V for Vendetta (Film)

Filmdaten
Plattdüütsch Titel:
Originaltitel: V for Vendetta
Düütsch Titel: V wie Vendetta
Produkschoonsland: USA
Grootbritannien
Düütschland
Johr vun’t Rutkamen: 2006
Läng: 127 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: James McTeigue
Dreihbook: Andy Wachowski
Larry Wachowski
Produkschoon: Joel Silver
Grant Hill
Andy Wachowski
Larry Wachowski
Musik: Dario Marianelli
Kamera: Adrian Biddle
Snitt: Martin Walsh
Dorstellers

V for Vendetta (op Platt so veel as „V för Vendetta“) is de Verfilmen vun den glieknöömten Comic vun Alan Moore un David Lloyd ut dat Johr 2006. De weltwiete Filmstart weer an’n 16. März 2006.

De Film speelt in en dystoopsch London in de tokamen Tiet. De Protagonist vun den Film is V, en maskeerten Freeheitskämper, de in’n Kamp gegen den autoritären Staat gliektietig ok sien persönliche Afreken verfolgt un en sellschopplich un politisch Ümstörten vörbereidt. De Naam vendetta is dat italieensche Woort för Afreken op’t Blood

Inholt ännern

In dat totalitär föhrte Grootbritannien warrt Dissidenten un Homosexuelle ünnerdrückt. Beherrscht warrt de Sellschopp vun faschistisch Gedankengoot un Zensur. Se steiht ünner de vullstännigen Kontroll vun de bannig starken Medien, de vun de Landsherrschop bestimmt warrt. De Regeeren hett en autokraatschen Föhrer, de sik religiöse Inszeneeren deenbor maakt: Grootkanzler un Noordfüer-Parteibaas Adam Sutler. Disse Regeerensform hett sik dörsetten künnt, vun wegen dat dat en nuklearen Kunflikt in Europa un Asien geven hett un in de USA en Börgerkrieg herrscht. Sutler hett verspraken, dat disse Tostännen in Grottbritannien nich tolaten warrt un dorför is he wählt worrn.

Man, en unbekannten maskeerten Mann, de sik sülvst V nöömt, weddersett sik. He bringt hoge Liddmaten vun dat Regime üm. Gegen Enn vun’n Film stellt sik rut, dat he de eenzige is, de en Dwangsexperiment an „afweken“ Delen vun de Inwahners to’n Utforschen vun en Viruskultur överleevt hett. Disse Viren sünd gegen de Inwahners vun’t egen Land insett worrn, üm opletzt de Macht övernehmen to künnen. Ünner de Oppers vun V, de een Mask vun Guy Fawkes driggt un in sien Spraak motivistisch den Gunpowder Plot bruukt, üm sien Afreken mit de Regeeren to ünnerstrieken, höört vör allen de Leiders vun de Fangenenanstalt, woneem de Experimenten maakt worrn sünd. De sünd in de Twüschentiet all in hoge Ämter opstegen oder sülvst Delen vun de Regeeren.

Bi een vun sien Akschonen redd V dat Leven vun de jungen Evey, de em vörher vör de Polizei redd hett. V hett keen annere Wahl, as ehr mit in sien Versteck to nehmen. Dor sütt se sien Sammeln vun kulturelle Saken, de vun de Zensurbehöörd verboden worrn sünd. Dör Övernehmen vun de Medien an’n 5. November – den Dag vun’n Gunpowder Plot – hett V in’t Vörjohr de ünnerdrückte, aver noch verblennte Börgerschop to en Opstand an jüst den 5. November opropen. Dör sien Akschonen driggt he dorto bi, de Inwahners över de Achtergrünnen vun de Landsregeeren optoklären, so dat an’t Enn wohrhaftig en Opstand tostannen kummt. Evey, de V toeerst verlaten hett, warrt vun em torüchholt in sien Versteck, dat he aver as en Folter-Gefängnis inszeneert hett. V lett ehr in den Gloven, dat se en Fangene vun de Regeeren is, so lang, bit Evey sik sülvst överwinnen deit un keen Angst mehr üm ehr egen Dorwesen hett.

V maakt den hoochrangigen Politiker Creedy en Anbott, so dat de den Kanzler Sutler an em utlevern deit. Bi de Övergaav warrt aver beide ümbröcht un V warrt starvensswoor verwunnt. He kann sik torüchslepen, üm sik mit Evey to drapen un starvt in ehr Arms. Dorophen öleidt se sülvst de Sprengen vun dat Parlament in, wat vör de Ogen vun en grote Masse vun Lüüd passert, de in Guy-Fawkes-Kledaasch den Oproop to’n Opstand folgt sünd.

Achtergrund ännern

De Dreiharbeiten hebbt in’n März 2005 in de Filmstudios Babelsberg in Postdam anfungen un schülln bit to’n 8. Juni afslaten warrn. Ut produkschoonstechnische Grünnen künn de Plaan aver nich ümsett warrn. De Filmstart müss dorüm vun’n 5. November 2005 op’n 16. März 2006 schaven warrn.

Vele vun de Bedeeligten an den Film hebbt al in de Matrix-Trilogie tosamenarbeit. 1988 hett sik de Produzent Joel Silver al de Rechten an twee Alan-Moore-Verfilmen sekert: V for Vendetta un Watchmen. De Wachowski-Bröder hebbt al Mitt vun de 1990er Johren en Dreihbook för en Verfilmen schreven. Wiel de Produkschoon vun The Matrix: Reloaded un The Matrix: Revolutions hebbt se dat Skript överarbeit un sik op James McTeigue as Speelbaas fastleggt.

Filmmusik ännern

De Filmmusik is vun den italieenschen Komponisten Dario Marianelli tosamenstellt worrn un bargt tosätzlich to de egens för den Film komponeerte Stücken de Leder Cry Me A River vun Julie London, I Found A Reason vun Cat Power un Bird Gerhl vun Antony and the Johnsons. De Filmmusik weer an’n 21. März 2006 bi Astralwerks Records publizeert.

Bi’t Sprengen vun’t Old Bailey un den Westminster-Palast is en klassisch Stück to höörn. Dat sünd Utsnitten vun de Ouvertüre 1812 vun Tschaikowski.

Kritiken ännern

  • film-dienst: „Optisch wie inszenatorisch effektsichere Verfilmung eines populären Comic Strips, die in der Rechtfertigung des terroristischen Befreiungskampfs freilich nicht gerade subtile Töne anschlägt.“[1]
  • Berliner Zeitung: „Die Wachowski-Brüder und ihr Regisseur James McTeigue haben aus dem Comic eine wunderbar düsterbunte Anarcho-Fantasie gemacht, an der Malcolm McLaren seine Freude haben wird. Auch wenn über Orwelliaden wie diese die Zeit hinweggegangen ist: in seiner Detailtreue und dialektischen Klugheit ist V WIE VENDETTA die beste Comic-Verfilmung seit langem.“[2]

Utteken ännern

De Film weer för negenteihn Filmpriesen nomineert, wovun he dree wunnen hett:

Anners wat ännern

To Anfang vun’n Film schalt V dree „Fingermänner“ vun de Regeeren ut un hollt dorna en längeren Monoloog. An’n Enn dorvun seggt he Evey, dat se em V nömen schall. In’t engelsche Original fangt meist jeed Woort mit den Bookstaven V an. Disse Effekt geiht in de düütsche Översetten verloren.

Ok de Sinnsprook „Vi Veri Veniversum Vivus Vici“ bargt disse Alliteratschoon op V. De Sprook kummt ut „The Tragical History of Doctor Faustus“ vun Christopher Marlowe, 1589.

De Bookstavv V kummt fakener ünnerswellig vör. So speelt V to’n Bispeel Beethovens Föffte Sinfonie, as he mit Creedy snackt. De bekannt Anfang vun disse Sinfonie weer in’n Morsekood · · · — (kort kort kurz lang), wat wedder den Bookstaven V gifft. Bito warrt5 Vs Messers ok en V, bevör he dormit na Creedys Mackers smitt.

Literatur ännern

Borns ännern

  1. http://www.kabeleins.de/film_dvd/filmlexikon/ergebnisse/index.php?filmnr=526217
  2. http://www.film-zeit.de/home.php?action=result&sub=film&info=cinema&film_id=17016

Weblenken ännern