Willy Dehnkamp

düütsch Politiker

Willy Dehnkamp (* 22. Juli 1903 in Hamborg-Altno; † 12. November 1985) weer Politiker un Börgermeester vun Bremen.

Willy Dehnkamp

De Vadder vun Willy Dehnkamp weer Schauermann in 'n Hamborger Hoben. Willy woll annernvorsik Seemann weern, hett denn aber Slosser lehrt. Mit 16 Jahren is he inträden in den Verband vun de Düütschen Metallarbeiders. Korte Tiet later güng he in de SPD.

As he 23 Jahre oolt weer, is he Vörsitter vun se Sozialistisch Jöögd vun Groot-Hamborg wurrn. 1928 is he as Baas vun de SPD nah Bremen-Nord gahn. Bi de Kommunalwahl an 'n 12.März 1933 weer he de Toppkandidat vun de SPD un hett de Nazis achter sik laten. 10 Dage later wurr he achter Trallen sett un bleef dor 7 Monate. As se em free laten harrn, füng he glieks an, de SPD in 'n Ünnergrund wedder uptoboon. März 1935 hett de Gestapo em in 't Lock smeten. He wurr to 2 Jahr un 9 Monate achter Trallen verordeelt. Wiehnachten 1936 is he freelaten wurrn. 1942 möß he in 'n Krieg. He weer bi de Panzerjägers. Dor hett he een Wund afkregen un de Russen hefft em fungen un 3 1/2 Jahr dor beholen.

1949 hett de Bremer Senat em beropen as Baas vun dat Oortsamt Blomendal in Bremen-Nord. An 'n 29.September 1951 is he Senator för School un Utbillen wurrn. Dat bleef he 14 Jahre lang, bit he 1965 Wilhelm Kaisen as Börgermeester vun Bremen upfolgen dö. 1967 hett de SPD bi de Wahlen de afsoluut Mehrheit verlaren un he möß Bott geven. Hans Koschnick hett den sien Amt övernahmen. Dehnkamp hett sik denn ganz ut de Politik torüch trocken. Man bit 1972 bleef he in den Rat vun de Düütsche Bildung.

Kiek ok bi ännern