Abhainn Dearg

Abhainn Dearg (utsproken: Awien Jerreg, ok as Red River Distillery betekent) is en junge Whisky-Brenneree in Carnish in Uig op dat schottische Eiland Lewis, de to de Buteren Hebriden höört. Dormit tellt se to dat schottische Whiskyrebeet Eilannen.

Abhainn Dearg
De Brenneree Abhainn Dearg (Foto: Tom Richardson)
Land	Schottland
Region	Eilannen
Tyyp	Malt
Status	aktiv
Besitter	Mark Tayburn
Grünnt	2008
Grünner	Mark Tayburn
Washstill(s)	1 × 2.112 l
Spiritstill(s)	1 × 2.057 l
Websteed	abhainndearg.co.uk

De Brenneree in’n Överblick

De Destille is eerst in dat Johr 2008 vun Mark Tayburn nee grünnt worrn un tellt dormit to de jüngsten Brennereen vun Schottland. Se is in de Bowarken vun en fröhere Fischfarm inricht worrn. De Naam Abhainn Dearg is de schottsch-gäälsche Utdruck för Red River („Root Stroom“). Se is de westlichste schottische Brenneree un de eenzige op de Buteren Hebriden siet ruchweg 1840 as de Shoeburn distillery dicht maakt worrn is.

De Brenneree Abhainn Dearg produzeert Whisky na traditschonelle Wies ünner dat Motto „From field to bottle“ (op platt: „Vun’t Feld in de Buddel“). De Gassen, ut den dat Molt maakt warrt, warrt egens för de Produkschoon anboet. Dat Water för de Produkschoon stammt ut den Stroom Abhainn Dearg oder – op engelsch – Red River, de vun de Uig Hills kummt. In de Destille gifft dat twee Meeschfatten to 500 kg un twee Gäärfatten to 7.500 l. Brennt warrt mit een wash still vun 2.112 l un een spirit still vun 2.057 l.

Bit hüüt sünd blots lütte Mengden vun den Whisky verköfft worrn. 2010 weern twee lütte Fatten in’t Utland verköfft – een dorvun güng na Düütschland, woneem dat op Whiskymessen rümgahn is. De eerste offizielle Single Malt is 2011 as dreejohrigen Whisky affüllt worrn. De nächste Whisky schall nu eerst wedder in’t Johr 2018 affüllt warrn, wenn de Whisky ut de eersten Produkschoon teihn Johr lang riept is.

Kiek ok

• List vun de schottischen Brennereen

Weblenken

Abhainn Dearg. Mehr Biller, Videos oder Audiodateien to’t Thema gifft dat bi Wikimedia Commons.