Äoolsch

Äoolsch oder Aioolsch is en Dialekt vun de Ooltgreeksche Spraak. He is snackt wurrn vun den Stamm vun de Äolers. De Kuntreien, wo Äoolsch snackt wurrn is, weern Böotien, Thessalien, de Westküst vun Lüttasien un de Insel Lesbos. In Böotien un Thessalien stünn dat Äoolsche stark unner den Indruck vun de westgreekschen Dialekten in de Naberschop. Vun all ooltgreekschen Dialekten is dat Äoolsche de öllerhaftigste.

De greekschen Dialekten. Äoolsche Dialekten in Gelb.

In de Literatuur speelt Äoolsch en Rull vunwegen de Warken vun de Dichterslüde Sappho un Alkaios vun Lesbos. Ok bi Homer sien Spraak gifft dat äoolsche Andelen, ofschoonst se ehr Wuddeln an un for sik in dat Ioonsche hett.

Böker

• Albert Thumb & Anton Scherer: Handbuch der griechischen Dialekte II, Heidelbarg 1959 (v.a. Sieten 1-109)
• Wolfgang Blümel: Die aiolischen Dialekte - Phonologie und Morphologie der inschriftlichen Texte aus generativer Sicht, Göttingen 1982
• José L. García-Ramòn: Les origines postmycéniennes du groupe dialectal éolien, Salamanca 1975