Albert Suho

Albert Suho (* vör 1390; † na 1449) weer en Kleriker und Schriever ut Ossenbrügge.

Suho weer Domvikar un Offizial von’n Doomproopst in Ossenbrügge un för siene Heimatstadt 1434 ok bi dat Konzil von Basel. He hett welk Traktaten op Latien schreven un en Weltchronik op Middelsassisch.

Suho sien Chronik vertellt de Geschicht von de Schöpfung af an bet to dat Johr 1447 (in en twete Redaktion bet 1452). In de letzten Delen liggt de Fokus op Ossenbrügge. De gröttste Deel von’n Text leddt sik af von annere Texten (Petrus Riga, Martin von Troppau) un vertellt dorüm nich veel, wat nich ok annerwegens to finnen is. Man de letzten Delen sünd en wichtigen Born för de Karkengeschicht von Ossenbrügge.

Lang hett’n man een Handschrift von de Chronik kennt (Berlin/Kraków), man in de Johren 1990 in Warberig un 2012 in Leiden sünd twee Handschriften opdeckt worrn, de se vörher noch nich kennt hebbt.

Traktaten

• Speculum futurorum temporum. 1428, druckt Paris 1513 un Köln 1528
• Abecedarium. 1434
• Commentarius in hymnum ‚Lauda Sion Salvatorem‘.
• Commentarius in hymnum ‚Ave maris stella‘.