Wilt
| Filmdaten | |
|---|---|
| Plattdüütsch Titel: | — |
| Originaltitel: | Wilt |
| Düütsch Titel: | Puppenmord |
| Produkschoonsland: | Grootbritannien |
| Johr vun’t Rutkamen: | 1989 |
| Läng: | 92 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Michael Tuchner |
| Dreihbook: | Andrew Marshall David Renwick Tom Sharpe (Roman) |
| Produkschoon: | Brian Eastman |
| Musik: | Anne Dudley |
| Kamera: | Norman G. Langley |
| Snitt: | Chris Blunden |
| Szenenbild: | Leo Austin |
| Kledaasch: | Elizabeth Waller |
| Dorstellers | |
| |
Wilt (dt. Titel: Puppenmord) is en britische Kummedie ut dat Johr 1989. De Independentfilm is na de Romanvörlaag vun Tom Sharpe dreiht worrn un wiest sik den glieken swarten Humor ut, för den Sharpe bekannt is. In de düütschen Kinos is de Film an’n 10. Mai 1990 anlopen.[1]
Inholt ännern
Henry Wilt is Schoolmeester an en Beroopsschool, de sik bi sien Schölers nich recht dörsetten kann. Noch weniger aver kummt he bi sien Fro Eva to Woort, de vun em jümmer blots hebben will, wat Henry ehr nich beden kann: Geld un Ansehn in de Sellschop. An leefsten de Henry ehr in sien Fantasie an de Siet maken. Een Morgen warrt op en Bosteed blangen de Beroopsschool de Liek vun en Fro opdeckt, tosamen mit Notizen vun Henry. Insoekter Flint, de op den Fall ansett warrt, is glieks dorvun övertüügt, dat Wilt de Möörder is, tomal sien Fro wohrhaftig nich optofinnen is.
De Zyniker Henry maakt sik toeerst lustig över Flint, man as he vun de Geschicht bilütten de Nees vull hett, vertellt he, wat vörfallen is: Bi en teemlich wille Party hett he sik mit de beste Fründin vun sien Fro in de Plünnen kregen. Sally hett em dorophen naakt an en opblaasbore Sex-Gummipopp fastbunnen worrn un em dormit vör alle Lüüd blameert. Henry föhrt foorts weg von de Fier un smitt ünnerwegens an de Bosteed de Gummipopp weg. Op’n Weg is he aver sehn worrn, as he de Popp tweisteken wull, so dat en öllere Fro em identifizeren deit. Eva is na de Party aver nich na Huus kamen. Un so blifft Henry ünner Moordverdacht.
Wiel de Lüüd op de Bosteed versöken doot, de Liek ut’n frischen Beton ruttokriegen, versöcht Flint wieter, Wilt dorto to bringen, dat he den Moord ingestahn deit. He hullt em intwüschen nicht blots för den Möörder vun sien egen Fro, man sogor för en Massenmöörder, den de Polizei al so söken deit. Man, ok as de Popp borgen worrn is un Henry sien Geschicht sik as wohr dorstellt, lett Flint nich na. As de Druck vun Flint nich weniger warrt, fangt Wilt an, sik en snaaksche Faten vun Moordgeschicht uttodenken. Opletzt glöövt de Polizei, dat he sien Fro in de Fleeschfabrik an de Siet maakt hett. Veel to laat markt Flint, dat Henry dat Geständnis mit den Naam vun en Comicfigur ünnerschreven un jem al wedder mol op’n Arm nahmen hett.
Opletzt geiht Henry sülvst los un söcht sien Fro, ümdat de Spöök to’n Enn kummt. In Wohrheit is Eva mit Sally un Hugh op jemehr Yacht ünnerwegens, de aver op Grund lopen is un steken blifft. As Eva wies warrt, dat Sally egentlich lesbisch is un sülvst achter den Vörfall mit Henry stickt, warrt se böös un haut af. Vun en Kark ut röpt se Henry an. So kann Henry ehr jüst noch hülpen, as sik de Preester as de söchte Massenmöörder rutstellt. He kann dormit an’n Sluss nich blots sien Unschuld bewiesen, man ok noch den Fall vun den Massenmöörder lösen.
Kritiken ännern
- Dat Lexikon vun’n internatschonalen Film loov de go’e Besetten, beteken den Humor aver as deelwies ’n beten to dull.[2]
- Prisma-online beschreev den Film as en wehlige Krimikummedie un geev dat Samtoordeel „annehmbor“.[3]
Weblenken ännern
- Wilt in de Internet Movie Database (engelsch)