Annette Faße

düütsche Politikerin

Annette Faße (borene Ehlen; * 6. September 1947 in Imßen) is en düütsche Politikerin von de SPD.

Faße is 1947 in Imßen boren un weer na de Middlere Reife op de Fackschool för Optreckers, de se as staatlich prüüfte Optreckersche afslaten hett. Se weer denn Baasfroo von en Kinnergoorn un hett later an en School för körperbehinnerte Kinner arbeidt. Ans hett se ok sülvstännig in de Erwachsenenbildung arbeidt.

Annette Faße is verheiraadt un hett twee Söhns.

Politik ännern

Faße is 1972 in de SPD ringahn un weer lange Johren Vörsittersche von’n SPD-Ünnerbezirk Cuxhoben. An’n 4. September 2010 is se Viezvörsittersche von’n Landsparteiraad von de SPD Neddersassen worrn.

Faße weer dat eerste Maal von 1987 bet 1990 in’n Düütschen Bundsdag un en tweet Maal von 1994 bet 2009. Von 1998 bet 2002 weer se Viez-Sprekerin von de Arbeidsgrupp Verkehr, Bo- un Wahnungswesen von de SPD-Frakschoon un von 1998 bet 2005 ok von de Arbeidsgrupp Tourismus. Von 2002 bet 2005 weer se Viez-Vörsittersche von’n Utschuss för Verkehr, Bo- un Wahnungswesen. Von Januar 2005 bet 2009 weer se denn Sprekerin von de Arbeidsgrupp Tourismus von de SPD-Frakschoon.

Faße is 1987 över de Landslist Neddersassen un von 1994 af an jümmer as direkt wählten Afornten von’n Wahlkreis Cuxhoben (un von 2002 af an von’n Wahlkreis Cuxhoben – Oosterholt) in’n Bundsdag rinkamen. Bi de Bundsdagswahl 2005 hett se 49,8 % von de Eerststimmen kregen.

In’n Juni 2008 hett Faße kund daan, dat se nich wedder för den Bundsdag kannederen will. Na de Bundsdagswahl 2009 is se ut’n Bundsdag rut.