Ünnerelvbahnhoff

De Ünnerelvbahnhoff weer en Bahnhoff in de Stadt Horborg. De Bahnhoff leeg an de Nedderelvbahn, de ut Hamborg kummt un na Cuxhoben geiht.

Von’n Ünnerelvbahnhoff ut gaht ok de Gleise af na de Horbörger Seehavens 1 bet 4.

Historie

1881 hett de Nedderelvbahn apenmaakt, de von Horborg na Cuxhoben geiht. Do is ok de Ünnerelvbahnhoff anleggt worrn, de to de Tied an’n Noordwestrand von Horborg leeg, an de Horborg–Buxthuer Schossee, de vondaag de Buxthuer Straat is (Bundsstraat 73). De Bahnverkehr an’n Ünnerelvbahnhoff hett an’n 1. April 1881 anfungen. Dat weer to de Tied de Ennpunkt von de Bahnlien. Eerst 1897 is de Bahnhoff Horborg anleggt worrn, de as Hauptbahnhoff för de Stadt Horborg denen schull. Horborg harr vörher keen zentralen Bahnhoff. 1847 is an’n Süüdoostrand von de Stadt de Celler Bahnhoff von de Bahnlien Celle–Horborg anleggt worrn. De Hamborg-Venloer Bahn, de 1872 boot worrn is, harr en egen Bahnhoff an’n Noordrand von Horborg. Disse dree Bahnhööv sünd dör den ne’en Hauptbahnhoff ersett worrn un de Ünnerelvbahn weer dat eerste Maal direkt an de Bahnlien Hamborg–Celle–Hannover–Venlo anbunnen. De Ünnerelvbahnhoff is liekers wieder bedreven worrn.

As Personenbahnhoff hett de Ünnerelvbahnhoff an’n 4. August 1984 dichtmaakt, as de ne’e Lien S 3 von de S-Bahn Hamborg inricht worrn is. To de sülve Tied sünd ok de Bahnhööv bi dat Tempo-Wark in Bosselbeek un in Huusbrook dichtmaakt worrn.

Nadem de Bahnhoff dicht weer, weer dor en Sanitärladen ünnerbrocht un en Bordell. Göderverkehr hett dat aver noch länger geven.

De Bahnhof is 2013 för 680.000 Euro dwangsveraukschoneert worrn.