Ahmad Zahir

Ahmad Zahir (persisch احمد ظاهر; * 14. Juni 1946 in Kabul; † 14. Juni 1979 an’n Salangpass bi Kabul) weer en afghaanschen Sänger.

Leven

Ahmad is an’n 14. Juni 1946 (24. Jauza 1325 na’n Sünnen-Hidschra-Klenner) as Söhn von Quraisha un den Dokter Abdul Zahir boren, de later ok Ministerpräsident von Afghanistan weer. He is en ethnischen Paschtuun, de Familie stammt ut de Provinz Laghman. He weer op dat Habibia-Gymnasium in Kabul un hett al in siene Schooltied Musik maakt. Sien School afslaten hett he an de Darul Malimeen.

1967 hett he en Pädagogik-Studium an de Universität Nee-Delhi anfungen. In düsse Tied weer sien Vader de afghaansche Baadschopper in Indien. Zahir hett sien Studium aver opgeven, üm sien ganze Tied för de Musik to hebben. He keem 1969 na Afghanistan trügg un hett bi de Kabul Times arbeidt. Ok för dat Studio Afghan Films hett he arbeidt. In düsse Tied hett he sien eerst Album opnahmen un ok mit de Musikers Nainawaz un Taranasaz tohooparbeidt. In de Johren 1970 hett Zahir en Reeg Alben rutbrocht. In de Leder hett he faken Kritik an de Regeren ünnerbrocht. He hett Stilelemente von de afghaansche Musik mit de von Indien un von de westliche Musik verbunnen. He hett siene Leder vör allen op Dari un op Paschtuunsch sungen.

Zahir weer twee Maal verheiraadt. Von siene eerste Fro, de he 1969 freet harr, hett he sik 1973 scheden laten. He hett denn 1977 wedder freet. Mit de eerste Fro harr he den Söhn Rishad un mit siene twete Fro de Dochter Shabnam, de kort na Zahir sien Dood boren is.

Na offizielle Angaven is Zahir an’n 14. Juni 1979 bi en Autounfall an’n Salangpass doodbleven. Dat gifft aver ok Berichten, dat he ümbrocht worrn is.

Ofschoonst Zahir blots över en Tiedruum von teihn Johr Musik maakt hett, höört he to de wichtigsten Lüüd, de de modeerne afghaansche Musik schapen hebbt. Siene Leder sünd in Afghanistan noch bet vondaag wiedhen bekannt.

Diskografie

• 1967: Dilak bin
• 1967: Bahar
• 1968: Shab ha-e- zulmani
• 1969: Madar
• 1969: Awara
• 1970: Ghulam -e-Qamar
• 1970: Sultan e- Qalbha
• 1971: Az Ghamat ay Nazaneen
• 1971: Gulbadaan
• 1971: Yaare Bewafa
• 1971: Laily
• 1972: Ahmad Zahir und Jila
• 1972: Ahange Zindagee
• 1973: Shab-e Hijraan
• 1973: Dard-e-Dil
• 1974: Neeshe Gashdum
• 1975: Aasheq rooyat Man
• 1976: Lylee Jaan
• 1977: Ahmad Zahir ba Sitara Ha
• 1978: Um Baamanee
• Shamali
• Aye Rashke Gol Ha
• Live
• Wairana Manzil
• Gol Haye Jawedan
• Songs from Afghanistan
• Yad Ha Wa Khatera Ha
• Yad Ha Wa Khatera Ha 2
• Majlesi

Weblenken

• Websteed to Ahmad Zahir (engelsch)