Anton Johann Julius Ferdinand Lentz
Anton Johann Julius Ferdinand Lentz (* 30. Januar 1819 op Good Kremsdörp; † 8. Oktober 1898 in Bremen) weer en düütschen Parlamentarier.
Lentz is 1819 as Söhn von Margarethe Dorothea, borene Winkelmann (28. Dezember 1784–29. September 1823), un den Goodsverwalter Carl Lentz (29. Juli 1781–29. Dezember 1855) op Good Kremsdörp in Kremsdörp boren.[1] Sien öllern Broder weer August Lentz. He weer later op dat Gymnasium un de Realschool in Lübeck.[1] He hett de Bueree lehrt un weer bet 1849 Goodsverwalter in Holsteen, Brannenborg, Posen un West- un Oostprüßen.[2] He is denn aver in de sleswig-holsteensche Armee gahn.[1] Dor is he bleven bet de Armee in’n Januar 1851 oplööst worrn is.[2] Lentz harr Asthma.[2] Dorüm hett he beslaten sien Beroop optogeven un in dat Küstenklima bi siene Süster in Geestmünn to tehn.[2] Lentz hett sik an dat Ünnernehmen von sien Swager Carl Hartlaub bedeligt.[2] De Firma Hartlaub & Co. hett en Dampmöhl, en Schippsbroodbäckeree un Riesschellfabrik bedreven.[2] Nadem Hartlaub 1860 doodbleven is, weer Lentz Alleenbesitter.[2] De Riesschellfabrik is bet 1866 bedreven worrn. Ok an annere Ünnernehmens weer Lentz bedeligt, ünner annern an de Fischereesellschop op Aktien »Weser« un de Firma Schäfer & Co., Bookdruckeree un Verlag von de Nordsee-Zeitung.[2]
Von 1867 bet 1871 weer Lentz Präsident von de Hannelskamer Geestmünn un 1879 bet 1882 noch wedder. Tosätzlich weer he von 1873 bet 1876 spaanschen Viez-Kunsel.[1][2]
Bi de Wahl 1873 to dat Prüüßsche Aforntenhuus is he mit 56,8 % von de Stimmen as Afornten för den Wahlkreis Hannover 33 (Leh) wählt worrn. He weer in dat Aforntenhuus in de Frakschoon von de Natschonalliberale Partei, is aver blots bet an dat Enn von de Amtsperiood 1876 in’t Aforntenhuus bleven. Bi de Wahl 1876 kunn he sik mit 49,2 % von de Stimmen in’n drüdden Wahlgang nich gegen Peter Rickmers dörsetten, de 50,8 % kregen harr. In’n eersten Wahlgang weren op Lentz 42,6 % fullen un in’n tweten Wahlgang 49,3 %.
Lentz hett an’n 9. Oktober 1856 in Bremen Auguste Dorothea Krüger (6. Dezember 1835–26. November 1906) freet.[3] De beiden harrn den Söhn Peter Ferdinand Lentz (1. September 1868–1957).[3]
Footnoten
ännern- ↑ a b c d Parlamentarisches Handbuch für den Deutschen Reichstag und den Preußischen Landtag. Band 1, Fr. Kortkampf, Berlin 1874, Sied 83
- ↑ a b c d e f g h i Hartmut Bickelmann: Bremerhavener Persönlichkeiten aus vier Jahrhunderten: ein biographisches Lexikon. Stadtarchiv Bremerhoben, Bremerhoben 2003, Sied 194
- ↑ a b Indrag to Lentz bi’n Vereen för Computergenealogie