Amstelkerk
De Amstelkerk is en holten Karkenbo in Amsterdam. De Karken liggt up dat Amstelveld un is boot wurrn twuschen 1668 un 1670. Dormols weer de Grachtengordel vun Amsterdam to'n tweeten Mol utboot wurrn. De Karken is plaant wurrn vun Daniel Stalpaert as en vörlopige „holten Predigtschüür“. Man harr sik vörnahmen, den „Platz bi de Karken groot noog to laten, um dor later, wenn de Tied dor is, en steenen Karken hen to setten“, schrifft dat Bureau Monumenten & Archeologie. Faken warrt ok seggt, datt de nee plaante Steenkarken nich up den Platz hensett weern scholl, wo se bit nu to steiht, man up den „Bottermarkt“, wat de hüdige Rembrandtplein is.
In'n Momang is de Karken Egendom vun Stadsherstel Amsterdam, de dor ok en Kontoor unnerhöllt un de Rüüme verhüürt för soziaal-kulturelle Unnernehmen un ok för Hochtieden. In dat Souterrain an de Süüdsieten is en Restaurant unnerbrocht.
Man Goddesdeenste gifft dat dor ok jummers noch: De Amstelgemeente, de to de Christelijk Gereformeerte Kerk tohöörn deit, höllt dor Karken in af.
De Karken is in'n Grundplaan 28,3 x 28,3 Meter groot, wat utlopen deit up 100 x 100 Foot, just so, as de Oosterkerk, de ok vun Stalpaert plaant wurrn is. 1840 is de Karken in den neegootschen Stil umboot wurrn. Dor hett Hendrik Springer bi dat Leit in'e Hand harrt.