André Bock

André Bock (* 12. Juni 1973 in Horborg) is en düütschen Politiker von de CDU.

André Bock 2013

Bock is 1973 in Horborg boren un in Winsen opwussen. He güng in Luhdörp, Reidörp un Winsen na School. Nadem he de Högere Hannelsschool 1991 afslaten hett, hett he bet 1994 en Lehr as Verwaltungsfachanstellten bi’n Landkreis Horborg maakt un hett denn bet 1996 in dissen Beroop bi’n Landkreis Horborg arbeidt. Von 1996 bet 1997 weer he op de Fachoberschool mit Fachrichtung Verwaltung un Rechtspleeg in Lümborg. Na disse Tied hett he bet 1998 as Anstellten bi de Stadt Winsen arbeidt. Von 1998 bet 2001 hett he en dual Studium maakt un dat as Diplom-Verwaltungsbedrievsweert (FH) afslaten. Von 2001 bet 2013 weer he in de Verwaltung von’n Landkreis Horborg aktiv, ünner annern as Produktverantwortlichen in’n Bedriev Afwaterbeseitigung.

Bock is in’n Oktober 1998 in de CDU rin. He weer von 1999 bet 2001 Vörsitter von de Junge Union in Winsen un denn von 2000 bet 2002 Kreisvörsitter von de Junge Union Horborg-Land. In’n CDU-Oortsverband Winsen weer he von 2002 bet 2008 Viez-Vörsitter. Siet 2011 is he Maat von’n Kreisvörstand von de CDU Horborg-Land un siet 2013 tweten Viez-Kreisvörsitter.

2001 is Bock dat eerste Maal in’n Stadtraad von de Stadt Winsen wählt worrn un is dor siet 2007 CDU-Frakschoonsvörsitter. 2011 is he eersten Viez-Börgermeester von Winsen worrn.

För de Landdagswahl in Neddersassen 2013 hett de CDU Bock as Direktkannedaat in’n Wahlkreis Winsen opstellt. He weer de Nafolger von André Wiese, de sik al 2011 na siene Wahl as Börgermeester von Winsen ut de Landspolitik trüggtagen harr. Bock hett den Wahlkreis mit 45,8 % von de Eerststimmen wunnen un is to’n 19. Februar 2013 in’n Landdag von Neddersassen intagen.

Weblenken

André Bock. Mehr Biller, Videos oder Audiodateien to’t Thema gifft dat bi Wikimedia Commons.

• Websteed von André Bock (hoochdüütsch)