Andreas Willmsen

Andreas Willmsen (* 3. Oktober 1899 in Veern; † 18. Oktober 1980 in Veern) weer en düütsch Politiker (DP). He weer van 1947 bit 1951 Afordneter in' Landdag vun Neddersassen.

Willmsen hett eerst de Volksschool un dornah dat Gymnasium besöcht. He hett mit de Middlere Riep afslooten un hett denn van 1914 bit 1916 en Koopmanslehr maakt. Nah de Lehr weer he Suldat in' Eersten Weltkrieg un weer nah sien Rückkehr in dat Geschäft vun sien Vader tätig. Af 1927 weer he staatlicher Lotterieinnehmer. Van 1943 bit 1944 wurr he to'n Notdeenst vun de Füerschuulpolizei verplicht, un muss dornah ok noch in den Krieg trecken. Nah de Rückkehr ut de Kriegsfangenschap fung he an, sück politisch intosetten. 1946 wurr he in de Gemeenderaat vun Veern wählt un dornah ok to'n Börgermeester vun de Stadt. Van 1947 bit 1951 weer he in de eerste Wahlperiood as Nahfolger för den storven Afordneten Fritz Siedenberg Liddmaat vun den Landdag in Neddersassen, af März 1951 as Liddmaat vun de DP/CDU-Fraktschoon.

Literatur

• Barbara Simon: Abgeordnete in Niedersachsen 1946–1994: Biographisches Handbuch, 1996, S.409–410.