Ólafur Ragnar Grímsson

Düt is en iesländsch Naam. De Achternaam is keen Familjennaam, man en Patronym. Bruuk dorüm beter blot den Vörnaam oder ok den Vörnaam un den Achternaam tohoop, wenn du över düsse Persoon snackst.

Ólafur Ragnar Grímsson (* 14. Mai 1943 in Ísafjörður) weer von 1996 bet 2016 de foffte Präsident vun Iesland. To’n eersten Mol is he 1996 wählt wurrn. In dat Johr 2000 is he in en „stille Wahl“ wedder wählt wurrn, vunwegen dat de Oppositschoon keen Kannedaten gegen em upstellt harr. Von Juni 2012 bet 2016 weer siene foffte Amtstied. He weer de Nafolger vun Vigdís Finnbogadóttir.

Persöönlichen Achtergrund

Vun 1962 bit 1970 hett Olafur Ragnar Grimsson Weertschoppswetenschoppen un Politologie an de Universität vun Manchester studeert. He weer Perfesser for Politologie an de Universität vun Iesland un is denn Finanzminister (1988-1991) un Vorsitter vun de Ieslannsche Volksallianz wurrn (1987-1995). 1974 hett he Gudrun Katrin Thorbergsdottir heiraat. In dat neegste Johr sünd se Ollern vun Tweeschen (Deerns) wurrn. Siene Fro weer bannig populäär in Iesland un hett em in siene Wahlkampagne duchtig Stöhn geven. 1998 is se sturven vunwegen Leukämie. An’n 14. Mai 2003 hett Grimsson Dorrit Moussaieff heiraat. Mit ehr weer he vun Mai 2000 af an tosamen.

Präsidententied

Olafur Ragnar Grimsson is de eerste Präsident vun Iesland, de sien Veto-Recht bruukt hett un en Gesett, wat vun dat Althing beslaten wurrn weern, nich unnertekent hett. So is dat vorsehn in de Verfaten vun dat Land, in Artikel 26. He hett sien Veto-Recht midderwielen twee Mol bruukt.

Massenmedien

An’n 2. Juni 2004 hett he en Gesett over de Massenmedien nich unnerschreven. Over sien Besluss hefft sik Politikers un Rechtsgelehrten um in’e Haare kregen. En poor Kritikers hefft em vorsmeten, dat he dat gesett nich unnerschrieven wull, dat weer en „Angreep“ up dat Parlament un siene Unafhängigkeit. Annere Kritikers twiefeln dor an, dat Artikel 26 overhoop gellen deit.

Bi de Präsidentenwahlen vun 2004 is he mit 67,5 % vun de Stimmen wedder wählt wurrn. Man bi düssen düüdlichen Sieg weer ok en Rekordtahl vun 21,2 % ungüllig Stimmen bi. Dat geev Analysten, de hefft dat so utleggt, dat allerhand Minschen keen Vertroen mehr to em harrn, vunwegen dat he dat Gesett nich unnerschreven harr.

Icesave

Enne 2009 hett dat ieslannsche Parlament en Gesett annahmen, dat regeln dö, wie Spaargeld an Nedderlänners un Briten torüch betahlt weern scholl. Dat Geld weer vun de Icesave-Bank in’n Sand sett wurrn, man düsse Bank weer midderwielen over Kopp gahn. An’n 5. Januar 2010 hett de Präsident nich mitmaakt un dat Gesett nich unnerschreven. Dor stunn hogen Druck un Lawei vun de Inwahners vun Iesland achter. De Präsident meen, de Inwahners mössen in en Referendum fraagt weern, of se for Icesave liek stahn wollen. Dor is he, sunnerlich in dat Utland, duchtig for schullen wurrn.

Weblinks

Ólafur Ragnar Grímsson. Mehr Biller, Videos oder Audiodateien to’t Thema gifft dat bi Wikimedia Commons.