht to bewiesen, dat he nich an de Moordfäll Schuld is, warrt he vun Gerard dör dat hele Land jagt.

Bi dat eerste Op’nannerdrapen vun Gerard un Roberts schütt he den Marshal an, üm wedder utneihn to künnen. Vunwegen dat he em ok licht haar doodscheten künnen, kamt Gerard nu Tweifel an Robert sien Schuld. Denn warrt he wies, dat Roberts egentlich Sheridan heet un fröher Mitarbeiter vun’n DSS- un vun de CIA weer. Op de annern Siet is em vun baven de DSS-Agent John Royce an de Siet stellt worrn, de bi’t Ermitteln blots Schiet boen deit. Gerard kummt dat mehr un mehr snaaksch vör. As he mehr rutfinnen deit, kummt he na un na en Komplott op de Spoor, bi dat Sheridan en traagsche Hööftrull speelt.

Dat Royce bi dat Team vun Gerard is, weer keen Tofall. He hett allns so torecht tüdelt, dat dat utsütt as wenn Sheridan Schuld harr, wenn dat rutkamen schüll, dat geheeme Dokumenten an China wietergeven worrn sünd. Üm sien Geschicht to schulen begeiht Royce noch en Moord, ditmol an Noah Newman, en Mitarbeiter vun Gerard. Man, he kann dat so dreihn, dat all Lüüd em glöövt, dat Sheridan den Moord begahn hett. Na en wille Jagd kann Gerard op en Frachter stellen. Royce versöcht dor Sheridan an de Siet to maken, vunwegen dat he as eenzige spitz kregen hett, dat Royce dorachter steken mutt. Aver he besehrt em blots. Man, ok Gerard hett intwüschen dissen Verdacht un wesselt in’t Krankenhuus Royce sien Magazin gegen een, dat leddig is. As Royce sien ehmoligen Partner in’t Krankenbett an de Siet maken will, kummt Gerard dorto. Royce will em nu ok utschalten, man wegen dat leddige Magazin warrt dorvun nix. As he na en verstekene tweete Wapen griepen will, schütt Gerard em dood. Sheridan is entlast un kummt free.

Kritik ännern

  • In Blickpunkt: Film stünn to lesen, dat Warner Tommy Lee Jones noch mol wedder as U.S. Marshal op de Jagd schickt harr, wobi de Speelbaas un de Dreihbookschriever sik an de Oort un Wies vun The Fugitive hollen harrn. Dat Remake wies mehr technologische Gadgets op, harr dorför aver weniger Human Touch. De Actionafsneden weern as effektiv in Szeen sett beschreven.
  • film-dienst loov den Film as en solide inszeneerten Action-Thriller, de sik as Nafolger vun The Fugitive sütt. Man, an de Steden, wo in den Vörgänger dat intressant opboete Gegenöverstellen vun Jäger un Jagten stünn, wies U.S. Marshals över wiete Strecken blots op de Indrück vun de Biller as en Routineprodukt. Sünners an de Profilen vun de Hööftfiguren fehl dat, vun dorher harr de Film ok keen grote Anspröök an de Schauspelers.
  • De Stern meen, dat dat keen utermatigen Film weer, man veel Tempo barg. He weer vergleken mit en Sportsennen mit betere Texten. Marshal Gerard warrt as anspreken Ekelpaket beschreven.
  • De Videowoche meen to den Speelbaas, dat de fröhere Baas-Editor Stuart Baird en wördigen Nafolger vun den Actionfilm dreiht harr. Dat weer de Verfolgungsjagden un de Stunts to verdanken, dat ok disse Variante vun den Dr.-Kimble-Stoff för grote Spannung sorgt. Tommy Lee Jones kreeg veel Loov för sien Dorstellen, jüst so as Wesley Snipes un Robert Downey Jr.

Utteken ännern

De Film keem lang nich an den Spood ran, den sien Vörgänger harr. De Film hett keen Priesen wunnen un weer överhaupt blots eenmol nomineert. Dat weer 1999 för den Blockbuster Entertainment Award in de Kategorie Best Film-Duo – Action/Aventüer för Wesley Snipes un Tommy Lee Jones.

Achtergrünnen ännern

U.S. Marshals is an verschedene Öörd in un üm Chicago dreiht worrn, woneem ok The Fugitive dreiht worrn is. Annere Dreihöörd weern in New York City uin in de Sümp vun Tennessee.

För den Flegerunfall an’n Anfang vun’n Film is en Boeing 727 vun en Casinobesitter ut Las Vegas anhüert worrn. Twee wietere Flegerrümp weern för de Szenen an den Oort vun den Unfall bruukt. Dat Afstörten sülvst is mit en Modell filmt worrn. Dorför hett de Kru en Miniaturstaat vun 360 m Läng ut Beton boet un den Modellfleger mit ruchweg 1000 km/h doröver wegslippen laten. En Flegerrump is op en Metallgestell in’n Stroom platzeert worrn. Op disse Wies künn de Rump anböhrt un rünnerlaten warrn, as dat vun dat Dreihbook vörsehn weer. De Szenen binnen dat Flegerwrack sünd in en Lagerhuus in Chicago maakt worrn. De tweete Rump weer mit en Mechanik utrüst, de dat Afstörten simuleeren de. De Opnahmen wiel de Panik in’n Fleger weer över sünnere Kamerastativen mööglich.

Weblenken ännern