Alfred Carl Christian Balzer

Timmermann, Bedriefsraat un Politiker in Bremerhoben

Alfred Carl Christian Balzer (* 29. Mai 1898 in Leh; † 13. August 1949 in Bremerhoben) weer en Timmermann, Bedriefsraat un Politiker in Bremerhoben.

Läven

ännern

Alfred Carl Christian Balzer siene Öllern wörrn ut´t Grootherzogtum Mekelborg-Swerin na Leh kamen. Sine Öllern weern Carl Balzer un sien Fro Leonore, borene Schwenck. He hett dat Timmermanns Handwark lehrt. An´n 31. Oktober 1924 heirad he in Leh Frieda Auguste Alksneit[1], de wer ut Geesmünn.

Alfred hett bi sien Utbillen belevt wo slecht de Plackeree betahlt worrn is un wo lang se darför Arbeiden möten. Üm dat to ännern, is he in de KPD gahn. 1925 hebben se de KPD-Sektion vun de kommunistische Internationale för Bremerhoben un Ünnerwerseroorten grünnd.[2] He kunn woll goot snacken, denn bi de Stadtverordnetenwahl vun Bremerhoben wörr he as Kandidat opstellt worrn un wär achterran Stadtverordneter in´t Bremerhobener Parlament.

As de NSDAP 1933 de Wahl wunnen hebben un an`n 27. Februor 1933 de Rieksdag in Berlin ansteken worrn is, is dat losgahn mit dat insparen vun de Gegenslüüd vun de NSDAP. De SA-Lüüd kunn toslaan as se wulln, bang bruk´s nich wesen den de preußsche Binnenminister Hermann Göring harr jo seggt he will nich so nipp henkieken. Darop hett de SA all töft. se wussen wo de Lüüd leven, wo so een ünnerkamen harn un wo se tohope kamen sünd.[3] An`n 1. Mai 1933 heft se Alfred Balzer fastsett un in dat Polizeifängnis „Karlsborg“ bröcht. Een Spitzel vun de GESTAPO hett utseggt dat de Kommunisten Wapen versteeken harrn. In Juni 1933 heft se Alfred in`t GESTAPO Kaschott in de Jacobistroot (vondag Stadthuus 6) stecken. Dor töven al de Doodsläger vun de SA op Alfred. „Na du Swien, wullt nu utseggen?“, wörr dat eerst wat se to em seggt hebben. Man Alfred harr nix to´n utseggen, he hett nix vun Wapen wusst. Dorna hefft se em den Liv un ok de Hannen to Schannen slaan. Ok heft se em de Trepp rünner smeten un he hett sik dorbi dat Been brooken. Wiel he nix utseggt hett, hefft se em ok an en Telgen vun een Boom ophangen. Kort ehr dat he dood gahn is hefft se em wedder afsnieden.

Na dree Weken bi de GESTAPO kunn sin Fro em wedder sehn. Se hett em nich wedder kennt un de beid hefft düchtig went. Een Dokter hett Alfred sehn un hett seggt: „Nu is noog, lat em tofreden“. Nu hefft se em in een anner Fängnis bröcht un dor hefft se em för Gericht stellt un he is to twee Johr Tuchthus verurdelt worrn. As de Krieg to enn wer hett Alfred wedder Arbeit bi H.F. Kistner as Timmerpolier kreegen. Sien Kollegen hefft em in Bedriefsraat wählt, dor wer he de Vörsitter. Een anner Upgaav hett he bi de Gemeennützig Wahnungsmaatschop Wersermünn e. GmbH funnen, dar hebben se em innen Opsichtsraat rin halen.

Alfred keem aver nich mehr so recht op de Been vun all dat wat de Nazis em andaan heft un so is he denn an 13. Austmaand 1949 doodblieven. De Gemeennützig Wahnungsmaatschop Wersermünn e. GmbH hett denn daför sorcht dat een lütt Straat in Geesmünn sien Naam kriegen hett.[4][5][6]

Weblenken

ännern
  Billder zu Alfred Balzer. Mehr Biller, Videos oder Audiodateien to’t Thema gifft dat bi Wikimedia Commons.

Enkeltenawisen

ännern
  1. Stadtarchiv Bremerhaven, Einwohnermeldekarteien Geestemünde/Wesermünde 1930–1960
  2. Burchard Scheper, Die jüngere Geschichte der Stadt Bremerhaven; Magistrat der Stadt Bremerhaven 1977, S. 240
  3. Harald Focke/Hartmut Hohlbein, Stationen auf dem Wege zur Macht. Von der Weimarer Republik zum NS-System. Die Jahre 1932/33 in Deutschland; Landeszentrale für politische Bildung, Hamburg 1982, S. 81, 142
  4. Rudolf Herbig, Nationalsozialismus in den Unterweserorten; Landeszentrale für politische Bildung der Freien Hansestadt Bremen 1982, S. 29)
  5. Eberhard Aleff, Das dritte Reich; Edition Zeitgeschehen Fackelträger-Verlag, Hannover 1970
  6. Dr. Manfred Ernst, Der aufrechte Gang – Widerstand und Verweigerung in Bremerhaven 1933–1945; Ditzen Druck und Verlags-GmbH 1985, S. 23, 24, 25